SABIDURÍA 4 - Guarani Bible with DC

1Ikavi yae ko agüɨye ñanemichia ërei ñanoita arakuaa;

echa arakuaa jaeñoi oeya mbae ikavigüe yandemaendúa vaerä jese

jókuae jae ko mbae okañɨmbae ma:

Tumpa jare kuimbae reta pe ipöra.

2Oime oï yave, kuimbae reta oyemboe jese;

mbaetɨ oï yave, imaendúa reta jese;

jare oyoaɨkue ɨkue oguata reta iyapɨmbae vae reve, oyeapota oporomoamɨri vae rami,

oupitɨ ramo mbae ikavigüe vae

jare jupi rupi oïraro mbae güɨrosɨrɨ vaerä iyeupe.

3Jeta ko ipɨapochɨ vae jëtara reta ngaraa mbae güɨreko;

jare michia reta aguasa rupi oyeapo vae metei temitɨ japo ojombae ɨ́vɨkotɨ vae rami ko

jare ngaraa iyɨpɨ täta oyemboɨ.

4Yepeta mbovɨ ara rupi jäka jokɨ katu oiko,

ërei iyɨpɨ mbaetɨ täta oï jeko pegua

ɨvɨtu omokanata ko

jare ɨvɨtuai oapomondorota.

5Jäka jarembae opëta,

jare iagüe ikavi potaä, ngaraa etei mbaerä ikavi

ngaraa otɨ̈aro jare ngaraa vi kia jou.

6Michia reta vɨari pe oyeapo vae güi oa vae

jae ko tu reta jeko kavimbae omboyekuaa jese vae,

Tumpa oenɨi reta iporojäa renda pe yave.

Jeko kavi vae jarembae omano vae

7Jeko kavi vae, yepeta ko jarembae omano ërei oputuuta ko,

8echa indechi vae yamboete vae

güiä ko ou oiko puku vaerä,

jare iaño yaipapa güiä ko.

9Arakuaa äkatï rami ko güɨnoi yemboete,

jare kia ikɨambae reve oiko vae okuakuaagüe vae rami ko.

10Jeko kavi vae omboyerovia ko Tumpa, jare Tumpa oaɨu vi;

oikose yepi iyoa vae reta ndive, jaema Tumpa güɨraja;

11oupi agüɨye vaerä mbae ikavimbae iyemongeta omongɨa,

jare mbaeyavɨ reta agüɨye vaerä jekove ombojopa,

12echa, imbaekuaa vae rami ko, mbae ikavimbae ombopɨtumimbi ikavigüe vae

jare mbae oipotai vaeño ko jekombae vae jekove omongɨa.

13Jae jarembae pegua oyeapo kavi

jókuae nunga ko ɨma año rupi oyeapo vae.

14Echa jekove täta omboyerovia Tumpa,

jókuae ramo Tumpa jarembae oekɨ ikavimbae vae güi.

Ïru vae reta oecha jókuae, ërei mbaetɨ oikuaa reta;

oikuaa etei

15jókuae Tumpa oiparavo vae reta

yogüɨreko iporoaɨu rupi jare iporoparareko rupi vae,

jare jae etei ko oyangareko jëta ikɨambae vae pe.

16Ipɨa ikavi vae omano yave oyepopeyu ko ipɨapochɨ vae reta oimeño oikove ñogüɨnoi vae pe,

jare taɨrusu vae jarembae ma oyeapo kavi yave

oyepopeyu ko jókuae ipɨapochɨ reve indechi ojo oiko vae pe.

17Kuimbae reta oechata ko iyarakuaa vae imano

ërei ngaraa oikuaa reta mbae ko Tumpa oipota jae ndive vae,

jare maera ko oñono metei tenda jëguambae pe vae.

18Omae retata jese jare güɨröɨro retata,

ërei Tumpa opukata jese reta.

19Jae reta omano yave, ngaraa etei kia oyemoambeko jese,

jare yogüɨrekota ko ñereröɨro opambae rupi omanogüe reta ipɨte rupi.

Omeembae imiari vaerä reve, Tumpa etei omombota iñäka ɨ́vɨkotɨ ojo reve,

omondorota iyɨpɨ reve

jare opaeteita omokañɨtei.

Yogüɨrekota mbɨatɨtɨ rupi,

jare ngaraa etei kia imaendúa jese reta.

Ipɨakavi vae reta jare ipɨapochɨ vae reta iñejäa

20Tumpa omae ma yave jekopochɨ vae reta imbaeyoa re

jókuae reta täta okɨɨye reve ko yogüeruta

jare joko pe ikavimbae oyapogüe oyekuaata chupe reta.