TOBIT 14 - Guarani Bible with DC

1Körai Tobit omboapɨ imbaemboete Tumpa kotɨ

Yemboarakuaa oñemee Tobías pe vae jare Tobit imano regua

2Tobit omano ciento doce añoa pe, jare oñotɨ reta mbaemboete reve Nínive pe. Jesaä oiko yave güɨnoi sesenta y dos año. Joko güi omae ye güire oiko ikavi, oyapo ye oiko mbaravɨkɨ mboroparareko pegua, jare jekuaeñoi omboete oiko Tumpa jare oikuaauka oiko imbaepuere vae.

3-4Jare omanota ma oï yave, oenɨi taɨ Tobías jare omee chupe kuae yemongeta reta:

“Cheraɨ, ekua jarembaeño nemichia reta ndive Media pe, echa che arovia Tumpa iñee re, ñeemombeúa Nahúm rupi jei Nínive kotɨ vae re. Opaete ko oyeapota, opaete ko oikota, opaete ñeemombeúa Israel pegua reta, echa Tumpa, ombougüe reta, jeigüe vae, oyeapota ko Asiria pe jare Nínive pe. Iñee jeigüe vae ngaraa oyeapombae. Kuae outa ko oväe iara pe. Media pe räri ko oasata kuri Asiria güi ani Babilonia güi. Che aikuaa aï opaete Tumpa jeigüe vae, opaete ñee jeigüe vae ngaraa oyeapombae.

Jare opaete ñanerëtara reta yogüɨreko Israel pe vae opata oñemoai jare oyererajata iɨvɨ ikavi vae güi tembiokuairä, jare tëta guasu opɨtata ñuu rami. Samaria jare Jerusalén jaenunga vi opɨtata ñuu rami. Tumpa itupao oyeeyata jare oyeapɨta kuri.

5Ërei Tumpa oyerova yeta omae jese iporoaɨu reve jare opa yeta omboyerova kuri ɨvɨ Israel pe. Pemopüa yeta kuri tupao, yepe mbaetɨta ipöra tenondegua rami, ou regua oväe ara. Opa ma oyerova ye vae yave, opaete reve omopüa yeta kuri Jerusalén ikavigüe vae jare tupao vi oñemopüa yeta kuri Tumpa jembiokuai Israel pegua reta jei rami.

6Jare opaete tëta guasu reta jare kuimbae reta oyerovata Tumpa kotɨ. Mbaemboete omeeta chupe jare opata oeya reta itumpa-raanga reta, echa jaeño ombotavɨ güɨreko reta, jare jae oitɨ reta pɨ̈chɨi vae chupe. Omee retata mbaemboete opaete iTumpa pe.

7Opaete Israel-ɨgua reta oasayepe jókuae ara vae imaendúa retata Tumpa re jupi rupi. Oyemboatɨta jare yogüɨrajata Jerusalén pe, jare yogüɨreko pɨagüive yeta Abraham iɨvɨ pe; oyemboiya reta yeta jese. Jare Tumpa añete ete oaɨu vae reta, oyeroviata, ërei mbaeyoa oyapo vae reta; jare ikavimbae oyapo vae, opata oñemokañɨtei jókuae tëta guasu güi.

8-9Añave, cheraɨ, kuae re royokuaita: Peyeokuai Tumpa pe añetete pegua jare peyapo jae jemimbota, pemboe pemichia reta oyapo vaerä jupi vae, jare mbaravɨkɨ mboroaɨu pegua vae. Timaendúa reta Tumpa re, jee tomboete reta añetegüe rupi opaete mbaepuere ndive. Jare nde, cheraɨ michi, ekua kuae Nínive güi, agüɨye epɨta kuae pe. Jare ndechi omano yave eñotɨ cheɨpɨ pe, jare jókuae ara voi ekua, agüɨye ye emboasa pɨ̈tu kuae pe. Echa aecha kuae pe täta oï mbae ikavimbae jare marambae reve oyeapo yembotavɨ reta.

10Cheraɨ, emae Nadab jare Ajicar oyapogüe re imbokuakuaa reta oñotɨ jekove reve. Ërei Tumpa omboepɨ Nadab pe omomaraiuka ïru vae reta jóvai. Jare Ajicar oë yevɨ tembipe pe, jare Nadab oa pɨtumimbi pe iyapɨ vae pe, echa ikɨ̈reɨ tëi oyuka Ajicar. Ërei, Ajicar ko jae mbota omee katu vae, jare oë ye jókuae yemboavai oyeapo tëi chupe vae güi, ërei Nadab oa pɨpe jare omano.

11Reecha pa, cheraɨ, mbaravɨkɨ yemborɨ pegua jekovia vae, jare reecha vi mbae ikavi mbae vae oyapo vae güeru mano. Ërei che jaema cherekove opa…”

Jaema jayave oñono reta tupa pe, jare omano. Joko güi oñotɨ reta mboromboete reve.

Tobías regua miari iyapɨ

12Jare Tobías ichɨ omano yave oñotɨ tu iyɨke pe. Jare jae jembireko ndive opa yogüɨraja Media pe jare yogüɨreko Ecbatana pe jovaya, Ragüel oïa pe.

13Tobías oyangareko jovaya re mboromboete reve jare oñotɨ vi Ecbatana pe Media pe jare opa mbaeyekou reta opɨta chupe Ragüel, jare Tobit imbaegüe.

14Omano ko ciento diesisiete añoa pe, mboromboete reve.

15Ndei omano mbove oikuaa ma opata ko Nínive oñemokañɨtei vae, jare oecha jokuaeɨgua reta opa oyererajauka tembiokuairä Media pe Ciaxares ndive vae, jae ko mburuvicha guasu Media pegua vae. Jayave omboete Tumpa opaete mbae oyapo jae reta ndive Nínive jare Asiriaɨgua reta pe vae re. Ndei omano mbove oyerovia Nínive opata kuri okañɨtei vae re, jare omboete yandeYa, Tumpa oiko opaete ara rupi vae re.