ECLESIÁSTICO 15 - Guarani Bible with DC

1Jökorai oyapo Tumpa omboete vae;

mborookuai oyapo vae rupi oväe arakuaa.

2Jae oë oövaiti metei ichɨ rami;

oipɨɨ taɨrusu pegua jembireko rami.

3Omongaru tembíu arakuaa katu pegua pe

jare omee oɨu ɨ arakuaa pegua pe.

4Jae oyekota jese agüɨye vaerä oa;

oyerovia jese yave, osusere potaa.

5Jae ko omopüata iñeïru reta iárambo,

güɨraja vaerä ñee yemboatɨa pe.

6Omotɨnɨe mbaeyekou pe jare yerovia pe

jare omeeta chupe ñemoërakua opambae vae.

7Kuimbae jaanga vae reta ngaraa oupitɨ,

oyembotuicha vae reta ave oecha potaä.

8Jae mombɨrɨ ko oï iyurupochɨ vae reta güi;

iyapu vae reta oikuaa etei jesegua.

9Pochɨ vae reta jupi ko omboete vaerä,

echa Tumpa omeeä chupe reta arakuaa.

10Iyarakuaa vae ko jae omboete vae;

kia ñavo güɨnoi vae ipuere oechauka.

Kuimbae oikoiñogüe

11Agüɨye ere: “Tumpa ko chemboyoauka”;

echa jae ngaraa oyapo güɨröɨrogüe.

12Jare agüɨye vi ere: “Jae ko chereitɨuka”;

echa jae mbaetɨ ko oipota kia jeko kavimbae.

13Tumpa omotareɨ ko oñereröɨro vae

jare ngaraa omondo kia iporomboete ikotɨ vae pe.

14Tumpa oyapo kuimbae iyɨpɨ yave

jare omee chupe oyapo ipɨapotaa.

15Reipota yave, ndepuere reyapo jae jeigüe,

jare ipuere reiko jupi rupi reyapo yave oipota vae.

16Nderenonde oime renoi tata jare ɨ;

eiparavo reipotagüe.

17Metei ñavo jenonde oime oï tekove jare mano,

jare metei ñavo güɨnoita oiparavogüe.

18Tumpa iyarakuaa tuicha yae ko;

jae täta ko imbaepuere jare opaete ko oecha.

19Tumpa oecha opaete mbae oyapogüe,

jare oikuaa vi opaete kuimbae oyapogüe.

20Jae mbaetɨ kia oyókuai iyoa vaerä,

jare mbaetɨ oeya oñenupa mbae iyapu vae reta.