1 JUAN 2 - Guarani Bible with DC

Cristo oñemoe yanderé vae

1Cheraɨ aaɨu vae reta, aikuatía kuae mbaembae regua peve agüɨye vaerä peyoa.Ro 6.11-14. Ërei kia nunga vae iyoa yave, oime ñanoi oñemoe vaerä yanderé yandeRu Tumpa jóvai vae, jae ko Jesucristo jupi vae.

2Jae imano rupi Tumpa iñɨ̈ro yandeve yandeyoa reta re;1 Jn 4.10. ërei mbaetɨ yandeyoa reño, opaete ɨvɨ pegua reta iyoa reta re vi ko.

3Tumpa iporookuai reta yayapo yave, jókuae rupi ko oyekuaa yaikuaa kavi ko Tumpa vae.Jn 14.15,21,23.

4Oime yave kia “aikuaa ko Jesucristo”, jei vae, ërei mbaetɨ yave oyapo Jesucristo iporookuai reta, jókuae iyapu ko, mbaetɨ etei ko oï jese añete vae.

5Ërei Jesucristo jei vae oyapo vae Tumpa iporoaɨu okuakuaa ko jese. Jókuae rupi yaikuaa yande ko ñaï jese.

6Oime yave kia “che ko jae Cristo imbae”, jei vae, toiko kavi jae oiko rami.

Mborookuai ipɨau vae

7Cherɨvɨ reta, kuae aikuatía aï peve vae mbaetɨ ko mborookuai ipɨau. Jaeño mborookuai indechi vae iyɨpɨ güive peikuaa vae. Kuae mborookuai indechi vae ko jae ñee peendu iyɨpɨ güive vae.

8Ërei aikuatía peve mborookuai ipɨau vae,Jn 13.34; 15.12. jae ko oï añetete Cristo re jare peré vi. Echa pɨtumimbi oasa ojo oiko jare tembipe añetete vae jembipe ma ou.

9Oime yave kia “che aiko tembipe pe”Ro 13.12-14. jei vae, ërei omotareɨ yave ïru oporogüɨrovia vae, oiko vɨteri ko pɨtumimbi pe.

10Kia oaɨu ïru oporogüɨrovia vae, jae oiko ko tembipe pe, mbaetɨ ipuere oyepɨaka mbae re.

11Ërei omotareɨ ïru oporogüɨrovia vae, oï ko pɨtumimbi pe. Oiko pɨtumimbi pe, mbaetɨ ko oikuaa ketɨ ra ojo vae, echa pɨtumimbi omboesaä.

12Cheraɨ aaɨu vae reta, aikuatía körai peve, echa Tumpa iñɨ̈ro ko peve peyoa reta re jee re.

13Tenondegua reta, aikuatía körai peve, echa peikuaa oimeño mai oiko ndei ɨvɨ oyeapo mbove vae. Taɨrusu reta, aikuatía körai peve pemoamɨri aña guasu ramo. Cheraɨ aaɨu vae reta, aikuatía körai peve, peikuaa yandeRu ramo.

14Tenondegua reta, aikuatía körai peve, echa peikuaa oimeño mai oiko ndei ɨvɨ oyeapo mbove vae. Taɨrusu reta, aikuatía körai peve, echa pepɨ̈rata, jare Tumpa iñee oiko peré jare pemoamɨri aña guasu.

15Agüɨye peaɨu kuae ɨvɨ, ani mbaembae ɨvɨ pegua. Oime yave kia kuae ɨvɨ oaɨu vae, mbaetɨ ko oaɨu Tumpa; Stg 1.27.

16echa opaete mbaembae oime ɨvɨ pe vae, soo jemimbota reta, mbaembae ipöra vae reta yaecha vae jare yemboete mbaeyekou regua mbaetɨ ko ou yandeRu güi, ou ko ɨvɨ güi.

17Ërei kuae ɨvɨ opata ko, jare opaete mbaembae yaipota vae pɨpegua, ërei Tumpa jemimbota oyapo vae oikota jekuae avei rupi.

Cristo re oyemboyovaicho vae

18Cheraɨ aaɨu vae reta, oväe ara taɨkuegua. Peendu kërai Cristo re oyemboyovaicho vae oime ou, ërei añave oime ñogüɨnoi jeta Cristo re oyemboyovaicho vae reta. Jáeramo yaikuaa ou ma ko oväe ara taɨkuegua.

19Jae reta oë yandegüi, mbaetɨ añetete oñemoïru yande ndive ramo. Echa añetete oñemoïru yande ndive yave oimeñota tëi yogüɨreko yande ndive. Ërei oë reta yandegüi, oyekuaa vaerä opa reveä ko ñaneïru vae.

20Ërei Cristo peñeñono tee ma Espíritu Santo rupi, jáeramo pe reta peikuaa opaete.1 Co 2.10-16.

21Mbaetɨ ko aikuatía peve añete vae mbaetɨ peikuaa ramo, aikuatía ko peve peikuaa ramo. Jare pe reta peikuaa ko añete vae güi ngaraa etei oë apu.

22Oime yave kia “Jesús jaeä ko Cristo” jei vae, jae ko iyapu vae. Oime yave kia mbaetɨ güɨrovia yandeRu Tumpa jare Taɨ re vae, jae ko Cristo re oyemboyovaicho vae.

23Oime yave kia mbaetɨ güɨrovia Tumpa Taɨ re vae, mbaetɨ ko güɨrovia yandeRu Tumpa. Ërei güɨrovia Tumpa Taɨ re vae, güɨrovia vi ko yandeRu Tumpa re.

24Iyɨpɨ güive peendu vae, peñovatu pepɨa pe. Echa jökorai yave, peiko aveita Tumpa Taɨ re jare yandeRu Tumpa re.

25Jare Jesucristo güɨrökuavee yandeve vae ko jae tekove opambae.

26Körai aikuatía ma peve, oipota pembotavɨ vae reta regua.

27Ërei Tumpa omee ma peve Espíritu Santo vae oiko pepɨa pe. Jáeramo mbaetɨ ma kia ipuere pemboe ye vaerä, echa Espíritu Santo etei pemboe opaete mbaembae re, jare añetete ko, mbaetɨ apu; jae pemboe rami peiko avei Jesucristo re.

28Añave, cheraɨ poaɨu vae reta, peiko avei jese, jökorai jae ou ye yave ñaïta jae jóvai yayerovia reve, agüɨye vaerä ñanemara ñañoövaiti jae ndive yave.

29Peikuaa Tumpa ko jae jupi vae yave, peikuaa vi kërai Tumpa omee ma tekove opambae vae opaete jupi vae oyapo vae reta pe.