1Antíoco, mburuvicha guasu Demetrio taɨ, omondo tupapire ɨguasu jembeɨ güi Simón pe, sacerdote ruvicha jare opaete judío reta juvicha pe, jare opaete tëta rupi.
2Tembikuatía jei körai:
“Mburuvicha guasu Antíoco omondo tamaraeme sacerdote ruvicha jare mburuvicha Simón pe, jaeramiño vi opaete judío reta pe.
3Jeko pochɨ vae reta oyemboiya cheramɨigüe reta iɨvɨ re, ërei che añererökuavee apɨ̈ro ye vaerä, oiko ye vaerä karamboe yave rami. Jae ramo, amboatɨ ye jeta sundaro reta jare añonondaivi ma tembiporu ñoraro pegua ɨguasu rupi oyeporu vae reta.
4Aipota aja agüeyɨ cherëta guasu pe, amboepɨuka vaerä cheɨvɨ güɨrokomegua vae reta pe jare jeta opa omboai tëta reta cheɨvɨ rupigua vae.
5Jáeramo, añave, che amoañete ye ndeve opaete yemongeta reta jaeramiño vi opaete mburuvicha guasu cherenondegua reta yembotuicha omee ndeve vae.
6Eyapo ndekorepoti ae peiporu vaerä jókuae tëta pe.
7Jerusalén jare itupao toyeyora. Opaete tembiporu reta reväe chupe vae, jare ñepɨ̈roa reta reyapo vae ani ramo ndepogüɨ rupi ñogüɨnoi vae reta, toiko jekuaeño ndembaerä.
8Ndepía mburuvicha guasu reta imbaeyekou renda pe vae jare kuae güi tenonde ndepiata vae, opa oyeɨ añave.
9Apɨ̈ro ye yave cheɨvɨ guasu, ameeta mbaemboete ndekotɨ, nerëtara kotɨ jare ndetupao pe, jërakua vaerä opaete ɨvɨ rupi.”
10Año ciento setenta y cuatro pe, Antíoco ou iɨvɨ pe yave, opaete isundaro reta oñemoïru jae ndive, jaimei ko Trifón ndive mbovɨ michi opɨta.
11Antíoco oaɨkuemoña Trifón, ërei jae oñepɨ̈ro ɨguasu jöke Dor pegua kotɨ.
12Oecha ma yave sundaro reta opa oeya, Trifón oecha teko yavai yaeta chupe.
13Antíoco oyembojeyupa Dor jóvai, ciento veinte mil sundaro ɨvɨ rupigua reta ndive jare ocho mil kavayu regua reta.
14Oikëse sundaro pe tëta guasu ramboeve, ɨguasu kotɨ rupi oimei vi okua jese vae. Jökorai, oike reta jókuae tëta guasu pe ɨvɨ rupi jare ɨguasu rupi, mbaetɨ etei omaeño kia oike ani oë yepe.
Yemongeta omboyoupíe Roma ndive15Jökorai ramboeve, Numenio jare iñeïru reta oyerova Roma kotɨ tupapire mburuvicha guasu reta peguarä vae ndive, kuae tupapire pe oyekuatía körai:
16“Lucio, romaɨgua reta icónsul, omondo tamaraeme mburuvicha guasu Tolomeo pe.
17Sacerdote juvicha Simón jare tëta judío pe, orerëtara jare oreïru reta, ombou orekotɨ reta ñee jeroataa reta rombopɨau vaerä karamboe yave yemongeta oreñomoïru pegua jare kɨ̈reɨ päve royapo vae.
18Güeru reta metei yeopiaka oro pegua cuatrociento treinta y seis kilo vae.
19Jáeramo, roikuatía opaete mburuvicha guasu reta tëta ñavo rupi peï vae pe agüɨye vaerä ma peyapo pɨ̈chɨi vae judío reta kotɨ, agüɨye vi peropüa ñoraro ikotɨ, jëta guasu kotɨ yepe ani ramo iɨvɨ guasu kotɨ, agüɨye vaerä vi peñemoïru judío reta jovaicho ndive.
20Roipɨɨ chugüi reta yeopiaka guasu güeru oreve vae.
21Oime yave judío jeko pochɨ vae reta osɨi jëta güi ojo oväe peve, pemboasa sacerdote juvicha Simón kotɨ, jae omboepɨuka vaerä chupe reta imbaeyavɨ jae reta iporookuai jeia rupi.”
