PROVERBIOS 16 - Guarani Bible with DC

1Kuimbae, oyemongeta mbae oyapo vaerä;

ërei yandeYa ko jeita, jókuae yemongeta oyembopo vaerä.

2Kuimbae pe, ikaviecha opaete mbae oyapo vae,

ërei yandeYa ko oikuaa, opaete mbae oyeapo vae.

3Opaete mbae reyapota vae, eñono yandeYa ipo pe,

jayave, oë kavita ndeve opaete ndeyemongeta reta.

4Opaete mbaembae yandeYa oyapo, jökoraiño mai ou vaerä,

iyoa vae ave oyapo, tembiporara iara peguarä.

5YandeYa pe ikaviä yae ko, opaete ipɨayemboete vae,

ngaraai opɨta oiporarambae.

6Mboroparareko jare añetete vae rupi, iyoa vae pe oime ñɨ̈ro;

yandeYa güi yaipoɨu vae rupi ko, yasɨrɨ ikavimbae güi.

7Kuimbae, jeko kavi rupi omboyerovia yandeYa yave,

jovaicho reta ave jae ombopɨakatuta chupe.

8Michi yae omongana jupi rupi vae, ikavi yae ko,

jeta omongana jupimbae reve vae güi.

9Kuimbae oyemongeta mbae oyapo vaerä,

ërei yandeYa ko jei, kërai oiko vaerä.

10Mburuvicha guasu, jei añete vae Tumpa jee re,

mbaetɨ oporojäa jupimbae rupi.

11Oñejäa kavi oñemee mbae vae,

jare mbaejäaka jupi vae, yandeYa güi ko ou;

opaete mbae oñejäa oñemee pɨpe vae, jae etei ko oñono.

12Ikaviä yae ko mburuvicha guasu reta oyapo vaerä jaekavimbae,

echa jupi vae rupi ko oñemomɨ̈rata mborookuaía.

13Mburuvicha guasu reta, oaɨu jare omboyerovia

jókuae jupi rupi imiari vae.

14Mburuvicha guasu iyarasɨ yave, oime mano,

ërei kuimbae yarakuaa vae, omoröɨsa.

15Mburuvicha guasu oyerovia yave, oime tekove,

jare ipɨa kavi, ama taɨkuegua rami ko.

16Arakuaa ko ikavi yae, oro ñanoi vae güi;

jare arakuaa katu, korepoti güi.

17Jupi vae reta jeko, jae ko osɨrɨ vaerä ikavimbae güi;

oyangareko jeko re vae, jekove re ko oyangareko.

18Oime susere, pɨ ayembotuich oime ramo;

oime tembiporara, pɨayemboete oime ramo.

19Ikavi yae ko ñañemomichi vaerä paravete vae reta ndive,

ipɨapochɨ vae reta ndive mbae oñepɨ̈rogüe yamboyao vae güi.

20Iñee reendu vae, oiko kavita.

¡Oyerovia ko yandeYa reño oyeko vae!

21Iyarakuaa vae, jae ko yarakuaa katu vae;

ñee yeaeä, omoïru arakuaa katu.

22Iyarakuaa katu vae pe, arakuaa tekove katu ko;

yarakuaa vae reta iyarakuaa, mbaeä etei ko.

23Iyarakuaa vae, oyeandu reve imiari,

iñee yeaeä vae, omoïru iyarakuaa katu.

24Ñee yeaeä, ei rami ko,

oporombovɨakatu jare oporomoingove katu.

25Oime tape ikaviecha kuimbae pe vae;

ërei tape kañɨtei kotɨ ojo vae ko.

26Oparavɨkɨ vae, iyeupeguarä ko oparavɨkɨ;

okaru vaerä ko oparavɨkɨ.

27Kuimbae ipɨapochɨ vae, oeka oyapo vaerä ikavimbae,

¡iñee reta etei, tata jendɨ rami ko!

28Kuimbae ipɨapochɨ vae, oporomoñoraro katu;

indaye pota vae, omboyovaichouka oyoupii ovɨa oyoe reta vae ave.

29Kuimbae ipɨarai vae, iñee añetegüe nunga japicha pe,

jare oyapouka chupe teko ikavimbae.

30Osapɨmi etei oyemongeta ikavimbae oyapo vaerä;

oyeembesuu etei jókuae ikavimbae oyapo ma yave.

31Indechi vae imboetea ko, jupi rupi oiko jeko pegua.

32Iyarasɨ raivimbae, ikavi yae ko jëia yae vae güi;

jare oyembopɨaguasu vae, ikavi yae ko tëta guasu opɨ̈ro vae güi.

33Kuimbae oyapo iyeupe suerte,

ërei yandeYa ko jeita, opaete yemongeta oyeapo vaerä.