JOB 39 - Guarani Bible with DC

1¿Reikuaa pa kërai yave kavara reta ñana rupigua imembɨ oa,

reecha pa guasukaka kuña imembɨ oa?

2¿Reikuaa pa mbovɨ yasɨ ma ipurúa,

jare kërai yave oata imembɨ vae?

3Oyemboapúa jare omombo imembɨ,

jare mbaetɨ ye jasɨ chupe.

4Jarembae imembɨ ipɨ̈rata, okuakuaa kaa pe,

jare ojo mbaetɨ ye ou.

5¿Kia pa omaeño mburika ñana rupigua re,

kia pa oyora iïcha?

6Che amee oiko vaerä ɨvɨ ipombaea rupi,

ɨvɨ yukɨ jenda rupi.

7Oyóyai yóyai täsémbai tëta guasu pe vae,

mbaetɨ oendu jariero isapúkai vae.

8Oguata ɨvɨtɨ rupi jembíu katúa rupi,

oeka oipotagüe ñana jokɨ vae jembiurä.

9¿Rerovia pa toro pochɨ vae ndepuere reyókuai,

ani repɨta jae ndive jókai pe?

10¿Ndepuereta ra reñono yuvo jese remboara vaerä,

ani nderaɨkue ojo omongúi vaerä ɨvɨ?

11¿Ndepuereta ra reyerovia jese ipɨ̈rata yae ramo,

ani reeya jae oyapo vaerä ndeparavɨkɨ?

12¿Rerovia pa jae omboatɨta ndeve rearɨvogüe,

jare oñono ndeavatío pe?

13¿Nde pa remee pavo real ipepo retarä ipöra yae vae,

ani yandu ipepo retarä jare jaa retarä?

14Jae omboa ɨvɨkúi rupi,

kuaraɨ omboaku ɨvɨkúi yave oya vaerä.

15Iñakañɨ kia opɨ̈rota jese vae güi,

jare mɨmba reta ipuere ko opɨ̈ro jese jare oyoka vae güi.

16Mbaetɨ oyangareko imembɨ reta re, imembɨä rami,

mbaetɨ omboyemongeta iparavɨkɨ okañɨ vaerä.

17Echa che mbaetɨ amee chupe arakuaa,

jare mbaetɨ amee chupe arakuaa katu.

18Ërei opüa osɨi yave,

oyóyai kavayu jare opo jese reta.

19¿Nde pa remee kavayu pe ipɨ̈rata vaerä,

ani remboaruanda ia pe?

20¿Remochäguarikota pa metei tuku rami,

jókuae iñäpɨgua iñee yavaete vae?

21Ipɨ ipu oyeendu ipe kavía rupi,

okɨɨyembae reve ojo ñeraroa kotɨ.

22Oyóyai oporomongɨɨye vae, mbaetɨ okɨɨye chugüi,

mbaetɨ oyerova ye ñeraro güi.

23Ipu oyeendu oa jese uvɨ reta,

jare mii jiero pegua reta.

24Iñäkua yae jarembae ojo oväe,

yepe tëi oñee mimbɨguasu.

25Iñee pe omboyevɨ mimbɨguasu iñee,

mombɨrɨ güi oëtu ñeraro,

jare oendu sundaro ruvicha reta iñee jare täsémbai.

26¿Ndearakuaa rupi pa güɨraké oveve,

jare ojo arayevɨ kotɨ?

27¿Nde pa reyókuai güɨraké

ojo vaerä ɨvate oñono jaitɨ?

28Jae oiko ɨ̈vavira re,

ɨ̈vavira iyapɨte re ita guasu re.

29Joko güi jae omae mombɨrɨ,

jare oipïaro jembiarä.

30Imembɨ reta jou tugüɨ,

oime maerëogüe ñogüɨnoia pe, joko pe oï jae.