ECLESIÁSTICO 7 - Guarani Bible with DC

Mbaepotarai jovaicho

1Agüɨye eyapo ikavimbae, jaema ikavimbae ngaraa vi nderupitɨ.

2Esɨrɨ mbaeyoa güi, jare jae osɨrɨta vi ndegüi.

3Agüɨye emaetɨ ɨvɨ oyeai kavimbae rupi,

neäteɨ rearɨvo chugüi chiu yoapɨ ye yave.

4Agüɨye eiporu Tumpa pe metei tenda mborookuai pegua,

mburuvicha guasu pe ave metei tenda yemboete pegua.

5Agüɨye eipota enoi yembojupi Tumpa jóvai,

jare reyemboarakuaa katu mburuvicha guasu jóvai.

6Agüɨye eipotarai renoi vaerä mbaepuere,

ndepuere potaä reeya yembotuicha yave.

Echa rekɨɨyeta oikokatu vae reta jóvai

jare remeeta korepoti re ndeporomboete.

7Agüɨye eyemboeko tëta iyemboatɨ jóvai,

jare agüɨye eñemomichi jeta vae jóvai.

8Agüɨye embojeiete ndembaeyoa remondoyoapɨ,

echa metei ndive jaekavi ma reñenupa vaerä.

9Agüɨye ere: “Tumpa omaeta ko che oporombopota jeta vae re;

aechauka chupe yave, Tumpa oipɨɨta ko chegüi.”

10Agüɨye ndeandeko reyerure yave,

agüɨye ndeapɨ emee mbota.

11Agüɨye epuka ipɨatɨtɨ oï vae re;

nemaendúa oime metei oporombotuicha vae jare oporomomichi vae.

12Agüɨye yoyuka re eyemongeta nerëtara kotɨ,

jare vi nechëi vae kotɨ ani ramo neïru re.

13Agüɨye eyandu ikavi rere vaerä apu yoapɨa pe,

echa jókuae güeruta ndeve iyapɨ ikavimbae vae.

14Agüɨye eyemoinge oporookuai vae reta iyemboatɨa pe,

jare agüɨye ñee emboaɨkuere reyerure yave.

15Agüɨye ndepɨakatúä reve eyapo tembiapo ndepo pegua,

echa Tumpa ko oyapo.

16Agüɨye eyemotenonde ïru vae reta güi,

nemaendúa katu Tumpa ngaraa oäro oporonupa vaerä.

17Emomichi yeyé ndeyembotuicha,

echa kuimbae oäro güɨnoi taso reta.

Agüɨye ere yeyé mbatee ndeyerure pe;

eñemee Tumpa pe jare eipɨɨ jae jeigüe vae.

Kërai yaiko vaerä kia oipotagüe ndive

18Agüɨye eipoepɨ metei ñochëi korepoti re,

jare metei tëtara reaɨu vae oro ikavigüe re.

19Agüɨye eröɨro metei kuña yarakuaa katu vae;

echa jae jeko ae má ko jepɨ ita ipöra yae vae reta güi.

20Agüɨye einupa tembiokuai iparavɨkɨ oyapo oï vae,

jare mbaravɨkɨ regua oyemoambeko iparavɨkɨ pe vae.

21Eaɨu nde reyeaɨu rami tembiau iyarakuaa katu vae,

jare agüɨye eikuaku chugüi yeyora.

22Oime rereko mɨmba reta yave, emae kavi jese,

jare oyeokuai kavi ndeve yave, ereko ndeyé.

23Oime nemichia reta yave, emboe reta,

jare eeka jembirekorä taɨrusu ñogüɨnoi ramboeve.

24Oime nderayɨ reta yave, emae jese reta toporomboete,

jare agüɨye ndepɨakúe katu jae reta ndive.

25Yamomenda metei yanderayɨ yave jae ko ñae yemoambeko reta güi,

ërei oipotata ko ñamee metei kuimbae iyarakuaa vae pe.

26Oime nderembireko yave, eaɨu,

ërei reaɨuä yave, agüɨye erovia jese.

27Opaete ndepɨa reve emboete nderu,

jare agüɨye neakañɨ ndesɨ täta ko oiporara vae.

28Nemaendúa chugüi reta ko rea.

¿Këraita pa ko remboepɨ oyapo reta ndeve vae?

29Opaete ndepɨa ndive emboete Tumpa,

jare peyangareko yomboete ndive pesacerdote reta re.

30Eaɨu opaete nepɨ̈rata ndive ndeApoa,

jare agüɨye eeya nderembiokuai reta.

31Emboete Tumpa, emboete sacerdote reta,

emee chupe imbae, mborookuai oï rami;

mbɨyape, guaka oyeapiogüe, mbota reta pɨakavi pegua,

mbota oyeapɨgüe oyeeka vae jare mbota ikɨambae vae.

32Ndepɨakavi paravete vae ndive,

Tumpa ndemboyekou ete kavi vaerä.

33Ndepɨakavi opaete oikove oï vae reta ndive,

jare agüɨye neakañɨ eechauka mboroaɨu añetegüe vae omanogüe reta pe.

34Agüɨye eäro remborɨ vaerä oyaeo vae,

jare ndepɨatɨtɨ ipɨatɨtɨ oï vae ndive.

35Agüɨye emaeiño imbaerasɨ vae re,

jaema jae nderaɨuta ko.

36Opaete reyapogüe rupi eyemongeta iyapɨ re,

jare ngaraa ndeyoa.