2 SAMUEL 9 - Guarani Bible with DC

David iporoparareko Mefi-boset kotɨ

1Metei ara David oparandu: “¿Oime pa kia jembɨre Saúl iñemuña reta güi, che anoi vaerä mboroparareko ikotɨ, Jonatán aaɨu jeko pegua?”

2Jare oiko metei Saúl jembiokuaigüe Siba jee vae; jae oenɨi reta ou vaerä David pɨri. Ou yave, mburuvicha guasu jei chupe:

—¿Jae pa nde Siba?

Jare jae jei:

—Jae ko che.

3Jayave mburuvicha guasu oparandu chupe:

—¿Mbaetɨ pa kia jembɨre Saúl iñemuña reta güi, che anoi vaerä mboroparareko jese Tumpa jee re?

Jare Siba jei chupe:

—Oime jembɨre metei Jonatán taɨ, jae ko oguatambae.

4Jayave mburuvicha guasu David oparandu:

—¿Kia pe pa oime oï?

Jare Siba jei:

—Oime oï Lodebar pe, Maquir, Amiel taɨ jo pe.

5Jayave mburuvicha guasu David omondo güeruruka joko güi;

6jare Mefi-boset, Saúl jɨmɨmino ou ma oväe David oïa pe yave, oyetavatɨka itindɨasɨ ɨvɨ re omboete reve.

—Mefi-boset —jei David.

—¡Ko aï! —jei jae.

7Jare David jei chupe:

—Agüɨye ekɨɨye, echa che anoita mboroparareko ndekotɨ nderu Jonatán jeko pegua. Opata amboyevɨ ye ndeve opaete neramɨigüe Saúl iɨvɨ; jare nde rekaru aveita che ndive.

8Ërei jae itindɨ jare jei:

—¿Kia pa che nemaendúa vaerä cheré? Che ko metei yaɨmba jëogüegüe ramiño.

9Ërei mburuvicha guasu oenɨi Siba, Saúl jembiokuaigüe, jare jei chupe:

—Ndeyagüe Saúl jare iñemuñagüe reta imbaembae opa amee kuae jɨmɨminogüe pe.

10Jáeramo, añave, nde, nderaɨ reta jare nderembiokuai reta ndive pemaetɨ chupe jare pemboɨru chupe mbaagüɨye, ndeya iñemuña reta güɨnoi vaerä tembíu, ërei Mefi-boset ndeyagüe jɨmɨmino okaru aveita che ndive.

Siba güɨnoi quince taɨ jare veinte jembiokuai.

11Jei mburuvicha guasu pe:

—Opaete reporookuai vae oyeapota ko cheruvicha guasu.

Jare Mefi-boset okaru avei oiko David ndive, taɨ reta rami.

12Mefi-boset oime metei taɨ michia, Micaía jee. Opaete Siba jo pegua reta yogüɨreko Mefi-boset jembiokuairä.

13Ërei Mefi-boset oguatambae, oiko Jerusalén pe, echa okaru avei oiko mburuvicha guasu ndive.