DANIEL 6 - Guarani Bible with DC

Daniel yaguapope reta jɨru pe

1Darío pe jaekavi yae oñono vaerä ciento veinte ɨvɨ iyangarekoa reta, oyangareko reta vaerä opaete jae iporookuaía rupi.

2Jare kuae reta re omae vaerä ñogüɨnoita mboapɨ mburuvicha reta; metei ko jae Daniel; chupe reta jókuae ɨvɨ iyangarekoa reta imiarita iparavɨkɨ re, agüɨye vaerä mburuvicha guasu güɨnoi mbae nunga mbaemboavai.

3Ërei Daniel etei oyapɨraa arakuaa katu pe kuae ɨvɨ iyangarekoa reta jare ɨvɨ ruvicha reta, echa oime jese arakuaa katu yae; jáeramo mburuvicha guasu oyemongeta oñono vaerä opaete jae iporookuaía re.

4Jayave ɨvɨ ruvicha reta jare ɨvɨ iyangarekoa reta oeka tëi kërai omboeko vaerä Daniel iparavɨkɨ rupi; ërei ngatu mbaetɨ ipuere reta oväe mbae nunga teko ani mbaeyavɨ jese, echa jae ko jupi yae; mbaetɨ etei mbae imomora ani mbaeyavɨ oñeväe jese.

5Jayave jei jókuae kuimbae reta: “Ngaraa ñaväe kërai yamboeko vaerä kuae Daniel, jaeño ñaväeta yamboeko vaerä iTumpa iporookuaiño oyapo vae rupi.”

6Jayave kuae ɨvɨ ruvicha reta jare ɨvɨ iyangarekoa reta oyomboatɨ mburuvicha guasu jóvai, jare jei reta chupe:

—¡Mburuvicha guasu Darío, eikove katu aveiño!

7Opaete ɨvɨ ruvicha reta mborookuaía pegua, tëta ruvicha reta, ɨvɨ iyangarekoa reta, mburuvicha reta, sundaro ruvicha reta oyemongeta päve, reikuatía remoañete vaerä jare remoërakuauka metei ndeporookuai, agüɨye etei vaerä oyerure kuae güi treinta ara rupi mbae re oipotagüe ïru tumpa pe ani ïru kuimbae pe ndegüi, ërei kia nunga omboeteä kuae mborookuai vae toyeitɨ yaguapope reta jɨru pe.

8Añave mburuvicha guasu, emoañetete jare eikuatía nderee jese, agüɨye vaerä oyemboai, Media jare Persia pegua mborookuai oyemboaimbae vae rami.

9Javoi mburuvicha guasu Darío oikuatía jee jókuae mborookuai re jare agüɨyeta oyeapo vae re.

10Daniel oikuaa mburuvicha guasu oikuatía ko jee mborookuai re yave, oike jo pe jare oipea iventana Jerusalén1 R 8.44,48; Sal 5.7; 28.2; 138.2. kotɨ omae oï vae jare oyetavatɨka oyerure mboapɨ ye ara peSal 55.17. omee reve yasoropai Tumpa pe, oyapoñoi oiko rami.

11Jayave oyomboatɨ yogüeru jókuae kuimbae oeka omboeko vaerä vae reta, jare oipokou reta Daniel oyerure jare omoñera reve oï iTumpa.

12Jaema voi yogüɨraja reta mburuvicha guasu jóvai, jare omomiari reta mborookuai oyeapogüe re, jei reta:

—¿Oyeapoä pa mborookuai, agüɨye etei vaerä kia oyerure kuae treinta ara rupi oipotagüe ïru tumpa pe ani ïru kuimbae pe ndegüi, ërei kia nunga omboeteä kuae mborookuai vae oyeitɨ vaerä yaguapope reta jɨru pe?

Jare mburuvicha guasu jei:

—Añetete ko, Media jare Persia pegua mborookuai rami, ngaraa oyemboai.

13Jayave jei reta mburuvicha guasu pe:

—Daniel, tembipɨɨ reta Judá pegua iñemuña mbaetɨ ndemboete mburuvicha guasu, mbaetɨ omboete mborookuai reyapogüe; mase mboapɨ ye metei ara pe oyerure.

