NEHEMÍAS 5 - Guarani Bible with DC

Oyekuaa yemboavai reta

1Oyekuaa jeta ñeengeta opaete vae reta güi jare kuña reta güi jëtara judío reta kotɨ;

2amogüe reta jei: “Ore, oreraɨ reta jare orerayɨ reta ndive orereta ko; jáeramo, rombaeporu ko oreyeupe orerembiurä, agüɨye vaerä yɨmbɨaɨ oremboovaruru.”

3Amogüe reta jei: “Yɨmbɨaɨ jeko pegua roiporu ko korepoti oreɨvɨ regua, oreuvarupa regua, orero regua, rogua vaerä orerembiurä.”

4Amogüe reta jei: “Roiporu ko korepoti oreɨvɨ regua jare oreuvarupa regua, romboepɨ vaerä mburuvicha guasu peguarä oyekovara vae.” Jei reta vi:

5“Ore mbaetɨ ko ambuae vae orerëtara reta güi, oremichia reta mbaetɨ ko ambuae vae imichia reta güi; ërei, ore opa romee oreraɨ jare orerayɨ reta yogüɨreko vaerä tembiokuairä. Jare oime ma ko amogüe orerayɨ reta ñogüɨnoi jökorai, añave ore mbaetɨ orepuere mbae royapo, echa oreɨvɨ jare oreuvarupa reta ïru vae reta imbae ma ko.”

6Jare chearasɨ yae aendu yave kuae, jae reta iñeengeta vae.

7Jare ayemongeta kavi chepɨa pe kuaekuae re yave, amboeta imboetea vae reta pe jare mburuvicha reta pe, jae chupe reta: “¡Körai yepe pe reta peyapo perëtara reta!”Ex 22.25; Lv 25.35-37; Dt 23.19-20. Jare amboatɨuka opaete vae, oñemae vaerä kuaekuae re,

8jae chupe reta: “Ore orepuere rupi ko roepɨ ñanerëtara judío reta, ïru tëta pe opa oñemee vae güi; jare añave pe reta pemee ye peï, ore jekuae roepɨ ye kuri vaerä.”

Jare jae reta kïrii opɨta, mbaetɨ oikuaa mbae jei reta vaerä.

9Jare jae vi chupe reta: “Pe reta peyapo peï vae mbaetɨ ko ikavi. ¿Maera pa mbaetɨ peipoɨu ñaneTumpa güi, agüɨye vaerä opuka tovaicho reta yanderé?

10Che jare cherëtara reta, chemborɨ vae reta roiporuka vi ko korepoti jare trigo chupe reta; jare añave ¡ñaneɨ̈ro jókuae mbia re chupe reta!

11Jare che pomoñera pemee ye vaerä vi iɨvɨ chupe reta, iuvarupa, iɨvɨra olivorupa, jo reta, jare jókuae pekovara yeta tëi iárambo chupe reta mbae jäɨ re vae, vino re vae, asaite jepɨgüe re vae re agüɨye pekovara chupe reta.”

12Jare jei reta: “Opata romboyevɨ ye chupe reta, mbaetɨta mbae re rokovara chupe reta. Toroyapo nde rere rami kavi etei.”

Jayave amboatɨuka opaete sacerdote reta. Jare jókuae sacerdote reta jóvai ayókuai, jei reta vaerä Tumpa rovake, tenonde yave jeigüe.

13Jare amotumo vi cheremimonde, jare jae: “Körai Tumpa tomotumo jo güi jare imbaembae güi jókuae kuimbae mbaetɨ ombopo iñee vae, jökorai topa topɨ̈ro chugüi mbaembae güɨnoigüe.” Jare opaete vae jei: “¡Jökorai toiko!” Jare omboete reta yandeYa.

Nehemías ipɨakavi

Jare opaete vae reta ombopo iñee,

14jare mburuvicha guasu cheparavo ɨvɨ Judá pegua mburuvicharä yave güive, doce año rupi, che jare chemborɨa reta mbaetɨ roeka mbaembae opaete vae reta pe, omee vaerä oreve, jae reta omeeñoi mburuvicha peguarä vae; mburuvicha guasu Artajerjes veintea año ma oiko mburuvicharä yave güive año treinta y dos pe regua.

15Ërei ïru mburuvicha reta tenonde yogüɨreko chegüi vae, oiporarauka opaete vae reta pe, echa ara ñavo okovara reta okaru jare okau vaerä cuarenta reare korepoti pegua, jare jembiokuai reta ave oiporarauka opaete vae reta pe. Ërei che mbaetɨ ayapo jókuae, aipoɨu ramo Tumpa güi.

16Ïru mbae ye jae ko, che aparavɨkɨ vi amopüa ye vaerä tëta guasu ikësea; mbaetɨ rogua ɨvɨ. Cheɨvɨrigua reta opaete oyapo vi jókuae mbaravɨkɨ.

17Amongaruuka ciento cincuenta judío reta, jare mburuvicha reta, jare vi yogüeru orépɨri ïru tëtaguasu kotɨ güi vae reta.

18Ara ñavo ayukauka metei güeye, ova vecha oyeparavogüe, jare uru; jare payandepo ara ñavo oime jetagüe vino. Ërei jeseve mbaetɨi aeka opaete vae reta pe omeeta tëi cheve vae, echa kuae tëta oiporara yae ma.

19¡Agüɨye neakañɨ chegüi cheRu Tumpa! ¡Jare agüɨye vi neakañɨ opaete kuae tëta kotɨ ayapo vae güi!