ECLESIASTÉS 2 - Guarani Bible with DC

1Jae vi cheyeupe: “Añave, tayerovia jare tayekou chepɨa jemimbota rupi.” ¡Ërei jókuae reta ave vi mbaeä etei!

2Ou aikuaa, yapuka vae ave mbokere jare yerovia katu mbaetɨ etei mbaerä ikavi.

3Jare añono chepɨa pe ayembosavaɨpo vaerä vino pe, yarakuaambae rami, aeyambae reve arakuaa katu; jökorai aikuaa regua kuimbae reta oikove yogüɨreko ramboeve, jókuae ra ko jaekavi yaeta chupe reta vae.

4Ayapo jeta mbaravɨkɨ tuichagüe; ayapo cheyeupe o reta ikavigüe;1 R 7.1-12. añotɨ cheyeupe jeta uva.

5Ayapo cheyeupe ko reta jare ko raɨ reta, joko pe añotɨ opaete temitɨ ɨvɨra ia vae.

6Ayapo ɨrɨru guasu reta amboɨru vaerä ɨ, pɨpe amboɨu vaerä cheremitɨ reta;

7agua tembiokuai kuimbae jare tembiokuai kuña, oime vi tembiokuai chero pei oa vae; anoi vi jeta guaka jare vecha; tenonde rupi ma yogüɨreko chegüi Jerusalén pe vae reta güi,1 R 4.23. jeta yeyé anoi.

8Amboatɨ vi cheyeupe korepoti jare oro; jeta mbaembae jepɨ vae, ïru mburuvicha guasu reta imbaegüe jare ïru tëta reta güi.1 R 9.28; 10.10-22. Anoi kuimbae jare kuña otairari vae reta, jare oipotagüe tembiporu tairari pegua;1 R 10.23-27; 2 Cr 9.22-27. ayapo chepɨa jemimbota,1 R 11.3. kuña reta ndive.

9Chetuicha yae,1 Cr 29.25. jare anoi jeta mbaembae tenonde rupi ma yogüɨreko chegüi Jerusalén pe vae reta güi. Opaete kuaekuae reve jekuaeñoi chearakuaa reve aiko.

10Mbaetɨi ayeopia cheresa jemimbota güi; mbaetɨi ayeopia chepɨa oipota vae güi. Chepɨayerovia opaete ayapogüe reta re, jókuae ko jae opaete cheparavɨkɨ reta jekovia.

11Javoi amae opaete cheparavɨkɨ reta re, opaete ayemoambeko mbatee ayapo vae, jökorai ayu aikuaa opaete kuae reta mbaeä etei ko, ayemoambekoiño ma jese, jare osiriveä etei mbaerä kuae ɨvɨ pe.

12Jaɨkue rupi ayemongeta arakuaa re, mbokere re jare arakuaambae re, echa ¿mbae yé pa oyapota cheraɨkue rupi mburuvicha guasurä oikota vae? ¡Mbaetɨ mbae, echa ko opa ma oyeapo!

13Aikuaa, arakuaa ko ikavi yae ete arakuaambae güi, tembipe ikavi yae ete pɨtumimbi güi rami.

14Yarakuaa vae omae kavi opaete mbae oyapota yave, ërei yarakuaambae mbaetɨ omae kavi mbae oyapota yave. Ërei ngatu aecha vi kuae reta, oyovakeñota opa omano;

15jayave jae cheyeupe: “Yarakuaambae maratu oasa rami, jökoraita vi che maratu aasa, ¿mbaerä pa jayave osiriveta cheve ayemoambeko mbatee chearakuaa yae vaerä vae? Jayave jae, jókuae ave mbaeä etei ko vae.

16Echa yarakuaa vae jare yarakuaambae re ave ngaraa kia imaendúa avei vae; echa jaɨkue rupi opaeteita ma ñakañɨ chugüi vae; jökorai yarakuaa vae jare yarakuaambae oyovakeño omanota.”

17Jáeramo, aröɨro tekove, echa opaete kuae ɨvɨ pe oyeapo vae ikaviä etei cheve. Echa opaete kuae reta mbaeä etei ko, ¡yayemoambekoiño ma ko jese!

18Aröɨro vi opaete cheparavɨkɨ kuae ɨvɨ pe ayapo vae, echa opaete jókuae aeyata cherekovia pe opɨtata vae pe.

19Jare mbaetɨ yaikuaa, yarakuaa ra ani yarakuaambae ra oyemboiyata cheparavɨkɨ chearakuaa katu reve ayapo kuae ɨvɨ pe vae re, ayemoambeko jese vae re. Kuae mbaeä etei vi ko.

20Aecha yave opaete kuae ɨvɨ pe cheparavɨkɨ ayapogüe, ayemoambeko jese vae, chearakuaa katu reve ayapo vae, chembopɨtu,

21echa oime yarakuaa katu reve, jeta mbae oikuaa vae rupi, jupi rupi kavi oyapo iparavɨkɨ vae, ërei jae ko oeyata jókuae mbaetɨ etei oparavɨkɨ jese vae imbaerä. ¡Kuaekuae mbaeä etei vi, ikavimbae yae ko!

22Echa, ¿mbae pa kuimbae oväe opaete iparavɨkɨ rupi, oyemoambeko mbatee oyapo kuae ɨvɨ pe vae güi?

23Echa opaete ara oikove oiko ramboeve oiporara,Job 5.7; 14.1. iparavɨkɨ rupi oyemoambeko yae; pɨ̈tu yave ave mbaetɨ oputuu kavi oyemongeta güi. ¡Kuae mbaeä etei vi!

24Kuimbae pe ikavi vae, jae ko okaru kavi vae,Ec 3.13; 5.18; 9.7; Is 56.12; Lc 12.19; 1 Co 15.32. jare oyerovia iparavɨkɨagüe re vae. Kuae aikuaa vi jae ko Tumpa güi ou vae.

25Echa, ¿kia pa ipuere okaru jare oyerovia potaä?

26Echa Tumpa ko omee arakuaa katu, yemboe tuichagüe,Job 32.8; Pr 2.6. jare yerovia katu jae ipɨakatu omae jese vae pe; ërei iyoa vae pe omee mbaravɨkɨ, jeta mbae oeka jare omboatɨ vaerä, jaɨkue rupi jae omee vaerä ombopɨakatu vae pe.Job 27.16-17; Pr 13.22. ¡Kuae mbaeä etei vi, yayemoambekoiño ma ko jese!