ISAÍAS 1 - Guarani Bible with DC

Tëtaguasu iyoa vae

1Isaías, Amoz taɨ oechagüe; jae oecha Judá jare Jerusalén regua, Uzías iara pe,

4¡Paravete, iyoa vae reta,

tëta tɨnɨe ikavimbae pe vae,

ipɨapochɨ vae reta iñemuña,

jare jeko opa oikomeguagüe reta!

Oyembosɨrɨ reta yandeYa güi,

omboarasɨuka reta Iyoambae Israel pegua,

oyerova reta ye chugüi.

5¿Maera pa jekuaeñoi peipota peiporara?

¿Jekuaeñota pa peyembopɨapochɨ?

Opaetei peäka imbaerasɨ oï,

jare opaetei pepɨa pe peiporara peï.

6Pepɨ mbɨte güive peäka kotɨ

mbaetɨ ikavi, ipere oï, iruru oï, ichuumbi pepere;

mbaetɨ oñepoano, mbaetɨ oyeokua, mbaetɨ vi oñepoano olivo iasaite pe.

7Peɨvɨ reta opa opɨta ipombae,

perëta guasu reta opa oyeapɨ,

ketɨgua reta perovakei opa jou peremitɨ,

tovaicho reta opa omboai oeya rami oï perëta.

8Jare jaeño opɨta Sión,

uvarupa pe tapɨi oï rami,

jare melon-rupa pe o raɨ oï rami,

tëta guasu, tovaicho opa omboaigüe rami.

9Ërei yandeYa Imbaepuere yae ete vae

mbaetɨ yave mona oeya mbovɨ yepe yandeve ñemuña,

Sodoma jare Gomorra pegua, peendu yandeYa iñee;

mburuvicha reta Gomorra pegua,

peyeapɨsaka ñaneTumpa iporookuai re.

11YandeYa jei:

“¿Jeta mɨmba oyeyukagüe pemee vae, mbae ra pa ikavita cheve?

Chembogüérai ma mbota vecha kuimbae reta oyeyukagüe opaetei oyeapɨ vae,

jare mɨmba ikɨragüe;

toro reta, vecha kuimbae reta jare kavara kuimbae reta jugüɨgüe mbaetɨ ma aipota.

12¿Kia pa jei peve peru vaerä kuae reta,

peru vaerä cheróvai jare pepɨ̈ro cheroka pe?

13Agüɨye mo peru raangaiño mbota cheve;

ikäti kavi vae incienso pɨ̈chɨi yae ko cheve;

arete reta yasɨ pɨau jare ara mbutuu iara,

peyomombarandu peyomboatɨ vae mbaetɨ chepuere aropɨa;

pearete reta ikavi yae peyapo vae, ikaviä yae ko cheve.

14Amotareɨ yae ko pegüi arete reta yasɨ pɨau

jare pearete reta ikavi yae peyapo vae,

mbaetɨ etei ko ipöra cheve; chekuérai ma aropɨa.

15Pepo peupi peyerure yave,

ngaraa amae peré;

yepe tëi jeta peyerure, che ngaraa aendu.

Pepo reta tugüɨ yepeai penoi.

16¡Peyeyoe jare peyetɨo!

¡Pembosɨrɨ peyeugüi ikavimbae peyapo cheresa róvai rupi vae!

¡Agüɨye mo peyapo ikavimbae!

17¡Peyemboe mo peyapo ikavi vae;

peeka peyapo vaerä jupi vae,

peyapo mo ikavi vae, oiporara yae vae reta pe,

peyapo jupi vae tɨ̈reɨ reta pe, peepɨ imemano vae reta!”

18YandeYa jei:

“Peyu yayoaka.

Yepe tëi peyoa reta pɨ̈taasɨ yae,

ërei amotïasɨta iroɨ rami;

ani temimonderä vae pɨ̈taasɨ vae rami yave,

vecharaa tïi vae rami amotïasɨta;

19pekɨ̈reɨ yave jare peendu yave,

peuta ɨvɨ omee mbaagüɨye kavi vae;

20ërei ngatu mbaetɨ yave pekɨ̈reɨ, jare peyembopɨapochɨ chekotɨ yave,

opata ko pemano ñeraroa pe.”

Echa yandeYa etei ko jei jökorai.

YandeYa ojäa jare oepɨ Jerusalén

21¡Tëta guasu jupi vae!

¿Këraiägua pa reyu repɨta metei kuña iyaguasa pota vae rami?

Yepi, jeta kuae pe jupi vae reta

jare jeko kavi vae reta,

ërei añave jaeño ma oñeväe kuae pe oporoyuka vae reta.

22Ndekorepoti opa opɨta ɨtɨ ramiño,

ndevino kavi opa opɨta vino oyeagüe ramiño.

23Nderuvicha reta, oyapota tëi vae, mbaetɨ oyapo reta,

imonda vae reta ndive oñemoïru reta.

Omomora yae reta mbae oyemboepɨ vɨari chupe reta vae,

oeka reta kia omee vaerä mbota chupe reta.

Mbaetɨ oyapo reta jupi vae tɨ̈reɨ pe,

imemano vae iñeapo re, mbaetɨ omborɨ reta.

24Jáeramo, yandeYa Imbaepuere yae ete vae, Imbaepuere yae vae Israel pegua jei:

“¡Joko peño mo! Tañono kavi teko oyemboyovaicho chekotɨ vae reta ndive.

Tayepɨ jese reta.

25Amopüa yeta chepo ndekotɨ,

opata aekɨ ndekɨa;

rotɨota opaete ndekɨa güi.

26Amopüa yeta mburuvicha oporojäa vae reta, oime ye vaerä tenonde yave rami,

jare oporomboarakuaa vae reta tenonde yave rami.

Jayave nereenɨi reta yeta

‘Tëta guasu jupi vae jenda’, ‘Tëta guasu jupi vae’.

27Sión oyeyora yeta morojäa rupi,

jare oyerova ye chekotɨ vae reta oyeyorata jupi rupi;

28ërei oyembopɨapochɨ chekotɨ vae reta jare iyoa vae reta opata oñemokañɨtei,

jare oyembosɨrɨ chegüi vae reta opata omano.

29Jayave pemarata ɨvɨra encina jee vae reta güi jare ko raɨ reta güi,

jókuae pemomora yae

igüɨ rupi pemboete tumpa-raanga reta vae.

30Echa pe reta peikota ɨvɨra encina ipiru vae rami,

metei ko raɨ mbaetɨ oyemboɨu vae rami.

31Kuimbae imbaepuere vae mbae javiyugüe ramiñota,

jare jembiapo reta tatapiriri ramiñota;

mókoi reve voi jendɨta

jare mbaetɨta kia ombogüe vaerä.”