JUECES 16 - Guarani Bible with DC

Sansón ojo Gaza pe

1Metei ara Sansón ojo tëta Gaza pe, jare joko pe oecha metei kuña iyaguasa pota vae, jare oike jo pe oke jae ndive jókuae pɨ̈tu.

2Gaza pegua reta oikuaa Sansón oime ko oï jókuae tëta pe yave, oimama reta jare oäro reta öke opaete jókuae pɨ̈tu, oyemongeta reta oyuka vaerä köe ma yave.

3Ërei Sansón jaeño oke pɨare mbɨte regua. Pɨare mbɨte opüa jare ojo tëta guasu jöke oekɨ jöke-ɨta reve jare oñemotäta pɨpe vae, jare oñono ikupe re güɨroyeupi ɨvɨtɨ ɨvate vae oï Hebrón jóvai vae re.

Sansón jare Dalila

4Kuae jaɨkue rupi Sansón iporopota metei kuña Dalila jee vae re, tëta Sorec ɨvɨtɨ päu pegua re.

5Jare filisteo reta juvicha reta yogüeru Dalila pɨri, jare jei reta chupe:

—Embotavɨ Sansón jare eikuaa chugüi kërai güi ko ipɨ̈rata yae vae, kërai ra orepuereta jese; jökorai roipɨɨ jare roñapɨti vaerä. Kuae reyapo yave romeeta ndeve metei ñavo mil cien reare korepoti pegua.

6Jayave jae jei Sansón pe:

—Romoñera remombeu vaerä cheve kërai güi ko nepɨ̈rata yae vae, jare ¿oime pa kërai reñeapɨti yave, mbaetɨta ndepuere remondoo?

7Jare Sansón jei:

—Cheäpɨti yave chiu yoɨvɨ güɨrapa iïcha ipɨau pe, opɨ̈rota chegüi chepɨ̈rata jare oipotagüe kuimbae ramiñota apɨta.

8Jare filisteo reta juvicha reta güeru Dalila pe güɨrapa iïcha ipɨau vae jare pɨpe Dalila oñapɨti Sansón.

9Jókuae kuña omoñemi ma oñono tenonde voi kuimbae reta jo iárambo, jáeramo jei:

—¡Sansón, ko filisteo reta yogüeru ndeve!

Jayave Sansón opa omondoo tɨmasa okaigüe opa oso rami. Jare filisteo reta mbaetɨ oikuaa maera ko ipɨ̈rata yae vae.

10Dalila jei chupe:

—¡Chembotavɨ! ¡Ndeapu yepe cheve! Ërei añave romoñera remombeu vaerä cheve, ¿kërai pa chepuere roäpɨti?

11Sansón jei chupe:

—Cheäpɨti täta tɨmasa ipɨau jare ndei etei oyeporu vae pe yave, opɨ̈rota chegüi chepɨ̈rata jare oipotagüe kuimbae ramiñota apɨta.

12Jayave Dalila oipɨɨ metei tɨmasa ipɨau vae, jare pɨpe oñapɨti Sansón, jare jei:

—¡Sansón, ko filisteo reta yogüeru ndeve!

Jae tenonde yave rami omoñemi oñono kuimbae reta jo iárambo; ërei Sansón opa omondoo ipoapɨ güi tɨmasa reta, inimbo ramiño.

13Dalila jei Sansón pe:

—¡Jekuae chembotavɨ ye! ¡Ndeapu ye cheve! ¡Emombeu cheve! ¿Kërai pa chepuere roäpɨti?

Jare Sansón jei chupe:

—Chea eñope chiu tɨmasa ombaapo vae jembiapo iïcha ndive, jare etaka re emotäta eñono ɨvɨ re, jökorai opɨ̈rota chegüi chepɨ̈rata jare oipotagüe kuimbae ramiñota apɨta.

Jayave Dalila omonge Sansón jare oñope ia chiu tɨmasa ombaapo vae jembiapo iïcha ndive,

14jare opa oyapo güire oyatɨka etaka ɨvɨ re jare jei:

—¡Sansón, ko filisteo reta yogüeru ndeve!

Ërei Sansón opüa jare güɨnoe jókuae ia oñeope vae etaka reve, jókuae ɨvɨ re oyeatɨka oï vae.

15Jayave jae jei chupe:

—¡Ndeapu! ¿Maera pa roaɨu rere cheve? Kuae re mboapɨ ma chembotavɨ, jare mbaetɨ remombeu cheve kërai güi ko nepɨ̈rata yae vae.

