EZEQUIEL 45 - Guarani Bible with DC

Ɨvɨ oñeñono tee Tumpa peguarä vae(Ez 48.9-20)

1Ɨvɨ pemboyao oyoupe yave, pembosɨrɨta yandeYa pe doce kilómetro y medio pukugüe jare payandepo kilómetro ipɨgüe; opaetei kuae ɨvɨ oñeñono teeta Tumpa peguarä.

2Joko pe oñeñono teeta tupao peguarä, dosciento cincuenta metro pukugüe jare dosciento cincuenta metro vi ipɨgüe; jare iyɨ́vɨri rupi güɨnoita mɨmba ikaruarä, veinticinco metro ipɨgüe.

3Kuae oñejäa oï vae güi oñejäata doce kilómetro y medio pukugüe jare cinco kilómetro ipɨgüe, joko pe oïta tupao jare o oñeñono tee kavi yae vae.

4Kuae ɨvɨ oñeñono tee vae oikota sacerdote reta peguarä, tupao pegua mbaravɨkɨ oyapo vae reta, yandeYa pe oyeokuai vae reta. Joko pe güɨnoi retata jo, jare oñeñono tee kavi yaeta tupao jendarä.

5Jaeramiño vi doce kilómetro y medio ipukugüe jare cinco kilómetro ipɨgüe, toñeñono tee Leví iñemuña reta tupao pe oyeokuai vae reta peguarä, joko pe yogüɨreko vaerä, veinte cuarto vae pe.

6Tëta guasu jendarä pejäata doce kilómetro y medio pukugüe jare mókoi kilómetro y medio ipɨgüe, tupao peguarä oyemboyao vae jóvai. Kuae ɨvɨ oikota opaete Israel iñemuña reta imbaerä.

Ɨvɨ oñeñono tee mburuvicha imbaerä vae(Ez 48.21-22)

7Mburuvicha imbaerä vae oïta tupao peguarä oyemboyao vae iyɨpɨ pe. Metei yemboyao oïta kuaraɨ oëa kotɨ jare ïru oïta kuaraɨ oikea kotɨ, ɨvɨ oñeñono tee vae jovaicho icho kotɨ, jare ɨvɨ oyemboyao tëta guasu jendarä vae jovaicho kotɨ. Kuaraɨ oëa kotɨ jare kuaraɨ oikea kotɨ oyovakeñota güɨnoi pukugüe jare ipɨgüe.

8Kuae ɨvɨ güɨnoita mburuvicha reta Israel pegua imbaerä; jökorai ngaraa ye ma mburuvicha reta güɨrekoasɨ katu chembae vae reta, omaeiño retata Israel iñemuña reta pe ɨvɨ oñemee ñemuña ñavo rupi vae re.

Kërai mburuvicha reta oporookuai vaerä

9Che ndeYa Tumpa jae körai: ¡Joko peño mo, mburuvicha reta Israel pegua! Peeya mo teko pɨ̈chɨi yae vae, maepɨ̈ro. Peyapo jupi vae jare isɨmbi vae; agüɨye pepɨ̈ro ɨvɨ chembae vae reta güi.

10Peiporu mbaejäaka reta ikavi vae jare mbae oñejäa pɨpe vae mbaetɨta pemanaro pɨpe vae. jare bato toyovakeño togüɨnoi ipoɨgüe: Bato togüɨnoi veintidó kilo ipoɨgüe, jae ko payandepo bato vae güi metei homer, jare efa jökoraiño vi; jókuae reta rupi oñejäata homer.

12Siclo togüɨnoi veinte geras. Sesenta siclo, jae ko oyeapo metei mina.

13Kuae ko jae mbota Tumpa pe pemeeta vae: Pemeeta petrigo jare cebada sesenta jɨru güi, metei jɨru mbotarä Tumpa pe.

14Jaeramiño vi asaite güɨnoi vae pe: Omboyaota cien litro, chugüi pemeeta metei mbotarä Tumpa pe.

15Dosciento vecha vae güi oñemeeta metei vecha, oyemongɨra kavi yae vae Israel pegua. Kuae ko jae mɨmba oyeyukagüe opaetei oyeapɨ vaerä, mbota yembopɨakatu peguarä, mɨmba oyeyuka Tumpa iñɨ̈ro mbaeyoa re vaerä. Che ndeYa Tumpa jae kuae.

16Opaete vae reta omee tai ko mbota, Israel pegua mburuvicha peguarä,

17ërei mburuvicha oïta omee vaerä mɨmba oyeyukagüe opaetei oyeapɨ vae jare mbota temitɨ jäɨgüe jare vino oyepɨyere vae arete ikavi yae vae pe, yasɨ pɨau pe, ara mbutuu pegua pe jare opaete arete ñavo pe, tëta Israel pegua reta peguarä.

Arete Pascua

18Che ndeYa Tumpa jae körai: Tenondegua yasɨ re, tenondegua ara pe, peipɨɨ guaka reta ipɨte güi metei toro taɨrusu vae, jete kavi vae, peitɨo vaerä pɨpe tupao mbaeyoa güi.

19Sacerdote tomboɨru jókuae mɨmba oyeyuka vae cheɨ̈ro vaerä mbaeyoa re vae jugüɨgüe, jare toipichɨ tupao jöke-ɨta reta re jare mɨmba oyeyuka oyeapɨ jese vae iekina ñavo re, jare tupao joka michi vae jöke-ɨta re.

20Jökorai peyapo chiu araa pe, tenondegua yasɨ re, oikuaambae reve ombaeyavɨ vae re ani oporombotavɨ rupi oyapo yave mbaeyoa vae re, jare pemee mɨmba oyeyukagüe cheɨ̈ro vaerä mbaeyoa re vae. Jökorai oyetɨota tupao.

21Yasɨ tenondegua, catorce araa pe peyapota arete Pascua, arete chiu ara vae, jókuae ara reta rupi oyeuta mbɨyape oyembovumbae. temitɨ jäɨgüe jare metei hin olivo iasaite.

25Chiúa yasɨ pe, quince araa pe, arete o ñairaka pegua pe,Lv 23.33-36; Nm 29.12-38. peyapota vi kuae chiu ara arete Pascua pe peyapo rami, pemeeta mɨmba yeyuka Tumpa iñɨ̈ro vaerä mbaeyoa re vae, mɨmba oyeyukagüe oyeapɨ vae, mbota temitɨ jäɨgüe jare olivo iasaite.