LEVÍTICO 9 - Guarani Bible with DC

Aarón jare taɨ reta omboɨpɨ mbaravɨkɨ sacerdote pegua

1Chiu araa pe, Moisés oenɨi Aarón jare taɨ reta, jare Israel iñemuña itenondegua reta.

2Jare jei Aarón pe: “Eipɨɨ mɨmba reta güi jete kavi vae metei toro taɨrusu vae, ñɨ̈ro pegua, jare vecha kuimbae opaetei oyeapɨ vaerä, jare emee yandeYa jóvai.

3Jare Israel iñemuña reta pe ere: ‘Peipɨɨ mɨmba jete kavi vae metei kavara kuimbae, ñɨ̈ro pegua, metei toro jare metei vecha kuimbae metei año vae reta opaetei oyeapɨ vaerä.

4Jaeramiño vi metei toro jare metei vecha kuimbae yembopɨakatu peguarä, peyuka yandeYa jóvai, jare trigokúi ipɨuasɨ kavi vae oyemómbɨu olivo iasaite pe vae; echa añave yandeYa oyeechaukata peve.’ ”

5Jare güɨraja reta Moisés oyókuai vae rami tupao guakapi pegua jóvai, jare opaete Israel iñemuña reta yogüeru oyemboɨ yandeYa jóvai.

6Jayave Moisés jei: “Jae ko kuae yandeYa iporookuai; peyapo jare jae iyemboetea jembipe oyekuaata peve.”

7Jare Moisés jei Aarón pe: “Eya katu mɨmba oyeyuka oyeapɨ jese vae re, jare eyuka emee mɨmba mbaeyoa regua jare mɨmba opaetei oyeapɨ vae, Tumpa iñɨ̈ro vaerä ndeyoa re jare opaete vae reta iyoa re. Emee vi mɨmba Israel iñemuña reta omee vae, Tumpa iñɨ̈ro vaerä mbaeyoa re, yandeYa oporookuai rami.”

8Jayave Aarón oya katu mɨmba oyeyuka oyeapɨ jese vae re, jare oñaseokɨ̈ti toro taɨrusu vae, Tumpa iñɨ̈ro vaerä iyoa re.

9Jare taɨ reta güeru chupe jókuae mɨmba jugüɨgüe; javoi jae omoäkɨ ipoäka tugüɨ pe, jare oñono mɨmba oyeyuka oyeapɨ jese vae re guakarätiecha ñogüɨnoi vae re, jare tugüɨ jembɨregüe opɨyere mɨmba oyeyuka oyeapɨ jese vae iyɨpɨ re.

10Javoi oapɨ mɨmba oyeyuka oyeapɨ jese vae re ikɨragüe ipɨ̈rɨkɨti reta ndive, jare iyambia oï ipɨa re vae, Tumpa iñɨ̈ro vaerä mbaeyoa re, yandeYa oyókuai Moisés vae rami.

11Ërei isoogüe jare ipiregüe oapɨ teyupa güi ikatu pe.

12Jaeramiño vi Aarón oñaseokɨ̈ti mɨmba opaeteita oyeapɨ vae, jare taɨ reta güɨraja omee jugüɨgüe, jare jókuae tugüɨ pe oñapiramo mɨmba oyeyuka oyeapɨ jese vae iyɨke yɨke re.

13Jaɨkue rupi güɨraja reta mɨmba oyeyukagüe opaeteita oyeapɨ vae oyemboyao yaogüe, iñäkagüe ndive; jare oapɨ mɨmba oyeyuka oyeapɨ jese vae re.

14Javoi oyoe ichuri churigüe jare iugüe reta, jare oapɨ mɨmba oyeyukagüe opaetei oyeapɨ vae ndive mɨmba oyeyuka oyeapɨ jese vae re.

15Aarón omee mbota Israel iñemuña reta re oñemee vae. Oipɨɨ kavara kuimbae Tumpa iñɨ̈ro vaerä mbaeyoa re vae, oñaseokɨ̈ti jare omee jókuae mbota tenonde yave oyeapo rami.

16Jare omee mɨmba oyeyukagüe opaetei oyeapɨ vae, oyapo mborookuai jei rami.

17Jaeramiño vi oekɨ ipoagua trigokúi ipɨuasɨ kavi vae oñemee vae güi, jare oapɨ mɨmba oyeyuka oyeapɨ jese vae re, ndeimbove yave mɨmba oyeyukagüe opaetei oyeapɨ güire.

18Aarón oñaseokɨ̈ti vi toro jare vecha kuimbae yembopɨakatu peguarä vae Israel iñemuña reta re oñemee vae,Lv 3.1-11. jare taɨ reta güɨraja jugüɨgüe, jare pɨpe oñapiramo mɨmba oyeyuka oyeapɨ jese vae iyɨke yɨke re.

19Toro jare vecha kuimbae ikɨragüe, juguaigüe, ikɨra oï ichuri churigüe re vae, ipɨ̈rɨkɨti reta jare iyambia oï ipɨa re vae,

20oñono reta mɨmba oyeyukagüe ipɨtiagüe iárambo, jare Aarón oapɨ mɨmba oyeyuka oyeapɨ jese vae re,

21ërei ipɨtiagüe, iu iyakatu kotɨgua ndive, güɨrökuavee mbota oñererökuavee oñemee yandeYa pe vae, yandeYa oyókuai Moisés vae rami.

22Jaɨkue rupi Aarón oupi ipo jeta vae reta kotɨ, jare jei ñee kavi ikotɨ reta;Nm 6.22-26. opa yave omee mbota Tumpa iñɨ̈ro vaerä mbaeyoa re vae, jare mɨmba oyeyukagüe opaetei oyeapɨ vae jare mɨmba oyeyukagüe yembopɨakatu pegua, osɨrɨ mɨmba oyeyuka oyeapɨ jese vae güi.

23Javoi Moisés jare Aarón oike tupao guakapi pegua pe, jare ñogüɨnoe jei ñee kavi jeta vae reta kotɨ. Jare yandeYa iyemboetea jembipe oyekuaa opaete vae reta pe.

24Jare yandeYa ombou tata, jare oapɨ mɨmba oyeyukagüe opaeteita oyeapɨ vae ikɨragüe reta ndive mɨmba oyeyuka oyeapɨ jese vae re.

Jare Israel iñemuña reta oecha yave, omboete jare oyetavatɨka reta itindɨasɨ ɨvɨ re.