EZEQUIEL 37 - Guarani Bible with DC

Ɨvɨtɨ päu ipe kavi vae pegua maekägüe reta otinigüe

1YandeYa ombou imbaepuere cheré, jare chereraja cheñono metei ɨvɨtɨ päu ipe kavi vae pe, tɨnɨe maekägüe otinigüe oïa pe.

2Jare chemondo aguata ipɨte reta rupi; aecha jeta yae, tɨnɨe ɨvɨtɨ päu ipe kavi vae rupi, jare otiniasɨ yae.

3Jayave jei cheve: “Nde kuimbae, ¿rerovia pa kuae maekägüe reta ipuere oikove ye?” Che jae chupe: “CheYa Tumpa, ndeño ko reikuaa.”

4Jayave yandeYa jei cheve: “Emoërakua kuae maekägüe reta pe maratuta oasata vae, ere chupe reta: ‘Maekägüe otini vae reta, peyeapɨsaka yandeYa iñee re.

5YandeYa Tumpa jei körai peve: Amee yeta pepɨ̈tuerä, peikove ye vaerä.

6Pekägüe reta ambojayɨ yeta, añono yeta pesoorä jare pepirerä; amee yeta pepɨ̈tuerä, peikove ye vaerä. Jare peikuaata che ko jae peYa vae.’ ”

7Jökorai amoërakua chupe reta maratuta oasa vae re, Tumpa cheokuai rami. Amoërakua mbae maratuta vae aï ramboeve aendu jɨapu: Oyeapo ɨvɨkana, jare maekägüe reta omboɨpɨ oya oyoe jenda jenda pe ae.

8Amae jare aecha omboɨpɨ oyekuaa jayɨ reta, isoo jare ipire reta. Ërei mbaetɨ jekove reta.

9Jayave yandeYa jei cheve: “Nde kuimbae, nemiari cheree re tekove pe, jare ere chupe: YandeYa Tumpa jei körai: ‘Tekove, eyu oipota rupi güi, eyu eike kuae omano vae reta re, oikove reta vaerä.’ ”

10Jare amoërakua mbae oasata vae jae cheokuai rami, jare tekove oike jese reta iyɨvɨte pe, jare oikove reta, jare opüa oyemboɨ reta.Ap 11.11. Jeta yeyé, sundaro reta jeta yae rami.

11Javoi jei cheve: “Nde kuimbae, opaete kuae maekägüe reta rami ko Israel iñemuña reta. Echa jei reta: ‘Ñanekägüe reta opa otini; mbaetɨ ma ñanoi mbae re yayerovia vaerä, opa ma ñakañɨtei.’

12Jáeramo, emoërakua chupe reta maratuta vae: ‘YandeYa Tumpa jei körai: Mase, tëta chembae vae reta, aipeata petɨvɨa reta, pogüɨnoeta joko güi jare pogüɨrajata ɨvɨ Israel pe.

13Jare chekuaata che ko jae peYa vae, aipea ma yave petɨvɨa reta jare pogüɨnoe ma yave joko güi.

14Jare chepɨ̈túe ameeta peve, peikove ye vaerä; jare poñono yeta peɨvɨ ae pe. Jayave peikuaata che peYa ko jae kuae jare ayapo. Che peYa jae kuae.’ ”

Judá jare Israel oñemometei vae regua

15YandeYa Tumpa jei cheve:

16“Nde kuimbae, eipɨɨ metei ɨvɨra jare eikuatía jese: ‘Judá pegua reta peguarä.’ Jaɨkue rupi eipɨɨ ïru ɨvɨra jare eikuatía jese: ‘Israel pegua reta peguarä.’

17Javoi kuae ɨvɨra reta eñono päve metei rami ñogüɨnoi vaerä, jare metei rami toñogüɨnoi ndepo pe.

18Nerëtaɨgua reta oparandu ndeve yave körai: ‘Emombeu oreve, ¿mbae pa oipota jei kuae?’

19Ere chupe reta: YandeYa Tumpa jei körai: ‘Mase, ko aipɨɨ ɨvɨra Israel pegua reta peguarä vae, jare añonota ɨvɨra Judá pegua reta peguarä vae ndive, ayapota metei ɨvɨra ramiño jare metei rami anoi retata chepo pe.’

20Jare jókuae ɨvɨra reta reikuatía vae, renoita ndepo pe jae reta jovake.

21Jare ere chupe reta: ‘YandeYa Tumpa jei körai: Mase, anoeta Israel iñemuña reta ïru tëtaguasu reta ipɨte güi jae reta ñogüɨnoia güi, amboatɨ retata oipota rupi güi, aru reta yeta iɨvɨ ae pe.

22Kuae reta ayapota meteiño tëtaguasu Israel iɨvɨtɨ reta re, jare meteiño güɨnoita juvicha guasurä. Ngaraa ye ma oyemboyao mókoi tëtaguasu pe ani mókoi mborookuaía pe.

23Ngaraa ye ma oyemongɨa reta tumpa-raanga reta omboete vae rupi, pɨ̈chɨi Tumpa pe vae rupi jare oyembopɨapochɨ reta Tumpa kotɨ vae rupi. Aepɨta opaete oyembopɨapochɨ reve oyapo vae rupi iyoa vae güi, jare aitɨota; yogüɨrekota chembaerä jare che aikota jae reta iTumparä.

24Cherembiokuai David rami vae oikota jae reta juvicha guasurä, güɨnoi retata meteiño oyangareko jese reta vaerä;Ez 34.24. yogüɨreko retata cheporookuai reta rupi, oñovatuta jare oyapo retata.

25Yogüɨreko retata jókuae ɨvɨ amee cherembiokuai Jacob pe vae pe, joko pe yogüɨrekose peñemuñagüe reta. Joko pe yogüɨrekota jae reta, taɨ reta jare iñemuña reta jekuae avei pegua; jare cherembiokuai David rami vae oikota juvicharä jekuae avei pegua.

26Jare morogüɨrökuavee päve yembopɨakatu pegua ayapota jae reta ndive, morogüɨrökuavee päve jekuae avei pegua. Añono kavita, ambojeta retata jare añonota chero mbaemboetea pegua ipɨte reta pe jekuae avei pegua.

27Chero mbaemboetea pegua añonota jae reta ipɨte pe, che aikota iTumparä jare jae reta yogüɨrekota chembaerä.2 Co 6.16; Ap 21.3.

28Jare ïru tëtaguasu reta oikuaata che peYa Tumpa ko añono tee Israel iñemuña reta vae, anoi ma yave chero mbaemboetea pegua jae reta ipɨte pe jekuae avei pegua.’ ”