1Tɨnɨeasɨ ñee kavi chepɨa;
chekü ombaekuatía vae ilapi isɨrɨkɨ yae rami.
¡Amondota chetairari mburuvicha guasu pe!
2¡Nde ko jae kuimbae kavi opaete kuimbae reta güi vae!
¡Ñee kavi oë ndeyuru güi!
Jáeramo, Tumpa iporerekua nderé jekuae avei pegua.
3Jëia vae, ¡eñono ndekúa re ndekɨsepuku!
¡Jae ko ndearuandapa ndeyemboetea!
4Ndeyemboetea toë kavi ndeve,
eyapo jupi vae jare añete vae paravete vae reta pe.
¡Ndepo akatu tandemboe mbae tuichagüe re!
5Nderuvɨ jakuaroviasɨ ko,
pɨpe opata oa tëta reta nderóvai,
nderovaicho reta reñɨvota ipɨa pe.
6CheRu Tumpa, ndeguapɨa mborookuaía pegua
jae ko opambae jare jekuae avei vae;
ndepo pegua popoka mborookuaía pegua, jae ko jupi vae pegua.
7Reaɨu jupi rupi mbae oyeapo vae jare remotareɨ ikavimbae.
Jáeramo ndeparavo Tumpa, jae ko neTumpa;
yerovia katu omee ndeve vae ikavi yae,
neïru reta omboyerovia vae güi.
8Opaete nderemimonde ikäti kavi mirra pe, áloe jare canela pe;
temimbɨ reta tairari pegua pe ndembovɨakatu reta,
mburuvicha jo elefante jäimbukugüe pegua pe.
9Mburuvicha guasu reta tayɨ reta ñogüɨnoi
ndeɨvɨrigua imboetea yae vae reta ipɨte pe;
nderembireko oï ndeakatu kotɨ,
oñemopöra ikavi yae reve, oro Ofir pegua pe.
10Kuñatai, eyeapɨsaka kavi jaeta ndeve vae re:
Neakañɨ nerëtaɨgua güi jare nderu jo pegua reta güi,
11echa nepöra yae, ndepota yaeta mburuvicha guasu;
eyetavatɨka jóvai, echa jae ko ndeya.
12Tëta Tiro pegua kuña reta yogüeruta mbota ndive,
nemoñerata mboroparareko re oikokatu yae vae reta.
13¡Mburuvicha guasu tayɨ maepöra yae vae omopöra reïa!
¡Jemimonde imbopotɨa omopöra vae oro pegua!
14Temimonde oñemopöra kavi yae ndive oyererajata mburuvicha guasu jóvai,
kuñatai reta ndeiño etei kuimbae ndive oasa vae yogüɨrajata jae ndive,
jae reta ndive yogüeruta reïa pe.
15Yogüeru retata yerovia katu jare vɨakatu reve,
jökorai oike retata mburuvicha guasu jo pe.
16Mburuvicha guasu,
neñemuñagüe reta jendagüe pe oguapɨta nderaɨ reta,
jae reta remboguapɨta mburuvicharä opaete ndeɨvɨ rupi.
17Che amomaenduaukata nderee re,
opaete ñemuña reta jekuae avei rupi,
jare opaete vae reta ndemboete aveita.
Who We AreWhat We EelieveWhat We Do
2025 by iamachristian.org,Inc All rights reserved.
