1 REYES 14 - Guarani Bible with DC

Ahías omombeu Jeroboam maratuta oasa vae

1Jókuae ara rupi Abías, Jeroboam taɨ imbaerasɨ.

2Jare Jeroboam jei jembireko pe:

—Añave epüa jare eyemonde ambuaeyee, agüɨye vaerä ndekuaa reta cherembireko ko nde vae, jare ekua Silo pe; echa joko pe oime oï ñeemombeúa Ahías, kuae tëta pe mburuvicha guasurä aïta vae omombeu cheve vae.

3Jare eraja ndepo pe payandepo mbɨyape, jare torta, jare metei jɨru ei, jare ekua ikotɨ, omombeu vaerä ndeve maratuta ra kuae michia vae.

4Jare Jeroboam jembireko jökorai oyapo; opüa ojo Silo kotɨ, jare ojo Ahías jo pe. Ahías mbaetɨ ma ipuere oporoecha, jäve ma omae indechi yae jeko pegua,

5ërei ngatu yandeYa jei yepe Ahías pe: “Ko Jeroboam jembireko outa oparandu ndeve imembɨ imbaerasɨ oï vae regua; köraita rere chupe, echa jae ou yave, oyemoambuaeta ou.”

6Jare Ahías oendu oike ou öke pe yave, jei chupe:

—Eike Jeroboam jembireko. ¿Maera pa reyemonde ambuae reyu? Mase, Tumpa cheokuai amombeu vaerä ndeve ñee jasɨ katugüe,

7ekua jare ere Jeroboam pe: “Körai jei yandeYa Israel iTumpa: ‘Echa che ko romopüa tëta güi, jare roñono tëta Israel chembae vae re juvicharä.

8Apɨ̈ro mborookuaía David iñemuña güi, jare amee ndeve; jare nde mbaetɨ cherembiokuai David rami, cheporookuai oñovatu vae jare oguata cheróvai opaete ipɨa reve kavi, oyapo reve sɨmbi vae cheresa róvai.

9Ërei ngatu reyapo ikavimbae vae, opaete tenonde yogüɨreko ndegüi vae reta güi, chemboarasɨ vaerä nde reo jare reyapo tumpa ambuae reta, jare jiero tɨkuigüe pe reyapo mbae iägüe, jare chemombo ndeyeugüi;

10jáeramo, ko che aru Jeroboam jo pegua reta re mbae ikavimbae, jare amboaita Jeroboam güi opaete kuimbae reta,1 R 15.29. tembiokuai reta ani tembiokuaimbae reta Israel pegua; atupeita Jeroboam iñemuña re tepoti oyetupei rami, opa regua.

11Tëta guasu pe omano yave Jeroboam iñemuña, yaɨmba reta jouta, jare kaa pe omano yave, uruapúa reta jouta; echa che ndeYa ko jae jökorai.’

12Jare nde kuña epüa jare ekua ndero kotɨ; jare tëta guasu pe reo reväe ñoete, kunumi omanota.

13Jare opaete Israel pegua reta oäpirota jare oñotɨta, echa Jeroboam iñemuña reta güi jaeño ete ko oñeotɨta, echa jeseño oñeväe ikavi vae Jeroboam iñemuña reta güi, yandeYa Israel iTumpa jesa róvai.

14Jare yandeYa omopüata iyeupe metei mburuvicha guasu Israel pe, jókuae oguapɨ rupive omboaita Jeroboam iñemuña reta; oyapota añave voi.

15YandeYa omokanata Israel ɨ omokana täkuarasɨ reta rami. Güɨnoeta kuae ɨvɨ kavi oñemee iñemuñagüe reta pe vae güi, jare omombota ɨ̈aka Éufrates kutɨ, oyapo reta ramo iyeupe Asera iä reta, pɨpe omboarasɨ yandeYa.

16YandeYa omeeta Israel, Jeroboam iyoa jeko pegua jare oitɨuka Israel pegua reta mbaeyoa pe vae jeko pegua.”

17Jayave Jeroboam jembireko opüa ojo, jare ou tëta Tirsa jee vae pe; jare öke pe oikemí ma yave kunumi omano.

18Oñotɨ reta, jare ipɨatɨtɨ reta jese opaete Israel pegua reta, yandeYa jei rami, echa jae imiari iñeemombeúa Ahías rupi.

19Ïru mbaembae Jeroboam oyapogüe, ñeraro reta oyapogüe, jare kërai ko oiko mburuvicha guasurä vae, oime opaete oyekuatía oï tembikuatía pe, Israel pegua mburuvicha guasu reta regua oyekuatía oïa pe.

20Veintidó año oiko Jeroboam mburuvicha guasurä; jare omano yave taɨ Nadab oguapɨ jekovia pe mburuvicha guasurä.

Roboam oiko Judá pe(2 Cr 12.1-16)

21Roboam, Salomón taɨ oiko mburuvicha guasurä Judá pe. Cuarenta y un año güɨnoi yave omboɨpɨ oï, jare diecisiete año oiko mburuvicha guasurä Jerusalén pe, tëta yandeYa oiparavo opaete Israel iñemuña reta güi vae, joko pe oñono vaerä jee. Ichɨ jee Naama, Amón iñemuña pegua.

22Jare Judá oyapo ikavimbae vae yandeYa jesa róvai, jare omboarasɨuka yae opaete iñemuñagüe reta mbaeyoa oyapogüe güi,

23echa omopüa reta vi mbaemboete renda, tumpa-raanga reta jare Asera iä reta ɨvɨtɨ ñavo re, jare opaete ɨvɨra iküaraɨa kavi yae vae reta igüɨ rupi.2 R 17.9-10.

24Oime vi kuimbae reta japicha ndive oasa vae rupi ombaemboete vae,Dt 23.17. ikavimbae oyapo ïru tëta reta rami, jókuae tëtaguasu reta yandeYa opa güɨnoe omombo Israel iñemuña reta jenonde güi vae jeko rami.

25Pandepoa año ma Roboam oiko mburuvicha guasurä yave, oporepeña Sisac mburuvicha guasu Egipto pegua Jerusalén re,2 Cr 12.2-8.

26jare opa opɨ̈ro yandeYa jo pe mbaembae jepɨ vae oñeñovatu vae jare mburuvicha guasu jo pe mbaembae jepɨ vae oñeñovatu vae opaetei güɨnoe; opaetei vi güɨraja yeopiaka oro pegua Salomón oyapogüe.1 R 10.16-17; 2 Cr 9.15-16.

27Jókuae reta jekovia pe mburuvicha guasu Roboam oyapo yeopiaka jiero iyu vae pegua, jare omee sundaro öke iyangarekoa reta juvicha reta pe; jókuae mburuvicha jöke re oyangareko vae reta pe.

28Jare mburuvicha guasu ojo yandeYa jo pe ñavo, sundaro oporoäro vae reta güɨraja. Javoi güeru ye oñono reta oñeñovatúa pe oyerova reta ye yave.

29Roboam regua jare opaete oyapogüe oyekuatía oï tembikuatía pe, jókuae Judá pegua mburuvicha guasu reta regua oyekuatía oïa pe.

30Jare oñeraro avei oyoupii Roboam jare Jeroboam ndive, opaete ara oikove yogüɨreko ramboeve.

31Jare Roboam omano jare oñotɨ reta iñemuñagüe reta jɨvɨa oïa pe, David Jëta guasu pe. Ichɨ jee Naama, Amón iñemuña pegua. Jare taɨ Abiam oguapɨ jekovia pe mburuvicha guasurä.