14Mburuvicha guasu oendu kuae regua yave ipɨatɨtɨ yae, jare oeka kërai oepɨ vaerä Daniel. Kuaraɨ oike regua oeka tëi kërai oepɨ vaerä.

15Ërei jókuae kuimbae reta yatɨ mburuvicha guasu re, jare jei reta chupe:

—Nemaendúa mburuvicha guasu, Media jare Persia pegua mborookuai ko, kërai ngaraa ipuere oyemboai oipotagüe mborookuai ani mbae oyeapo vaerä vae mburuvicha guasu oyapogüe.

16Jayave mburuvicha guasu omondo güeruruka Daniel oitɨ reta vaerä yaguapope reta jɨru pe yave, mburuvicha guasu jei Daniel pe:

—¡NeTumpa, jókuae reyeokuai avei chupe vae tandereepɨ!

17Jare güeru reta metei ita oñono ɨvɨkua jöke re; jare mburuvicha guasu omboyeɨ jese ipoäka-vera jare iyɨvɨrigua mburuvicha reta ipoäka-vera jókuae ita oñono reta vae re, agüɨye vaerä oime yembotavɨ Daniel kotɨ yemongeta oyeapo vae regua.

18Javoi mburuvicha guasu ojo jo pe, jare okarumbae oyapakua; tembiporu tairari pegua reta ave mbaetɨ oyereru jóvai; jare mbaetɨ etei jopeɨ.

19Jare ndeimboveasɨ mburuvicha guasu opüa jare jaema etei ojo yaguapope reta jɨru kotɨ.

20Jare oya ɨvɨkua re yave osapúkai, ipɨatɨtɨ reve oenɨi Daniel, jei:

—Daniel, Tumpa oikove vae jembiokuai, neTumpa reyeokuai avei chupe vae ¿ndereepɨ pa yaguapope reta güi?

21Jayave Daniel ombou iñee mburuvicha guasu pe, jei:

—¡Eikove katu avei mburuvicha guasu!

22CheTumpa ombou iaraɨgua, jae oyopia yaguapope retaHeb 11.33. iyuru, agüɨye vaerä maratu cheapo, echa jae jóvai mbaetɨ ko chereko; jare nderóvai ave mbaetɨ mbae ikavimbae ayapo mburuvicha guasu.

23Jayave mburuvicha guasu oyerovia oendu yave, jare oporookuai oñerenoe vaerä ɨvɨkua güi; jökorai güɨnoe reta Daniel ɨvɨkua güi jare mbaetɨ etei ipere, iTumpa re oyeko ramo.

24Jare mburuvicha guasu oporookuai, oyereru vaerä jókuae kuimbae reta omboeko Daniel vae, jare opa oitɨ reta yaguapope reta jɨru pe jae reta, taɨ reta jare jembireko reta; jare ndei ɨvɨkua jugua pe opa oa mbove, yaguapope reta oipɨɨ jare opa ikägüe reta omopüruru.

25Jayave mburuvicha guasu Darío oikuatía opaete vae tëta reta pe jare tëtaguasu reta pe jare ïru ñee pe imiari vae reta opaete ɨvɨ rupi ñogüɨnoi vae reta pe; oikuatía körai: “Mbɨakatu toñemoïru avei peve.

26Che poyókuai opaete cheporookuaía pe peï vae reta, opaete vae pemboete jare peipoɨu Daniel iTumpa güi.

Echa jae ko Tumpa oikove vae,

jekuae avei oiko vae.

Iporookuaía ngaraai oyemboai,

imbaepuere ngaraai iyapɨ ɨvɨ opa regua.

27Jae oporogüɨroasayepe jare oporoepɨ,

jae oyapo mɨakañɨ reta ara re jare ɨvɨ pe.

Jae ko oepɨ Daniel yaguapope reta iyuru güi.”

28Jare kuae Daniel pe oë kavi yae opaete oyapogüe Darío oiko yave mburuvicha guasurä, jökoraiño vi Ciro Persia pegua oiko mburuvicha guasurä yave.