SALMOS 106 - Guarani Bible with DC

SALMO 106Israel iñemuña reta oyembopɨapochɨ

1¡Aleluya!

Pemboete yandeYa, echa jae ko ipɨakavi,

echa iporoparareko jekuae avei vae ko.

2¿Kia pa ipuere jei kavi yandeYa jembiapo reta tuichagüe regua?

¿Kia pa ipuere omboete jupi rupi kavi yandeYa?

3Oyerovia ko, jupi vae oyapo vae reta,

jupi vae oyapo avei vae reta.

4CheYa Tumpa, nemaendúa cheré reyapo yave ikavi vae ndembae vae reta pe;

nemaendúa cheré reyu reporogüɨroasayepe yave,

5aecha vaerä nderembiparavo reta iyerovia,

ayerovia vaerä vi ndembae vae reta iyerovia re,

ayemboete vaerä tëta ndembae vae reta re.

6Oreyoa vi oreñemuñagüe reta rami,

royapo ikavimbae, royapo jupimbae.

7Egipto pe mɨakañɨ reta tuichagüe reyapo vae mbaeä etei oreñemuñagüe reta pe;

mbaetɨ imaendúa reta

ndeporoparareko yae ko vae re,

Ɨguasu Pɨ̈ta vae jembeɨ pe oyembopɨapochɨ reta ndekotɨ.

8Ërei Tumpa güɨroasayepe, oaɨu jee ramo;

oechauka vaerä imbaepuere.

9Iñee omoë Ɨguasu Pɨ̈ta vae pe, jare oyemboyao.

Jeta vae güɨroasa ɨ rugua rupi,

ñuu rupi oasa rami.

10Jökorai, güɨroasayepe tovaicho reta güi,

imotareɨa reta ipo güi.

11Ɨ opa oyasoi jovaicho reta,

mbaetɨ etei jembɨre metei ave.

12Jayave, güɨrovia reta Tumpa iñee re,

jare otairari reta mbaemboete chupe.

13Ërei ɨmambae pegua ñakañɨ reta Tumpa oyapogüe güi,

mbaetɨ oäro reta oikuaa vaerä jae iyemongeta.

14Ombotenonde reta ipɨa jemimbotaño ñuu pe,

ojäa reta Tumpa ipɨaguasu ɨvɨ ipombaea pe.

15Jae omee chupe reta, jae reta oiporugüe,

ërei ombou chupe reta manoɨvɨ.

16Teyupa pe iyakatúä reta Moisés re,

jare Aarón, Tumpa oñono tee vae re.

17Jayave oyepeka ɨvɨ, jare opa omókoi Datán,

jare vi Abiram jupiegua reta.

18¡Tata jendɨ ikotɨ reta!

¡Opaetei oapɨ jókuae jupimbae reta!

19Horeb pe oyapo reta iyeupe toro taɨrusu vae iä,

oyetavatɨka reta mbae iä oro oyemondɨkuigüe pe oyapo reta vae jóvai.

20¡Jökorai oipoepɨ reta Tumpa tuicha yae vae,

metei toro ñana iua iägüe ndive!

21Ñakañɨ reta jeroasayepea Tumpa güi,

jókuae jeta mɨakañɨ tuichagüe oyapo Egipto pe vae güi,

22jeta mɨakañɨ oyapo Cam iɨvɨ pe vae,

mbae oporombopɨakañɨ yae vae oyapo Ɨguasu Pɨ̈ta vae pe vae.

23Tumpa opata tëi omboai reta,

ërei jembiparavo Moisés oyopia,

omoröɨsa iyarasɨ chugüi,

agüɨye vaerä opa omboai.

24Jaɨkue rupi güɨröɨro reta ɨvɨ kavi,

mbaetɨ güɨrovia reta Tumpa iñee re;

25jo guakapi pegua rupi iñeenguru reta yandeYa kotɨ,

mbaetɨ oyapo reta jae jei vae.

26Jáeramo, jae ipo oupi reve jei jee re aeño opa vaerä omokañɨtei reta ñuu pe,

27omomichiuka vaerä tëtaguasu reta ñavo pe,

jare opa omoai moai opaete ɨvɨ rupi.

28Jare oyemboya reta tumpa-raanga Baal-peor re,

jou reta mɨmba oyeyukagüe, oikovembae pe oñemee vae.

29Jeko reta ikavimbae pe omboarasɨuka reta Tumpa,

jare ou manoɨvɨ jese reta.

30Ërei Finees opüa jare oyuka jókuae teko iya,

jökorai jókuae manoɨvɨ osondo.

31Jókuae oyapogüe re Tumpa omae jese, jupi jekuae avei rupi vae.

32Ɨ Meriba pe omboarasɨuka reta vi Tumpa,

jae reta jeko pegua Moisés pe oyavɨuka.

33Echa omboarasɨuka reta,

jáeramo, jei rai rai voi mbae.

34Mbaetɨ opa omboai reta tëta reta,

yandeYa oyókuai tëi omboai reta vaerä vae.

35Ërei oyea reta tëtaguasu reta ndive,

jare omomoe reta jeko reta:

36Omboete reta jókuae tëta reta itumpa-raanga reta,

jókuae jeko pegua oñererokomegua reta,

37oyuka reta taɨ reta jare tayɨ reta, omee vaerä mbota aña reta pe.

38Opɨyere reta jekombae jugüɨ;

taɨ reta jare tayɨ reta jugüɨ,

omee reta mbotarä tumpa-raanga Canaán pegua pe.

Omongɨa reta jókuae ɨvɨ, jókuae tugüɨ pe,

39jökorai, oyemongɨa reta oyapogüe pe,

oñererokomegua reta aguasa pe rami jembiapo reta rupi.

40Jáeramo, yandeYa iyarasɨ imbae vae reta kotɨ,

jare güɨröɨro imbae vae reta;

41omee tëtaguasu reta ipo pe,

jare jovaicho reta güɨnoi mbaepuere jese reta;

42jókuae jovaicho reta oiporarauka yae chupe reta,

omomichi reta imbaepuere igüɨ pe.

43Tumpa, güɨroasayepe avei reta,

ërei jae reta oyembopɨapochɨ Tumpa oipota tëi oyapo vae kotɨ.

Jáeramo, jeiete oñeäka pɨpɨ reta jeko kavimbae pe.

44Ërei jeseve, omae jese reta oiporara reta ñogüɨnoi yave,

jare oendu chupe reta iyerure ipɨatɨtɨ reve vae,

45imaendúa morogüɨrökuavee päve oyapo jae reta ndive vae re,

jare oipoepɨ iyemongeta, iporoparareko yae jeko pegua.

46¡Yepe tëi jae reta yogüɨreko imoamɨría reta ipo pe,

ërei Tumpa omee vi jókuae reta, güɨnoi vaerä mboroparareko jese reta!

47¡Orereepɨ OreYa Tumpa!

¡Orereru ye tëtaguasu reta güi,

orepuere vaerä romboete nderee ikɨambae vae,

romboete vaerä royerovia katu reve!

48¡Mbaemboete toiko ndeve jekuae avei rupi cheYa Israel iTumpa!

¡Opaete vae tei: “Amén”!

¡Aleluya!

LIBRO VSALMOS (107—150)