ESDRAS 10 - Guarani Bible with DC

Kuña reta ketɨgua oyemombo

1Esdras oyerure jare oyemombeu oyaeo reve oyetavatɨka Tumpa jo jóvai oï ramboeve, jeta yae Israel iñemuña reta yatɨ jese: Kuimbae reta, kuña reta jare michia reta; opaete vae oyaeo reta ipɨatɨtɨ reve.

2Jayave Secanías, Jehiel taɨ, Elam iñemuña pegua jei Esdras pe: “Oreyoa ñaneTumpa kotɨ, echa rogüɨreko ketɨgua kuña reta ïru ɨvɨ pegua, ërei jeseve ipuereño oï kavi ye Israel iñemuña reta.

3Añave yayapo morogüɨrökuavee päve ñaneTumpa ndive, romombo vaerä opaete jókuae orerembireko reta jare imembɨ reta ndive, toyembopo kuae mborookuai, nde jare ïru oipoɨu Tumpa iporookuai güi vae reta oremboarakuaa rami.

4Epüa, echa kuae jae ko ndeparavɨkɨ, jare ore reta roïta nde ndive; eñemoäta ngatu jare eparavɨkɨ.”

5Jayave Esdras opüa jare jeiuka Tumpa jee re sacerdote reta, jare levita reta itenondegua pe, jare opaete Israel iñemuña reta oyapo vaerä jókuae jei vae; jare jae reta oñererökuavee Tumpa jee re oyapo vaerä.

6Javoi Esdras ojo Tumpa jo jóvai güi, jare oike Johanán, Eliasib taɨ jo pe, jare joko pe opɨta, mbaetɨ okaru jare oɨu, echa ipɨatɨtɨ yae tembipɨɨ güi oyerova ye vae reta iyoa re.

7Javoi omoërakuauka Judá rupi jare Jerusalén rupi opaete tembipɨɨ güi oyerova ye vae, oyemboatɨ vaerä Jerusalén pe.

8Jare mboapɨ araa rupi kia nunga mbaetɨ ou yave, toñepɨ̈ro opaete imbaembae chugüi, mburuvicha reta jare tenondegua reta jei rami, jare toyemombo tembipɨɨ güi oyerova ye vae reta ipɨte güi.

9Jökorai opaete kuimbae reta Judá pegua jare Benjamín pegua reta oyemboatɨ mboapɨ araa pe Jerusalén pe, veinte ara chau yasɨa re. Jare opaete oguapɨ reta Tumpa itupao joka pe, orɨrɨi reta okɨɨye güi jare omborɨrɨi reta ama okɨ vae.

10Jare Sacerdote Esdras opüa jare jei chupe reta:

—Pe reta peyoa, echa pereko kuña reta ketɨgua, jökorai jeiete pemoïru Israel iñemuña reta iyoa.

11Añave peyemombeu yandeYa peñemuñagüe reta iTumpa pe, jare peyapo jemimbota, peyembosɨrɨ ïru ɨvɨ pegua reta güi, jare jókuae ketɨgua kuña reta güi.

12Jare opaete vae jei reta iñeeäta reve:

—Toroyapo nde rere rami,

13ërei jeta yae ko roï, jare ama okɨ yae vi oï, mbaetɨ orepuere roï ikatu pe jare kuae teko mbaetɨ ko metei ara ani mókoi ara peguaño, echa jeta yae ko kuae mbaeyoa pe roï vae,

14oreruvicha reta topɨta kuae pe orerekovia pe, jare opaete orerëta guasu pegua reta güɨreko ketɨgua kuña reta vae, toyogüeru ara oyembojee chupea pe, jare jae reta ndive toyogüeru tenondegua reta, jare mburuvicha oporojäa vae reta, rombosɨrɨ regua oreyeugüi ñaneTumpa iyarasɨ kuae re vae.

15Jaeñoete Jonatán, Asael taɨ jare Jahazías, Ticva taɨ, güɨröɨro reta kuae yemongeta, jare levita reta Mesulam jare Sabetai omborɨ katu.

16Jökorai jaekavi tembipɨɨ güi oyerova yegüe vae reta pe. Javoi oiparavo reta sacerdote Esdras jare metei tëtara vae itenondegua ñavo. Opaete kuae ombojee vae reta yatɨ tenondegua ara pe payandepoa yasɨ pe, oñono kavi vaerä kuae teko.

17Jare tenondegua ara tenondegua yasɨ pe, opa oñono kavi reta jókuae teko reta, opaete jókuae kuimbae reta güɨreko kuña ketɨgua reta vae regua.

18Sacerdote iñemuña reta güɨreko kuña ketɨgua reta vae, jae kuae reta:

Jesúa, Josadac taɨ iñemuña reta jare jëtara reta güi: Maasías, Eliezer, Jarib jare Gedalías.

19Kuae reta oñererökuavee omombo vaerä jembireko reta, jare omee reta mbota iyoa re metei vecha kuimbae jɨmba reta güi.

20Imer iñemuña reta güi: Hanani jare Zebadías.

21Harim iñemuña reta güi: Maasías, Elías, Semaías, Jehiel jare Uzías.

22Pasur iñemuña reta güi: Elioenai, Maasías, Ismael, Natanael, Jozabad jare Elasa.

23Levita reta güi, Jozabad, Simei, Kelaía (kuae ko jae Kelita), Petaías, Judá jare Eliezer.

24Otairari vae reta güi: Eliasib; öke iyangarekoa reta güi: Salum, Telem jare Uri.

25Jaeramiño vi ïru jëtara Israel iñemuña reta:

Paros iñemuña reta güi: Ramía, Jezías, Malquías, Mijamín, Eleazar, Malquías jare Benaía.

26Elam iñemuña reta güi: Matanías, Zacarías, Jehiel, Abdi, Jeremot jare Elías.

27Zatu iñemuña reta güi: Elioenai, Eliasib, Matanías, Jeremot, Zabad jare Aziza.

28Bebai iñemuña reta güi: Johanán, Hananías, Zabai jare Atlai.

29Bani iñemuña reta güi: Mesulam, Maluc, Adaía, Jasub, Seal jare Ramot.

30Pahat-moab iñemuña reta güi: Adna, Quelal, Benaía, Maasías, Matanías, Bezaleel, Binúi jare Manasés.

31Harim iñemuña reta güi: Eliezer, Isías, Malquías, Semaías, Simeón,

32Benjamín, Maluc jare Semarías.

33Hasum iñemuña reta güi: Matenai, Matata, Zabad, Elifelet, Jeremai, Manasés jare Simei.

34Bani iñemuña reta güi: Madai, Amram, Uel,

35Benaía, Bedías, Quelúhi,

36Vanías, Meremot, Eliasib,

37Matanías, Matenai, Jaasai,

38Bani, Binúi, Simei,

39Selemías, Natán, Adaía,

40Macnadebai, Sasai, Sarai,

41Azareel, Selemías, Semarías,

42Salum, Amarías jare José.

43Nebo iñemuña reta güi: Jeiel, Matatías, Zabad, Zebina, Jadau, Joel jare Benaía.

44Opaete kuae reta güɨreko kuña ketɨgua reta, jare amogüe jókuae kuña reta imembɨ chupe reta. Ërei opa ye omombo reta imembɨ reve reve.