2 SAMUEL 20 - Guarani Bible with DC

Seba iñemopüa

1Jare oï joko pe metei kuimbae ipɨapochɨ yae vae, jee Seba, Bicri taɨ, Benjamín iñemuña pegua. Jae omoñeeuka mimbɨguasu jare jei: “¡Yande mbaetɨ ko ñanoi yekou David, Isaí taɨ re! ¡Pekua pero ae ae kotɨ, Israel pegua reta!”

2Jökorai opaete kuimbae reta Israel pegua oeya David, jare oyemboya reta Seba, Bicri taɨ re. Ërei opaete Judá pegua reta mbaetɨ oyembosɨrɨ mburuvicha guasu David güi, jae ko Jordán güive Jerusalén kotɨ.

3Jare David ojo ye ma oväe jo pe Jerusalén pe yave, opa oyokenda metei o pe jókuae payandepo kuña güɨrekoiño vae reta,2 S 16.22. oeya oyangareko vaerä jo re vae reta; joko peño omeeuka tembíu chupe reta; ërei mbaetɨ ye oasa jae reta ndive. Jökorai oyokenda reta, güɨreko reta imemano vae rami, opa regua omano reta.

4Jaɨkue rupi jei Amasa pe:

—Emboatɨ kuimbae Judá pegua reta cheve ndei mboapɨ ara mbove, jare eyu vi nde jae reta ndive cheróvai.

5Jare Amasa ojo omboatɨ vaerä kuimbae Judá pegua reta; ërei ou raiviä, jókuae mburuvicha guasu ara ombojee chupea pe.

6Jayave mburuvicha guasu David jei Abisai pe:

—Seba, Bicri taɨ oasa eteta oyapo ikavimbae yandeve Absalón güi. Ekua nde chesundaro reta ndive jare eaɨkuemoña, güɨramoi oväeta iyeupe tëta oñekëse kavi vae, jare ojoyepe yandegüi.

7Jayave ojo Abisai jupíe Joab isundaro reta, cereteo reta, peleteo reta jare opaete sundaro jëia vae reta; ñogüɨnoe reta Jerusalén güi oaɨkuemoña vaerä Seba, Bicri taɨ.

8Jare jae reta köi ma yogüɨraja Gabaón pe ita guasu oï vae güi yave, Amasa oë oövaiti reta. Joab oyemonde oiko temimonde ñeraro pegua pe, jare jemimonde ikuakuaa re güɨnoi ikɨsepuku jɨru pe vae, oë chugüi ojo jenonde kotɨ yave.

9Jayave Joab jei Amasa pe:

—¿Kërai pa reï cherëtara?

Joab oipɨɨ Amasa jendɨvaa pe, oovapɨte vaerä.

10Amasa mbaetɨ oecha kɨsepuku Joab ipo pe güɨnoi vae; Joab oikutu jɨe pe, jare oyekuavo ichuri ɨvɨ pe, omano voi oa, mbaetɨ ye oyuka ete. Javoi Joab jare tɨvɨ Abisai oaɨkuemoña ye Seba, Bicri taɨ.

11Jayave metei Joab isundaro oyemboɨ Amasa jetegüe iyɨpɨ pe jei reve:

—¡Joab jare David ndive ñogüɨnoi vae, tojo Joab jupíe!

12Amasa jekuae tape mbɨte pe oyapayere oï jugüɨgüe pe; jare opaete oasa vae ñavo oecha yave, oyemboɨ omae jese; jare jókuae kuimbae oecha kuae yave, ombosɨrɨ Amasa jetegüe tape güi, jare oyasoi metei temimonde pe.

13Jare ombosɨrɨ tape güi yave, opa oasa Joab jupiegua reta, oaɨkuemoña reta vaerä Seba, Bicri taɨ.

14Seba oasa opaete Israel iñemuña ñavo ñogüɨnoia rupi, ojoi oväe tëta Abel-bet-maaca pe, jare opaete Barim rupi; jare Barim pegua reta oyemboatɨ jare yogüɨraja jupíe reta.

15Jare Joab jupiegua reta yogüeru oväe yave, oñova reta Seba tëta Abel-bet-maaca pe, oyapo reta iyeupe kërai oïraro vaerä tëta guasu, jare oñeova opɨta jókuae tëta; jare opaete reve Joab jupiegua reta oïraro oitɨ vaerä tëta guasu ikësea.

16Jayave metei kuña iyarakuaa katu yae vae osapúkai tëta guasu ikësea güi jei reve:

—¡Peyeapɨsaka cheré! ¡Peyeapɨsaka cheré! ¡Pere mí Joab pe cheve, ou vaerä chemiari jae ndive!

17Jare Joab oya ou yave, jókuae kuña jei chupe:

—¿Jae pa nde Joab?

Jare jae jei:

—Jae ko che.

Jare jókuae kuña jei:

—Eyeapɨsaka kuae nderembiokuai iñee re.

Jare Joab jei:

—Ayeapɨsaka ko aï.

18Jayave jókuae kuña omboɨpɨ jei:

—Arakae ete yave jeise reta yepi: “Ikɨ̈reɨ oparandu mbae re vae, tojo toparandu tëta Abel pe.” Jare jökorai oyeapo kavi yepi oipotagüe teko.

19Kuae orerëta ko jae jeko kavi vae jare jupi kuae Israel pe vae, ¿maera pa reipota opa remboai kuae tëta tenondegua? ¿Maera pa reipota opa remboai yandeYa imbae?

20Jare Joab jei chupe:

—¡Ngaraa che jókuae ayapo! Mbaetɨ ko ayemongeta opa vaerä amboai aeya.

21Mbaetɨ ko jökorai. Oime metei kuimbae Efraín iñemuña reta güi oñemopüa mburuvicha guasu David kotɨ vae, jee Seba, jae ko Bicri taɨ. Emee jókuae kuimbae cheve, jare ajata kuae tëta güi.

Jayave jókuae kuña jei Joab pe:

—Romombota iñäkagüe ndeve, kuae tëta ikësea güi.

22Jayave jókuae kuña iyarakuaa katu yae ojo imiari ipoki rupi opaete vae ndive; oyasɨa reta Seba, Bicri taɨ iñäka, jare omombo reta Joab pe. Jayave Joab omoñeeuka mimbɨguasu, jare opa yogüɨraja reta jókuae tëta guasu güi jo ae ae kotɨ. Joab ojo ye mburuvicha guasu pɨri Jerusalén pe.

Mburuvicha reta David imborɨa(2 S 8.15-18; 1 Cr 18.14-17)

23Joab opɨta opaete sundaro reta Israel pegua juvicharä, Benaía, Joiada taɨ opɨta cereteo jare peleteo reta juvicharä.

24Adoram opɨta mbaemboepɨ reta iyangarekoarä, jare ombaekuatía vaerä opɨta, jae ko Josafat, Ahilud taɨ.

25Seva opɨta ombaekuatía vaerä, Sadoc jare Abiatar, jae ko sacerdote reta.

26Jare Ira, Jair pegua jae ko David isacerdote vi.