ECLESIÁSTICO 13 - Guarani Bible with DC

Ñañemoïru jeko ikavimbae reta ndive vae susere peguarä ko

1Kia opoko ipomo vae re vae, oyata ko ipo re;

jare kia oñemoïru iporoyoyaise vae reta ndive vae ojota ko oyeapo jae reta rami.

2Agüɨye eupi metei mbae ipoɨ vae ndepoaka güi oasa vae,

jare agüɨye eñemoïru kia má oikokatu ndegüi vae ndive.

Ɨvɨyapepo ngaraa oñeñono jiero yapepo iyɨpɨ pe;

echa güɨrokua yave ɨvɨ yapepo oyekata.

3Oikokatu vae metei jupimbae oyapo yave jare oyembotuicha pɨpe;

paravete vae oiporara jare oiporuta iñɨ̈ro vaerä chupe.

4Resɨi katu oikokatu vae pe yave, omeeukata mbae reu;

ërei resiriveä chupe yave, nde reeyata ko.

5Oime mbae renoi yave, ¡këraitita ndembotuicha!

Ërei ngaraa ojäaño ndemombaravɨkɨ.

6Reata chupe yave, tätata omae kavi nderé,

opukavɨita ndeve jare oyereroviaukata ndeve.

Nemomiarita ikavi rupi,

jare oparanduta ndeve mbae reipota vae re.

7Nemomaraita ipareagüe pe rekaru vaerä.

Ipuere ramboeve ndembojembiapo, ndembotavɨta;

ndemboeteta mbovɨ vese,

ërei jaɨkue rupi, nderesa rupíe pochɨta ndeve

jare oñemoäka-vavata ndeve nereröɨro güi.

8¡Eyeandu! ¡Agüɨye eporogüɨrovia katu mbatee!

¡Agüɨye eiko iyarakuaa mbae reta rami!

9Metei oikokatu vae imbaepuere vae oya ndekotɨ yave, eñemoataño chugüi,

jayave jae jei ye yeta reo vaerä ikotɨ.

10Agüɨye eñemoköiño mbatee, reipotaä matɨ repɨta yave,

jare agüɨye vi eñemoata mbatee, reipotaä kia iñakañɨ ndegüi yave.

11Agüɨye nemiari ngatu mbatee jae ndive

jare agüɨye erovia opaete jeigüe vae,

echa jae täta ko imiari pota ndembojaanga vaerä,

jare iñee yuvanga omae oï nderé.

12Metei kuimbae ipïrimbae oñono reta mburuvicharä yave,

ngaraa iporoparareko kia re

jare opokota ko jeta vae jekove re.

13¡Peyeandu täta,

agüɨye eñemoïru kia ipɨarai vae ndive!

15Opaete mbae oikove vae reta oaɨu ko jëtara vae reta;

jare jökorai vi, opaete kuimbae japicha reta kotɨ.

16Opaete mbae oikove vae reta oñemoïru ko jae rami vae reta ndive,

jare jökoraiño vi kuimbae kia jae rami vae ndive.

17¿Këraita ya aguarayaɨmba oya oyoe vecha ndive?

Jökoraiño vi ko, ikavimbae ikavi vae ndive.

18¿Këraita ya aguarayaɨmba oiko kavi yaɨmba ndive?

Jökoraiño vi ko, oikokatu vae paravete vae ndive.

19Mburika ñana rupigua jesaete reta yaguapope jembiurä ko;

jökoraiño vi ko paravete vae reta oikokatu vae pe.

Oikokatu vae reta jare paravete vae reta

20Ipɨayemboete vae omotareɨ ko oñemomichi vae,

jare oikokatu vae omotareɨ ko paravete vae.

21Oikokatu vae ogüɨapi yave, ichëi vae reta ko oyokota,

ërei paravete vae ogüɨapi yave, ichëi vae reta omoañata ko.

22Oikokatu vae imiari, jare jeta omborɨ vae,

jare yepe imiari kaviä, chupe täta ikavi.

Paravete vae oyembojopa yave, jaema opuka reta jese,

jare yepe imiari añetegüe, mbaetɨ kia güɨrovia.

23Oikokatu vae imiari yave jare opaete vae kïrii

jare amapɨtu rupi oñono chupe iyarakuaa.

Paravete vae imiari yave jare oparandu reta: “¿Kia pa jókuae?”

Jare ogüɨapi yave, omoaña yeti.

24Ikavi ko mbaeyekou jupi rupi ñanoi yave,

jare pɨ̈chɨi ko mbaravete yembotuicha jeko pegua vae.

25Kuimbae iyɨvɨte pe güɨnoigüe,

ikavigüe ani ikavimbae, jova re ko oyekuaa.

26Tova pukavɨi vae jae ko pɨayerovia omboyekuaa vae;

kïrii yaiko vae omboyekuaa mbɨatɨtɨ yemongeta rupi vae.