JONÁS 1 - Guarani Bible with DC

Jonás otekuarai yandeYa güi

1YandeYa jei Jonás, Amitai taɨ pe:

3Ërei Jonás opüa otekuarai vaerä yandeYa güi tëta Tarsis kotɨ, jare ojo tëta Jope kotɨ, joko pe oväe metei barco ojota oï Tarsis kotɨ vae; oyemboepɨ jare oyeupi pɨpe ojo vaerä jae reta ndive Tarsis kotɨ, mombɨrɨ yandeYa güi.

4Ërei yandeYa omboɨvɨtuai täta ɨguasu pe; jökorai ɨguasu pe täta yae ama ɨvɨtuai reve vae jeko pegua, barco oyeka potaecha.

5Jare barco pe oparavɨkɨ vae reta okɨɨye, jare metei ñavo vae osapúkai reta itumpa pe; jare omombo reta ɨ pe ivoɨta barco pegua, ombovevɨi vaerä. Ërei Jonás yepe ogüeyɨ barco jugua kotɨ, jare oyapakua oke.

6Jayave barco pe oparavɨkɨ vae reta juvicha oecha jare jei chupe:

—¿Maratu pa reiko, nderopeɨ mbatee? ¡Epüa jare eyerure neTumpa pe! Güɨramoi jae yandepararekota, agüɨye vaerä ñamano.

7Jare jae reta jei metei ñavo oyoupe:

—Peyu yambosuerte, yaikuaa vaerä kia jeko pegua ou yandeve kuae ikavimbae.

Ombosuerte reta yave, Jonás re oa suerte.

8Jayave jae reta jei chupe:

—Emombeu oreve añave. ¿Maera ko ou yandeve kuae ikavimbae? ¿Mbaerero pa nde jare ketɨ güi pa reyu? ¿Ketɨgua pa nde jare mbae pa nerëta jee?

9Jare Jonás jei chupe reta:

—Hebreo ko che, cheYa Tumpa ara pegua güi oipoɨu vae, ɨguasu jare ɨvɨ iyapoa.

10Jare jókuae kuimbae reta okɨɨye yae, jare jei reta chupe:

—¿Maera pa ko kuae reyapo?

Echa jae reta oikuaa, otekuarai ko yandeYa güi vae, echa jae etei yepe omombeu chupe reta.

11Jare jei reta chupe:

—¿Mbae pa royapota ndeve, ɨguasu kïrii vaerä yandeve?

Echa ɨguasu jeieteño oyemboarasɨ chupe reta.

12Jare jae jei chupe reta:

—Chepɨɨ jare chemombo ɨguasu pe, jare ɨguasu kïriita peve; echa aikuaa chereko pegua ko ou kuae ama ɨvɨtuai reve vae peve.

13Jare jókuae kuimbae reta oïraro tëi ibarco, omboyerova vaerä ɨ jembeɨ kotɨ; ërei mbaetɨ ipuere reta, echa ɨguasu jeieteño oyemboarasɨ ikotɨ reta.

14Jayave osapúkai reta yandeYa kotɨ, jei reta: “Romoñera añave oreYa, agüɨye toromano kuae kuimbae jekove jeko pegua, ërei jekoä yave, agüɨye oremboeko imano re; echa nde oreYa reyapo ko nde reipota rami.”

15Jare oipɨɨ reta omombo Jonás ɨguasu pe; jayave ramo ɨguasu kïrii iyarasɨ güi.

16Jare jókuae kuimbae reta oipoɨu yae yandeYa güi, jare omee reta mɨmba oyeyukagüe yandeYa pe, jare oñererökuavee reta chupe.

17Ërei yandeYa yepe oime omokätɨro jevae tuicha yae vae ɨ rupigua, jouka vaerä Jonás. Jare Jonás oiko jevae ɨ rupigua jɨe pe mboapɨ ara jare mboapɨ pɨ̈tu.