1 MACABEOS 8 - Guarani Bible with DC

Romaɨgua reta

1Judas oendu Romaɨgua reta jërakua yae vae: Jae reta imbaepuere yae, oyogüɨroata kavi iñemoïru ïru reta ndive jare oyemboya ikotɨ vae reta ndive.

2Ipɨ̈rata ramo imiari yae jese reta. Oendu vi iñoraro regua jare Galias reta yavaiä etei omoamɨri vae: Kërai ko oñono ipogüɨ pe, omboepɨuka chupe reta tributo vae;

3jaenunga vi España pe oyapogüe, oyemboiya yave imbaeyekou korepoti jare oro pegua re.

4Jare kërai oyemombae opaete jókuae ɨvɨ re oikatu oyemongeta ramo jare mbaetɨ ramo iyagüɨ, yepe tëi mombɨrɨ oï jëta güi; jare kërai ko omoamɨri jare oikaambi jovaicho mburuvicha reta oporepeña tëi jese vae opaete ɨvɨ jugua rupi, jare ïru reta omboepɨ chupe tributo año ñavo.

5Omoamɨri vi ñoraro pe jare oñono ipogüɨ pe Filipo jare Perseo, mburuvicha guasu reta Macedonia pegua jare ïru jovaicho reta.

6Oikuaa vi Antíoco Tuicha vae regua, mburuvicha guasu Asia pegua, echa jae güɨropüa tei ikotɨ ñoraro ciento veinte elefante ndive, kavayu regua reta, guataka jare sundaro ejército tuicha vae ndive, ërei mbaetɨ ipuere reta jese,

7jokoropi oipɨɨ reta jekove reve jare omboepɨuka chupe jare jaɨkuegua reta pe tributo jepɨ vae, oyora kavi chupe tembipɨɨ reta jare jekovia pe omboasa chupe

8provincia reta India, Media jare Lidia pegua, jae ko provincia ikavi yae vae reta, tenonde yave opɨ̈ro jare omboasa mburuvicha guasu Eumenes ipo pe vae.

9Jërakua vi chupe kërai Greciaɨgua reta ikɨ̈reɨ tëi ombopaa Romaɨgua reta vae,

10ërei kuae reta oikuaa chugüi iyemongeta jare omondo meteiño sundaro ruvicha oñoraro jae reta ndive; Greciaɨgua reta güi jeta omano, jare Romaɨgua reta güɨraja jembiaurä kuña Greciaɨgua reta imembɨ reve reve, opavusu tëta guasu re jare oyemboiya jese, omboai iñepɨ̈roa jare oñono ipogüɨ pe jokuaeɨgua reta, añave rupi jeiete jembiaurä yogüɨreko.

11Oikuaa vi kërai ïru tëta reta jare ɨ̈aka-päu rupigua, jare oipotagüe kia oyemboɨ chupe vae, opa omoamɨri jare oñono ipogüɨ pe, ërei ngatu oñemoïru jae reta ndive vae jare oñepɨ̈ro ikotɨ reta vae ndive, ikavi yae oyogüɨroata.

12Jökorai oñono ipogüɨ pe jeta mburuvicha guasu mombɨrɨ jare köiño yogüɨreko vae reta, jare kia imiari yave jese okɨɨye yae chugüi reta.

13Ikɨ̈reɨ tuvicharä yogüɨreko vae reta oyemboya yave ikotɨ, oguapɨta ko mburuvicharä; ërei ipɨa jei yave, yavaiä vi opɨ̈ro ye chugüi imbaepuere. Jökorai imbaepuere tuicha oyeapo reta.

14Ërei ngatu, metei ave mbaetɨ kia oñonouka äka-regua iyé ani omonde temimonde pɨ̈taasɨ vae ikɨ̈reɨ oyembotuicha güiño.

15Omopüa reta metei yemboatɨa, joko pe ara ñavo tresciento veinte kuimbae reta imiari tëta imbaeavai re jare jökorai oeka vaerä jupi vae yogüɨreko kavi vaerä.

16Meteiño oiparavo reta año ñavo oguapɨ vaerä tuvicharä opaete jókuae ɨvɨ guasu pe, jare opaete vae vi oyapo iñee, mbaetɨ oyoambotaä vae ani tägüɨro yepe yaecha joko pe.

Ñomoïru Romaɨgua reta ndive

17Judas, jayave, oiparavo Eupólemo, Acos pegua Juan jee vae taɨ, oiparavo vi Jasón, Eleazar taɨ, jare omondo reta Roma kotɨ güɨraja vaerä yemongeta ñomoïru pegua,

18jökorai oyeepɨ vaerä tekoasɨ güi, echa ko oecha reta ma Greciaɨgua reta ipogüɨ pe ma güɨnoi Israel.

19Jae reta omboɨpɨ oguata Roma kotɨ matɨ yae ko oguata reta jare oike reta yave yemboatɨa pe, jei reta:

20“Judas Macabeo jare jëtara reta, opaete Judá pegua reta ndive, orembou ñanemiari vaerä vɨakatu jare ñomoïru re. Roipota orepapa vi peïru reta ipɨte pe.”

21Romaɨgua reta pe ipöra kuae yemongeta.

22Körai jei jókuae tembikuatía tupapire jiero iyu vae pegua pe oï vae jare omondo reta Jerusalén kotɨ vae pe, joko pe oñeñovatu kavi vaerä kuae yemongeta vɨakatu jare ñomoïru pegua.

23“¡Toiko mbaeyekou Romaɨgua jare judío reta pegua jekuae kuae avei, ɨguasu jare ɨvɨ rupi! ¡Ñoraro ani tovaicho reta yepe agüɨye toya ikotɨ reta!

24Oime yave mbae oasa Roma pe, ani ramo jae ndive oñemoïru vae reta kotɨ räri, oipotagüe ɨvɨ guasu pe,

25judío reta jëta guasu oëta omborɨ vaerä iñeïru ete rami, kuae teko oasa yave.

26Judío reta ngaraa omee Romaɨgua reta jovaicho pe jembiurä, jembiporurä, ikorepotirä ani guataka ɨ rupigua yepe. Jae jókuae Roma ipɨapotaa. Judío reta oyapota ko iñererökuavee jepɨmbae rupi.

27Jaeramiño vi, judío reta jëta räri oï yave ñoraro pe, Romaɨgua reta omborɨta vi ko iñeïru ete rami, kuae teko oasa yave.

28Ngaraa omee tovaicho reta pe jembiurä, jembiporurä, ikorepotirä ani guataka ɨ rupigua yepe. Jae jókuae Roma ipɨapotaa. Romaɨgua reta oyapota ko iñererökuavee iyapumbae reve.

29Kuae ñee ndive oyapo Romaɨgua reta yemongeta judío reta ndive.

30Kuae jaɨkue rupi jae reta ikɨ̈reɨ yave omoïru ani opɨ̈ro kuae yemongeta jeigüe, ipuere oyapo ipɨapotaa rupi, omoïrugüe ani opɨ̈rogüe oyovake oyemboeteta.”

31Jaeramiño vi, Romaɨgua reta jei vi omondo ko mburuvicha guasu Demetrio omomaendúa tupapire rupi mbae pɨ̈chɨi vae jae oyapo judío reta kotɨ vae re: “¿Maera pa rerekoasɨ mbatee ñanerëtara judío reta?

32Jae reta oñeapo ye yave nderé, ore royepɨta jare ropüata nderé ɨvɨ jare ɨguasu rupi.”