16Echa oparandu avei yae chupe opaete ara rupi ramo Sansón ombopɨakaviä yae jare oipotaecha omano;

17jáeramo omombeu chupe:

—Mbaetɨi añeapi, echa ndei chesɨ güi aa mbove cheñono tee reta Tumpa peguarä nasareorä. Opa yave chea oñapi apɨtata chepɨ̈ratambae oipotagüe kuimbae ramiño.

18Dalila oikuaa ma ketɨ güi ko Sansón güɨnoi ipɨ̈rata yae vae yave, omondo jei filisteo reta juvicha reta pe:

—¡Añave peyu, Sansón omombeu ma cheve kërai güi ko ipɨ̈rata yae vae!

Jayave jae reta yogüɨraja ípɨri güɨraja reve korepoti ipo pe.

19Jare Dalila omonge jäpapau pe Sansón, jare oenɨi metei kuimbae oñapi vaerä jókuae chiu ia oñeañopegüe. Javoi omboɨpɨ oyuvanga jese, echa mbaetɨ ma ipɨ̈rata.

20Jare jei chupe:

—¡Sansón, ko filisteo reta yogüeru ndeve!

Sansón okuera oke oï vae güi yave, oyemongeta oyeyora vaerä tenonde yave rami, ërei jae mbaetɨ oikuaa yandeYa osɨrɨ ko chugüi vae.

21Jayave filisteo reta oipɨɨ jare opa güɨnoe chugüi jesäɨ jare güɨraja reta Gaza pe; joko pe oñapɨti reta karena jiero iyu vae pegua pe jare oiko tembipɨɨ rɨru pe ombaeyoso vaerä.

22Ërei ngatu ia omboɨpɨ ye okuakuaa jókuae oñapi reta güire.

Sansón imano

23Jayave filisteo reta juvicha reta oyomboatɨ omee vaerä mɨmba oyeyukagüe itumpa Dagón pe, jare otairari reta:

“Ñanetumpa ko omee yandepo pe yanderovaicho Sansón.”

24Opaete vae reta oecha yave otairari vi omboete reta reve itumpa, jei reta:

“Ñanetumpa ko omee yandepo pe yanderovaicho Sansón,

omokañɨtei ñaneremitɨ vae, jare ñanerëtara jeta oyuka vae.”

25Jare oyandu reta ipɨa pe oyerovia yae ma yave, imaendúa reta güeru vaerä Sansón ipɨte pe oyuvanga vaerä jese, jökorai oyerovia reta vaerä. Jayave güɨnoe reta Sansón tembipɨɨ rɨru güi jare oyuvanga reta jese, jökorai oyembovɨa katu reta. Jare oñono reta okɨta mókoi vae ipäu pe.

26Jayave Sansón jei kunumi oipoko vae pe:

—Chereraja, jare chembopoko mókoi okɨta opaete o oguapɨ jese vae re, ayeko vaerä jese.

27Opaete filisteo reta jare juvicha reta ñogüɨnoi jókuae tupao pe, o ɨvategua pe kuimbae jare kuña reta oupitɨ tres mil ñogüɨnoi joko güi omae reta kërai oyuvanga Sansón re oyembovɨa katu reta vaerä.

28Jayave Sansón oyerure yandeYa pe, jare jei chupe: “CheYa Tumpa, nemaendúa añave cheré, chemomɨ̈rata, romoñera kuae mókoi cheresa re ayepɨ vaerä opaete re metei jeia pe.”

29Sansón opovɨvɨ jókuae mókoi okɨta opaete o oguapɨ jese vae re, ipo iyakatu oñono metei re jare ipo iyasu oñono ïru re.

30Jayave Sansón jei: “¡Filisteo reta tomano che ndive!”

Jayave omoaña opaete ipɨ̈rata ndive jare tupao osururu filisteo reta juvicha reta re jare opaete joko pe ñogüɨnoi vae reta re. Sansón omano yave jeta yae oporoyuka tenonde yave oporoyuka vae güi.

31Jaɨkue rupi Sansón jëtara reta yogüeru güɨraja jëogüegüe, jare oñotɨ reta Zora jare Estaol ipäu pe, tu Manoa jɨvɨa oïa pe. Veinte año rupi Sansón oiko Israel iñemuña reta juvicharä.