JOB 28 - Guarani Bible with DC

Kuimbae oeka arakuaa katu

1Añete, korepoti oime jenda ɨvɨgüɨ pe,

oro oime kia pe oyembokavi vaerä.

2Jiero oyeekɨ ɨvɨ güi,

jiero iyu vae oyeapo ita oyemondɨkui vae güi.

3Kuimbae reta omboesape pɨtumimbi yae vae reta,

ogüeyɨ reta ɨ́vɨkotɨ pɨtumimbi yaea pe,

jare joko pe oeka ita reta.

4Oyoo reta korepoti jenda,

mbaetɨ kia ojo oväea pe mombɨrɨ tëta guasu reta güi,

oyembosagüɨu tɨmasa pe ogüeyɨ joko pe.

5Ɨvɨ iarambogua ete omoñemuña tembíu,

ërei igüɨ kotɨ güɨnoi tata rami.

6Joko pe oï ita reta zafiro jee vae,

jare ikuigüe reta oro yepeai.

7Güɨraké reta ani uruapúa reta ave,

mbaetɨ oikuaa ani oecha jókuae jenda.

8Mɨmba pochɨ vae mbaetɨ oguata jokoropi,

yaguapope ave mbaetɨ oasa jokoropi.

9Kuimbae reta oyavɨkɨ ita reta,

omokana ɨvɨtɨ guasu reta.

10Omombu reta ɨ̈vavira,

jare oväe reta oipotagüe mbae jepɨ vae.

11Oyopia reta ɨ̈aka, oyemboɨpɨa pe,

jare omboyekuaa reta oñeomigüe.

12Ërei, ¿ketɨ güi pa ou arakuaa?

¿Kia pe pa oï arakuaa katu?

13Kuimbae mbaetɨ oikuaa

kuae arakuaa katu ikavi ko vae,

mbaetɨ ko oñeväe kuae ɨvɨ pe.

14Ɨvɨkua guasu jei: “Che mbaetɨ anoi.”

Ɨguasu jei: “Mbaetɨ oï che ndive.”

15Mbaetɨta oñemee oro re,

mbaetɨta vi jepɨ korepoti ipoɨ rami.

16Mbaetɨ ipuere yagua oro Ofir pegua pe,

ani ita jepɨ vae ónice jee vae pe ani zafiro jee vae pe.

17Jepɨ yae ko oro güi ani ita jësaka vae güi,

mbaetɨta oyepoepɨ mbae jepɨ vae ndive.

18Arakuaa katu jepɨ yae ïta ɨ rupigua güi,

ani ita reta jepɨ yae vae güi.

19Mbaetɨ omboyovake ita ipöra vae Etiopía pegua.

Mbaetɨ ipuere oyemboepɨ ita jepɨ yae vae pe.

20¿Ketɨ güi pa outa jayave arakuaa?

¿Ketɨ pa oime oï arakuaa katu jenda?

21Echa oñeomi oï opaete oikove vae reta güi,

jare opaete güɨra reta güi.

22Oporomokañɨtei vae Abadón jare mano jei reta:

“Jërakua yae vae roenduiño jesegua.”

23Ërei Tumpa oikuaa arakuaa jape,

jare jae oikuaa kia pe oï vae.

24Echa jae omae opaete ɨvɨ iyapɨ rupi,

oecha mbovɨ ko mbae ñogüɨnoi ara igüɨ pe vae.

25Ɨvɨtu pe omee ipɨ̈rata vaerä,

jare oñono ɨ jembeɨ.

26Jae oñono mborookuai reta ama reta pe,

jare ama-vera reta jare ararɨapu reta japerä.

27Jayave jae oecha arakuaa oecha vi jepɨ,

omae kavi jese jare oñono kavi jenda pe.

28Mase, arakuaa jae ko yandeYa güi oipoɨu vae,

jare arakuaa katuSal 111.10; Pr 1.7; 8.13; 9.10. oyembosɨrɨ ikavimbae vae güi vae.