ECLESIÁSTICO 50 - Guarani Bible with DC

Simeón sacerdote tenondegua ete

1Oime vi oï sacerdote itenondegua vae Simeón, jae ko Johanán taɨ;

jae oiko yave oñemopüa ye tupao

jare jaema oï jenda pe mbaemboete renda.

2Jae oiko yave vi oñemopüa ye ñekësea,

oɨvate reta yeopiaka pegua mburuvicha jeta peguarä.

3Jayave vi oyeyoo ɨrɨrurä,

ɨguasu nunga tuicha vae.

4Jae oepɨ jëta imonda vae reta güi,

jare oyapo tëta guasu jëguambae tovaicho pegua vae.

5¡Aa tuichagüe yeyé jei vae ko mbaemboete renda güi oë ou yave,

mbaemoiaä ikupe rupi oë ou yave!

6Metei yasɨtata amapɨtu rupi overa vera vae rami ko;

ani ramo yasɨ jovaguasu vae arete yave oë vae rami;

7kuaraɨ mburuvicha tuicha vae reta jeta omboesape vae rami,

ani ramo yɨɨ amapɨtu rupi oyekuaa vae rami;

8mbaepotɨ iara yave ñana re oyekuaa vae rami,

ani azucena ɨsɨrɨ raɨ iyɨ́vɨri oyekuaa rami

ani ramo ɨvɨra re jäka kuaraɨ iara pe vae rami;

9jare incienso metei mɨmba oyeyuka omee yave oyeapɨ vae rami,

metei kopa oro pegua vae rami,

oñemopöra ita jepɨ vae pe rami,

10olivo jovusu vae täta ia oï vae rami,

ani ramo metei ɨvɨra jovusu jare jäka jeta vae rami.

11Jökorai ko oyemonde yemboete pegua yave

jare oñono iyé ñemopöraa ikavigüe vae;

oyeupi yave mɨmba oyeyuka oyeapɨ jese vae ikavigüe vae oïa pe

jare opaetei omotɨnɨe mbae ipöra vae pe tupao joka;

12jare, oyemboɨ yave oï yepea iyɨke pe,

oipɨɨ ïru vae sacerdote reta güi jaɨ jaɨ rupi,

taɨrusu vae reta oimama ramboeve oñesɨro reve

Líbano pe ɨvɨra re jokɨ ramo oï vae rami.

13Oimama reta, ɨvɨravuku ɨembeɨ rupi oï vae rami,

opaete Aarón iñemuñagüe reta täta iyemboete,

güɨraja reta ipo ñavo mbota Tumpa peguarä,

opaete tëta Israel jovake.

14Opa ma yave mbae oyeapo mɨmba oyeyuka oyeapɨ jese vae pe,

jaema oñono kavi reta mɨmba oyeyukagüe ɨvate ete pe oï vae pe,

15oipɨɨ ipo pe kopa

jare güɨrökuavee michi vino

opɨyere reve mɨmba oyeyuka oyeapɨ jese vae iyɨpɨ re,

ipiche katu vaerä oñeëtu Ɨvate ete pe oï vae pe, jae ko Mburuvicha guasu opaete pegua vae.

16Jaema jayave sacerdote reta, Aarón iñemuñagüe reta,

omoñee mimbɨguasu jiero pegua vae,

jare täta oñee oyeendu

jókuae jae omombeu oï Ɨvate ete pegua vae oime oï joko pe vae.

17Jupiveño, opaete joko pe oï vae reta

oyetavatɨka jare itɨndɨ ɨvɨ re ojo oya

omboete vaerä Ɨvate ete pegua vae,

jae ko Israel iTumpa ikɨambae vae.

18Jaema jayave oyeendu yemongoi,

jare opaete tëta ipo reta jɨapu oyeendu yemongoi ipöragüe vae.

19Opaetei tëta ipo reta oyemongoi

jare oyerure reta Tumpa iporoparareko vae pe.

Jare sacerdote itenondegua vae opa yave mbae oyapo mɨmba oyeyuka oyeapɨ jese vae oïa pe,

opa ma yave omee Tumpa pe mbota oñemee vae reta oyeapogüe vae,

20ogüeyɨ ou mɨmba oyeyuka oyeapɨ jese vae oïa güi iyɨva omopüa güeru reve

opaete Israel-ɨgua reta iárambo

jare ojäa reve yerovia Tumpa güi güeru vae

täta oyerovia ipuere ramo oyerure jae jee re.

21Jare opaete vae oyetavatɨka pɨau ye

oipɨɨ vaerä chugüi jókuae yerovia.

22Añave, jare, peë mo pemboete Tumpa Israel iTumpa,

mbae oporomopɨakañɨ vae oyapo ɨvɨ pe vae,

kuimbae ombokuakuaa ichɨ jɨe güive ma vae

jare oyapo jae oipota rami vae.

23Jare jae tomee vi peve reta arakuaa,

jare peiko kavi oyoupi.

24Jare Tumpa jekuaeñoi togüɨrovia katu tomae Simeón kotɨ

jare toyapo Finees pe güɨrökuaveegüe vae;

agüɨye toyapombae chupe

jare iñemuña reta pe, ara oiko oiko ramboeve.

Tëta guasu reta Israel kotɨ oyovaicho vae reta

25Oime mókoi tëta guasu reta omotareɨ vae,

jare ïru vae tëta guasu pe oyeero vaerä ave oëa vae:

26Jae ko Seír pe oiko vae reta, filisteo reta

jare Siquem pegua jeko kavimbae vae reta.

Iyapɨ

27Kuae reta jae yemboe arakuaa pegua vae jare ñee arakuaa pegua reta güɨramoi pegua vae

jae ko Jesús iyarakuaa katu rupi jei vae,

jae ko Eleazar taɨ jare Sirá jamariro ma,

jae ko jae iyemongeta güi oë rami.

28Toyerovia katu oyemongeta pɨpe vae;

kia ñavo oikuaa vae iyarakuaata,

29echa Tumpa yamboete vae tekove ko.