SALMOS 136 - Guarani Bible with DC

SALMO 136Mbaemboete yandeYa iporoparareko opambae vae re

1Pemboete yandeYa, echa jae ipɨakavi ko,

echa iporoparareko jekuae avei vae ko.

2Pemboete Tumpa, tumpa-raanga reta güi imbaepuere yae vae,

echa iporoparareko jekuae avei vae ko.

3Pemboete yandeYa, imbaepuere yae ete mbaepuere güɨnoi vae reta güi vae,

echa iporoparareko jekuae avei vae ko.

4Pemboete mɨakañɨ tuichagüe iyapoa,

echa iporoparareko jekuae avei vae ko.

5Arakuaa katu rupi ara reta oyapo vae,

echa iporoparareko jekuae avei vae ko.

6Ɨguasu reta re oyapo ɨvɨ vae,

echa iporoparareko jekuae avei vae ko.

7Tembipe reta tuichagüe iyapoa,

echa iporoparareko jekuae avei vae ko.

8Oyapo kuaraɨ, omboesape vaerä ara pe,

echa iporoparareko jekuae avei vae ko.

9Oyapo yasɨ jare yasɨtata reta, omboesape vaerä pɨ̈tu yave,

echa iporoparareko jekuae avei vae ko.

10Pemboete, Egipto pe membɨrɨpɨ reta oyuka vae,

echa iporoparareko jekuae avei vae ko.

11Israel iñemuña reta Egipto güi güɨnoe vae,

echa iporoparareko jekuae avei vae ko;

12imbaepuere yae rupi güɨnoe vae,

echa iporoparareko jekuae avei vae ko.

13Ɨguasu Pɨ̈ta vae omboyao vae,

echa iporoparareko jekuae avei vae ko;

14Israel iñemuña reta güɨroasa jokoropi vae,

echa iporoparareko jekuae avei vae ko.

15Faraón isundaro reta ndive opa oyasoiuka Ɨguasu Pɨ̈ta vae pe vae,

echa iporoparareko jekuae avei vae ko.

16Oyangareko imbae vae reta re ñuu rupi vae,

echa iporoparareko jekuae avei vae ko.

17Mburuvicha guasu reta tuichagüe omoamɨri vae,

echa iporoparareko jekuae avei vae ko.

18Mburuvicha guasu reta imbaepuere yae vae oyukauka vae,

echa iporoparareko jekuae avei vae ko.

19Amorreo reta juvicha guasu Sehón oyuka vae,

echa iporoparareko jekuae avei vae ko,

20jare mburuvicha guasu Og, Basán pegua,

echa iporoparareko jekuae avei vae ko;

21jare jae reta iɨvɨgüe omee imbae vae reta imbaerä,

echa iporoparareko jekuae avei vae ko.

22Omee jembiokuai Israel imbaerä,

echa iporoparareko jekuae avei vae ko.

23Jae mbaetɨ iñakañɨ yandegüi mbɨatɨtɨ guasu pe ñaï yave,

echa iporoparareko jekuae avei vae ko.

24Jae yandereepɨ yanderovaicho reta güi,

echa iporoparareko jekuae avei vae ko.

25Jae omee tembíu opaete oikove vae reta pe,

echa iporoparareko jekuae avei vae ko.

26¡Pemboete Tumpa ara pe oï vae,

echa iporoparareko jekuae avei vae ko!