SABIDURÍA 18 - Guarani Bible with DC

1Ërei, nerëta ipo ikɨambae reta pe, oesape oï tembipe tätagüe vae.

Egiptoɨgua reta, iñeegüeño oendu güi, yepe oecha,

omotareɨ reta ñogüɨnoi kavi chugüi ramo jare mbaetɨ jae reta rami oiporara jeko pegua;

2oyapo reta yasoropai chupe, yepe jasɨ katu vae oyapo chupe reta,

mbaetɨ vaerägüe jökorai oyepɨ jese reta,

jare jei reta iñɨ̈ro vaerä chupe jovaicho rami omae jese reta jeko pegua.

3Nerëta ipo reta pe, pɨtumimbi jekovia pe,

reñono chupe reta tataendɨ jɨsɨ vae,

kuaraɨ rami mbaetɨ maratu oporoapo vae,

güɨraja kavi vaerä oikuaambae reve yogüɨraja yogüɨrekoa rupi,

guata ikavigüe oyapo yogüɨraja vae pe.

4Egiptoɨgua reta pegua aeño tembipembae ñogüɨnoi vaerä,

tembipɨɨ pɨtumimbi pegua vae,

nderaɨ reta tembipɨɨrä güɨreko jeko pegua,

jae reta ko opaete ɨvɨ rupi oikuaaukata

tembipe opambae ndeporookuai pegua vae.

5Egiptoɨgua reta oñono oyuka vaerä michia reta nerëta ipo ikɨambae vae pegua,

jare Moisésño etei oasayepe, jare oyemombo opɨta.

Ërei, oiporara reta vaerä, chugüi reta ma jeta reekɨ imichia reta,

jare opaetei remopɨtupa reta

ɨ yavaetegüe vae pe.

6Jókuae pɨare oasagüe vae,

ore ñemuñagüe reta opa ma ko oikuaa tenondeve ma,

echa ko, oikuaa reta añetegüe vae ramo,

jese oyerovia reta

güɨrovia reta jeko pegua.

7Jökoraiño vi nerëta ipo reta oäro

oasayepe vaerä jekombae vae reta

jare opa vaerä okañɨtei jovaicho reta,

8jare jókuae rami vae pe etei vi reiporarauka kuae reta pe

jare täta oremboyerovia orerenɨi ndekotɨ vae.

9Iporoparareko vae reta ndepɨakavi güɨreko iyé vae reta

oyapo vɨari reta mɨmba oyeyukagüe omee

metei rami ñee oyapo vae rupi oñeñono reta oyapo vaerä ndeporookuai ikɨambae jeigüe vae

jare yogüɨreko päve vaerä mbaeyekou rupi jare pɨ̈chɨi vae rupi

jare ojäa reta yemongoi kugüive güɨreko vae.

10Jókuae yemongoi reta rupi

ojäa reta tovaicho reta isapúkai

jare oime amogüe

imichia imano re oyaeo vae.

11Tuichagüe reta jare tembiokuai reta oyovake oiporara jókuae tembiporara;

kuimbae tëta ipo oyovake opɨta mburuvicha guasu ndive.

12Opaete oyovake jeta rupi omano reta,

jare opa ko okañɨtei reta.

Omanombae reta oupitɨa ye opa oñotɨ vaerä,

echa jarembae pegua yae opa omano tëtaguasu ipo ikavigüe reta.

13Jare jökorai jae reta, güɨrovia tëi imbaekuaa reta re

jare mbaetɨ tëi güɨrovia reta oyemombeu chupe reta vae pe,

oecha, imichia tuichagüe reta omano yave ramo,

güɨrovia reta ore reta ipo reta jae ko Tumpa taɨ reta vae.

14Echa pɨare mbɨte rupi,

opaete mbae kïrii ngatu vae oimama,

15neñee täta imbaepuere vae, ñoraro regua jëia vae rami,

oë ara güi, nde mburuvicha guasu oporookuai oï vae,

jare oa ou jókuae ɨvɨ yepopeyu pe oï vae pe.

Güɨraja reve, kɨse puku jaimbegüe vae rami, ndeporookuai oiko vaerä vae,

16opoko oyeapo jare opaete rupi ojo mano;

iñäka ojo ye oya ara re vae, jare ipɨ, oñono ɨvɨ re.

17Jaema jayave, mbɨatɨtɨ yavaetegüe vae ou oväe Egiptoɨgua reta pe,

jare opoko jese reta kɨɨye oyemongeta mbae oecha vaerä vae.

18Opa ramboeve oa ɨvɨ re, jëogüe reve, oipota rupi,

oikuaa kavi reta kia ko mano ombou chupe reta vae.

19Ipaɨu rupi oechagüe vae

oikuaauka chupe reta,

agüɨye vaerä omano reta

oikuaambae reve jókuae susere ou chupe reta vae.

20Ërei oime vi jupi vae reta

omano vae:

jeta vi jókuae nunga reta omano ɨvɨ ipombae vae rupi.

Ërei ndearasɨ mbaetɨ ko ɨma pegua,

21jare Aarón, metei kuimbae oyemongɨambae vae,

oñemopüa oporoepɨ vaerä

jae sacerdote oiko vae rupi:

yerure jare incienso oapɨ vae rupi ojo oupitɨ neɨ̈ro vaerä chupe reta.

Jare jókuae oyapo ndearasɨ vae pe

jare joko pe omombɨta maemegua reta,

oechauka jae ko añetete ndeve oyeokuai vae.

22Omoamɨri ndearasɨ, jete ipɨ̈rata vae pea

ani ramo tembiporu pea,

iñee peko ombogüe ndearasɨgüe vae,

ndemomaendúa ñemoïru reta re

jare neñererökuavee reta iñemuñagüe reta pe reyapo vae pe.

23Tëogüe reta oyoarambo rambo ma ñogüɨnoi oyoe yave,

oñemopüa, omombɨta ndearasɨ

jare oyopia agüɨye vaerä ma oasa omanopambae reta kotɨ.

24Jemimonde pukugüe vae ndive

oñemoë oï opaete vae pe;

irundɨ ñesɨro ita oñeopagüe reta oï vae pe

oime oï tenondeguagüe reta jee;

jare iñäka regua re

oï iyembotuicha.

25Kuae jóvai güi, oporomokañɨtei vae ojo ye jaɨkue kotɨ, täta okɨɨye reve,

echa oecha ma kërai ndearasɨ vae.