SABIDURÍA 17 - Guarani Bible with DC

Pɨtumimbi jare tembipe

1Neporojäa tuicha yae ko jare yavai ko yamombeu kavi vaerä.

Jókuae ramo ko, kia oikuaambae vae oyembojopa.

2Jekopochɨ vae reta oyemongeta oiporarauka vaerä

tëta ipo ndeveguaeño vae reta pe,

ërei ojo jae reta, opa oyepɨɨuka pɨtumimbi pe

jare yogüɨreko vaerä pɨ̈tu iyapɨmbae jembipɨɨrä,

opa oyeokenda ñogüɨnoi jo rupi,

oechambae reve ara jembipegüe nde, remeegüe, remee aeño vae.

3Oyemongeta reta mbaeyoa oyapo vɨarigüe vae

oñemita ko, oiko akañɨ rupi vae,

ërei, añetete, opata ko otekuarai reta oipota rupi,

täta okɨɨye reve mbae iä oyekuaata chupe reta vae güi.

4Jare, yepei jo rupi oñemita

ërei jókuae kɨɨye ngaraaí oasa chugüi reta.

Oipota rupi mbae ipu oendu vae oiämondo reta,

jare oyeechauka chupe reta mbae iä yavaete katu vae.

5Tata mbaetɨ ipuere omboesape kavi chupe reta,

yasɨtata reta oesapegüe ave

mbaetɨ omoembipe kavi chupe reta jókuae pɨ̈tu yavaete katu vae.

6Chupegua reta jaeño ma oesape güɨnoi

tata oporoiämondo ye vae jare jaeiño jendɨ oï vae;

jare oï kɨɨye tätagüe vae, jae reta yepe ma omae veä ërei jeseve

jekuaeñoi mbaetɨ okañɨ jesa güi yavaete vae.

7Aña ndive mbae oyapo vae reta opa joko pe iñamɨri,

jare yemboe reta jae reta oyeko jese vae mbaeí ramiño opa opɨta,

8jare jókuae oñeñono kɨɨye jare mbɨatɨtɨ güi oipoanota tëi

kuimbae imbaerasɨ vae reta vae,

jae reta vi opa kɨɨye tätagüe vae omombaerasɨ güɨnoi.

9Yepe mbaetɨ këraiti mbatee jókuae okɨɨye ñogüɨnoi chugüi vae,

mbae oyeendu oasa vae

jare mboi reta iñee oyeendu vaeño

täta oiämondo reta;

kɨɨyei oyuka pota güɨnoi reta,

jare mbaetɨ etei oipota ɨvate omae reta

jókuae ko oasayepe vaerä ñogüɨnoi reta tei.

10Añetete mbae ikavimbae imara etei ko,

echa jaei omae iyé mbae oyapo vaerä yave;

yemboe reta oiko vae oyaporai yave,

jaeño mai ko pɨ̈chɨi vae pe oyemongeta.

11Kɨɨye, añetete, mbaetɨ ko

oipota oiko jupigüe vae jeigüe rupi.

12Yepe iyé pe mbae michi vae pe oyemongeta,

ërei tuicha rupi ko güeruta tembiporara.

13Egiptoɨgua reta, jókuae pɨtumimbía rupi,

añetete mbaetɨ güɨnoi mbaepuere,

echa yogüeru reta matɨ iyé güi

mano oikoa güi,

yepe oikoa rami aeño oke reta tei,

14ërei ouñoi chupe reta mbae iä yavaetegüe vae,

ani ramo opa jete täta reta jare opa jëogüe reta,

kɨɨye jeko pegua, güɨramoi peguaño vae

jare oyemongeta mbae jese vae, ou opa omoai aï reta.

15Jare jökorai opaete vae, oipota rupi ñogüɨnoia rupi,

oipɨɨ kia oyokenda tembipɨɨ rɨru jökembae vae pe:

16kó rupi oparavɨkɨ vae reta jare vecha iyangarekoa reta,

ani ramo oime jaeiño mbaravɨkɨ kaa rupi oyapo vae,

opaetei, güɨramoi peguaño, oiporara reta jókuae tembiporara,

mbaetɨ reve kia oasayepe chugüi,

echa pɨtumimbi opaetei oyovake oipɨɨ reta güɨnoi.

17Ɨvɨtu oyeendugüe vae,

güɨra iñee oyeendu ɨvɨra-räka rupi vae,

ɨ täta jɨapu oasa oï vae,

jare ita oagüe täta rupi oyeendu vae,

18jare mɨmba reta oyeecha mbae reve ochaguarepɨ vae,

yagua reta iñee oyeendu vae

ani ramo ɨ opüa kotɨ mbae oyeendu vae

täta opa oiämondo reta.

19Ïru vae ɨvɨ iyapɨ,

oyeesape oï tembipe tätagüe vae pe,

ipɨa güive oyapo reta ñogüɨnoi iparavɨkɨ;

20jae Egiptoɨgua reta reño ou oï pɨtumimbi tätagüe vae,

mbae iä pɨtumimbi rupigua vae oata oï vae;

chupegua reta

pɨtumimbi vaeño ma ikaviä ye ma oyapo güɨnoi.