ÉXODO 7 - Guarani Bible with DC

1YandeYa jei Moisés pe:

—Mase, roñono cherekovia pe Faraón jóvai, jare nderɨkeɨ Aarón toï neñee omombeu vaerä.

2Nde ere opaete mbaembae reta che royókuai vae, jare nderɨkeɨ Aarón timiari Faraón pe omaeño vaerä yogüɨraja iɨvɨ güi Israel iñemuña reta.

3Ërei che amotätata Faraón ipɨa, jare ayapota jeta mɨakañɨ retaHch 7.36. ɨvɨ Egipto pe.

4Jare Faraón ngaraa oyeapɨsaka peñee re; ërei che aitɨta chembaepuere Egipto re, anoeta chesundaro reta, chembae vae, Israel iñemuña reta ɨvɨ Egipto güi tuichagüe morojäa rupi.

5Jare Egiptoɨgua reta oikuaata che ko jae peYa vae, aitɨ yave chembaepuere Egipto re, Israel iñemuña reta pogüɨnoe jae reta ipɨte güi yave.

6Moisés jare Aarón oyapo yandeYa oyókuai rami;

7Moisés güɨnoi ochenta año jare Aarón güɨnoi ochenta y tres año yave imiari reta Faraón ndive.

Aarón ipopoka

8YandeYa jei Moisés jare Aarón pe:

9—Faraón jei yave peve: “Peechauka mɨakañɨ,” nde rereta Aarón pe: “Eipɨɨ ndepopoka jare eitɨ Faraón jóvai oyeapo vaerä mboirä.”

10Jökorai Moisés jare Aarón yogüeru Faraón pɨri jare oyapo reta yandeYa oyókuai rami. Jare Aarón oitɨ ɨvɨ re ipopoka Faraón jóvai jare oyeapo mboirä.

11Jayave Faraón oenɨi vi imbaekuaa vae reta jare ichoropa vae reta, kuae reta oyapo vi jökorai etei imbaekuaa rupi,

12oitɨ reta metei ñavo ipopoka ɨvɨ re, jare metei ñavo vae oyeapo mboirä; ërei Aarón ipopoka opa jou imbaekuaa vae reta ipopoka.

13Ërei jeseve Faraón ipɨa oñemotäta, mbaetɨ oipota oyeapɨsaka jae reta iñee re, yandeYa jei rami.

Tugüɨ regua

14Jayave yandeYa jei Moisés pe:

—Faraón ipɨa omotäta jare mbaetɨ omaeño yogüɨraja Israel iñemuña reta.

15Ndeimbove epüa jare ekua Faraón pɨri, jae ogüeyɨta ɨ̈aka pe jare eñeñono jóvai ɨ̈aka jembeɨ pe jare eraja ndepo pe popoka mboirä oyeapo vae.

16Joko pe ere chupe: “OreYa, hebreo reta iTumpa chembou ndekotɨ, jae vaerä ndeve jae jei vae: Emaeño toyogüɨraja tëta chembae, chemboete vaerä ñuu pe; ërei nde jekuaeñoi mbaetɨ reipota reyeapɨsaka cheñee re.

17Jáeramo, körai jei oreYa: ‘Kuae rupi reikuaata che ko jae peYa vae. Kuae popoka chepo pe anoi vae aiporu kuae ɨ oï ɨ̈aka pe vae re yave, oyepoepɨta tugüɨrä.Ap 8.8; 16.4.

18Jare jevae reta ɨ rupigua opata omano, jare iineta ɨ̈aka jare Egiptoɨgua reta oyuguaruta jou ɨ ɨ̈aka rupigua.’ ”

19YandeYa jei ye Moisés pe:

—Ere Aarón pe: “Eipɨɨ ndepopoka jare eropövee ɨ re kuae Egipto pe, ɨ̈aka kotɨ, ɨ̈aka raɨ kotɨ, ɨupa kotɨ jare opaete ɨrɨru tuicha vae kotɨ oyeapo vaerä tugüɨrä.” Toime tugüɨ opaete ɨvɨ Egipto rupi; jökorai vi vaso reta ɨvɨra pegua jare ita pegua rupi.

20Moisés jare Aarón oyapo yandeYa oyókuai rami; oiporu ipopoka ɨ ɨ̈aka pegua re, Faraón jovake jare jembiokuai reta jovake, jare opaete ɨ ɨ̈aka rupigua oyeapo tugüɨrä.

21Jökoraiño vi jevae reta ɨ rupigua opa omano; jare ɨ̈aka iine yae otimbo ramo, Egiptoɨgua mbaetɨ ipuere jou ɨ joko güi. ¡Oime tugüɨ opaete ɨvɨ Egipto rupi!

22Ërei Egipto pegua imbaekuaa vae reta jökorai etei vi oyapo reta imbaekuaa rupi, jare Faraón ipɨa oñemotäta, mbaetɨ oipota oyeapɨsaka jae reta iñee re, yandeYa jei rami.

23Jare Faraón oyerova ye jo kotɨ, mbaetɨ etei ipɨakañɨ omae kuae oyeapogüe re.

24Jare opaete Egipto rupi oyapo reta ɨkua ɨ̈aka jembeɨ rupi güɨnoe reta vaerä ɨ jou, echa mbaetɨ ipuere reta jou ɨ ɨ̈aka rupigua.

Pïte regua

25Oasa chiu ara, yandeYa oyapo güire kuae mɨakañɨ ɨ̈aka re.