22Jökoraiño vi ombaekuatía mburuvicha guasu Demetrio pe, Atalo, Ariarate, Arsaces,
23jare opaete tëta guasu reta rupi, jae ko: Esparta, Delos, Mindos, Sición, Caria, Samos, Panfilia, Licia, Halicarnaso, Rodas, Faselis, Cos, Side, Arvad, Gortina, Cnido, Chipre jare Cirene rupi.
24Sacerdote juvicha Simón pe omondo reta kuae kuatía iñeïru.
Antíoco VII oñomoïru poi Simón ndive25Mburuvicha guasu Antíoco oyembojeyupa Dor ikupe kotɨ, jare oyaporai yae jokotɨ rupi; oyapo tembiporu ñoraro pegua jare oikëse Trifón agüɨye vaerä kia oike ani oë yepe.
26Simón omondo Antíoco pe dos mil sundaro oyeparavogüe vae, omborɨ vaerä, jare vi oro, korepoti jare tembiporu reta ñoraro pegua.
27Ërei Antíoco mbaetɨ oipɨɨ, jare omboai opaete yemongeta tenonde yave oyapo Simón ndive vae, jökorai ombosɨrɨ iyeugüi.
28Mburuvicha guasu reta ipɨte güi omondo Atenobio, imiari vaerä Simón ndive, jare güɨraja kuae ñee: “Pe reta peyemombae Jope re, Gezer jare tëta mí Jerusalén pegua re, kuae tëta reta jae ko cheɨvɨ pegua.
29Pemboai jókuae ɨvɨ reta, jeta mbae pɨ̈chɨigüe peyapo jókuae tëta pe jare opa peyemboiya tëta reta cheɨvɨ pegua re.
30Jáeramo, añave pemboyevɨ ye cheve jókuae tëta reta pepɨ̈ro chegüi vae, jare pemee oreve impuesto reta peekɨ ɨvɨ Judea güi ikatu kotɨ rupi vae,
31ani ramo, jekovia pe pemboepɨ diecisei mil quiniento kilo korepoti jare pemoïru ye vi pemboepɨ vaerä tëta reta pemboaigüe jare impuesto peekɨ chugüi vae. Mbaetɨ yave, aropüata ñoraro pekotɨ.”
32Mburuvicha guasu ichëi, Atenobio, ojo Jerusalén kotɨ yave ipɨakañɨ yae Simón iyemboete re, jembíu rɨru oro jare korepoti pegua, jare opaete imbaeyekou re, joko güi omombeu Simón pe mburuvicha guasu iñee.
33Simón jei: “Ore mbaetɨ ropɨ̈ro ɨvɨ mbuae, mbaetɨ vi royemboiya mbae ambuae re, echa kuae reta jae ko oreɨpɨ reta oeya oreve vae, karamboe yave orerovaicho reta oyemboiya jupimbae reve jese vae ko.
34Oreve añave jëgua ramo ko ropɨ̈ro ye oreɨpɨ reta oeya orevegüe.
35Jope ani Gezer regua nde reiporu reï vae: Kuae tëta reta jeta yae mbae pɨ̈chɨi vae oyapo orerëta jare oreɨvɨ kotɨ, jáeramo, jese reta rogüɨrökuavee ndeve tres mil tresciento kilo korepoti.”
36Atenobio mbaetɨ iñee omoë. Oyerova pochɨ reve mburuvicha guasu kotɨ, jare omombeu chupe Simón iyemongeta, imiari vi chupe Simón imbaeyekou re jare opaete oechagüe re. Mburuvicha guasu iyarasɨ tuicha opɨta.
37Jökorai ramboeve, Trifón oyeupi guataka ɨguasu pegua pe osɨi vaerä Ortosia kotɨ,
38jayave mburuvicha guasu ombojee Cendebeo tuvicharä ɨguasu jembeɨ rupi, omee chupe sundaro reta ɨvɨ rupigua jare kavayu regua reta.
39Oyókuai reta oñemokätɨro vaerä Judea jóvai, omopüa ye vaerä Cedrón jare omotïi vaerä öke reta okua vaerä oyoe judío reta re. Jökorai ramboeve mburuvicha guasu oaɨkuemoña Trifón.
40Cendebeo ojo oväe Jabnia pe jare omboɨpɨ omoambeko jokuaeɨgua judío reta, oguata opaete Judea rupi oporopɨɨ vaerä jare oporoyuka vi jeta.
41Omopüa ye Cedrón jare oñono joko pe kavayu regua reta jare ïru sundaro reta, oë vaerä oguata Judea jape rupi, mburuvicha guasu oyókuai rami.
Who We AreWhat We EelieveWhat We Do
2025 by iamachristian.org,Inc All rights reserved.
