ISAÍAS 19 - Guarani Bible with DC

Tëtaguasu Egipto maratuta vae regua

1Tëtaguasu EgiptoJer 46.2-26; Ez 29.1—32.32. maratuta vae regua:

Mase, yandeYa ou Egipto pe amapɨtu iñäkua yae vae re.

Tumpa-raanga reta Egipto pegua orɨrɨi oecha yave,

jare Egiptoɨgua reta ipɨa mano jóvai.

2“Egiptoɨgua reta amoñoraroukata oyoupii:

Metei ñavo oñorarota jëtara ndive,

metei ñavo oñorarota japicha ndive,

metei tëta guasu opüata ïru tëta guasu re,

metei mborookuaía opüata ïru mborookuaía re.

3Amombokereta,

arokomeguata iyemongeta chugüi.

Jare oparanduta itumpa-raanga reta pe, jare imbaekuaa vae reta pe,

omano ma vae jekovegüe reta pe, jare mbae maratuta vae imombeúa reta pe.

4Ameeta Egipto, metei mburuvicha imbaeyuvanga yae vae pe,

mburuvicha guasu ipïrimbae vae oñeñonota juvicharä.”

Jökorai jei yandeYa Imbaepuere yae ete vae.

5Ɨguasu opata tɨpa,

iɨ̈aka opata vi tɨpa,

6ɨ̈aka opata tɨpa,

ɨ̈aka raɨ reta opata mbegüe mbegüe pe tɨpa ojo oiko,

jare jembeɨ rupi ñogüɨnoi käipepe reta vae opata yɨpi;

7ɨ̈aka jembeɨ rupigua ñana reta,

jare opaete temitɨ reta ñogüɨnoi ɨ̈aka jembeɨ rupi vae,

opata ipiru jare okañɨtei.

8Jare opaete jókuae ɨ̈aka rupi pira iyukaa reta,

ipɨatɨtɨta jare oyaeota;

ipɨatɨtɨta opaete jokoropi opindapo vae reta jare vi oyeporakase vae reta.

9Lino imboɨvía reta ipɨtuta,

jare vi pɨsa iyapoa reta,

10echa opata ipɨsa reta osoro,

pira imoñemuñaka oyapo vae reta, ipɨatɨtɨta.

11¡Mbaetɨ ko iyarakuaa Zoán pegua mburuvicha reta,

opa oikomegua Faraón omboarakuaase vae reta iyarakuaa!

¿Maera pa jei reta Faraón pe:

“Iyarakuaa katu vae reta iñemuña ko ore,

arakae vae mburuvicha guasu reta iñemuñagüe ko ore”?

12¿Jama pa jókuae iyarakuaa katu vae reta?,

tei reta ndeve añave, tomombeu reta ndeve,

mbae ra yandeYa Imbaepuere yae ete vae oyemongeta Egipto kotɨ vae.

13Mbaetɨ iyarakuaa Zoán pegua mburuvicha reta,

opa itavɨ Menfis pegua mburuvicha reta;

jae reta güɨraja jëtaguasu Egipto

tape jupimbae vae rupi.

14YandeYa oñono jese reta, ipɨa jopa vaerä;

jae reta güɨraja Egipto tape jupimbae vae rupi,

opaete mbaembae oyapogüe rupi,

metei osavaɨpogüe ogüëe yave mbaetɨ oguata kavi rami.

15Mbaetɨta ma kia ave ipuere mbae oyapo Egipto re.

Ngaraa äka yepe ani túguai yepe,

karandaɨ yepe ani käipepe yepe ipuere omborɨ.

16Jókuae ara Egiptoɨgua reta, kuña reta ramiñota, okɨɨye retata oecha yave yandeYa Imbaepuere yae ete vae omopüa ipo ikotɨ reta.

17Egiptoɨgua reta okɨɨyeta Judáɨgua reta güi; imaendúa jese reta yave ave okɨɨyeta, jókuae yandeYa Imbaepuere yae ete vae oyemongeta oyapo vaerä Egipto kotɨ vae güi.

18Jókuae ara rupi oimeta pandepo tëta guasu reta Egipto pe imiari reta ñee hebreo pe vae jare omboete retata yandeYa Imbaepuere yae ete vae; metei tëta guasu jeeta Herez.

19Jókuae ara rupi oyeapota ɨvɨ Egipto pe mɨmba oyeyuka oyeapɨ jese vae yandeYa peguarä, jare jókuae ɨvɨ jembeɨ pe oñemopüata metei ita yandeYa jee re.

20Jókuae oïta ikañɨmaa vaerä jare oporomomaendúa vaerä yandeYa Imbaepuere yae ete vae re, ɨvɨ Egipto pe. Osapúkai reta yandeYa pe oiporarauka chupe reta vae jeko pegua yave, jae ombouta metei mburuvicha oporoepɨ vae chupe reta, oepɨ vaerä jare oyora vaerä.

21YandeYa oyekuaaukata Egiptoɨgua reta pe, jae reta oikuaata jare omboeteta, omeeta chupe mɨmba oyeyukagüe jare mbota. Oñererökuavee retata yandeYa pe jare ombopo retata iñee chupe.

22YandeYa ombopereta Egipto, ërei jaɨkue rupi ombogüerata. Jae reta oyerovata yandeYa kotɨ, jare jae oipararekota omae jese reta jare ombogüerata.

23Jókuae ara oimeta tape tuicha vae ojo Egipto güi Asiria kotɨ vae. Asiriaɨgua reta yogüɨrajata oväe Egipto pe jare Egiptoɨgua reta Asiria pe; jare jae reta omboete päveta yandeYa.

24Jókuae ara rupi tëtaguasu Israel oïta vi Egipto jare Asiria ndive; jare Israel rupi oimeta mborerekua opaete ɨvɨ pegua reta pe.Gn 12.3.

25Echa yandeYa Imbaepuere yae ete vae iporerekuata jese reta jei reve: “Cheporerekua Egipto tëta chembae re, Asiria cherembiapo re, Israel tëta chembae aeño vae re.”