ÉXODO 27 - Guarani Bible with DC

Mɨmba oyeyuka oyeapɨ jese vae jiero iyu vae pegua(Ex 38.1-7)

1Toyapo reta vi mɨmba oyeyuka oyeapɨ jese vae ɨvɨra käti pegua, ipɨgüe togüɨnoi mókoi metro veinticinco centímetro päve irundɨ reve iyɨke, jare ɨvategüe togüɨnoi metei metro veinticinco centímetro.

2Jare irundɨ iekina ñavo re, toyapo reta chupe guakarätiecha vae, metei güiño toyeapo mɨmba oyeyuka oyeapɨ jese vae ndive jókuae guakarätiecha vae reta, jókuae mɨmba oyeyuka oyeapɨ jese vae toñova reta jiero iyu vae pe.

3Opaete mɨmba oyeyuka oyeapɨ jese vae pegua tembiporu reta, toyeapo jiero iyu vae pegua, tanimbu jɨru, sɨpe, tasa guasu, tätapɨi imomboa jare tätapɨi jɨru.

4Jare toyapo reta mɨmba oyeyuka oyeapɨ jese vae japɨpe peguarä vae, güɨrapembɨecha vae jiero iyu vae pegua, jókuae toñono reta irundɨ argolla jiero iyu vae pegua, irundɨ ekina ñavo re.

5Jare jókuae güɨrapembɨecha vae toñono reta mɨmba oyeyuka oyeapɨ jese vae japɨpe, opɨta vaerä mɨmba oyeyuka oyeapɨ jese vae ikúa pe.

6Toñopa reta vi ɨvɨra käti, ɨvɨra oyepɨasa vae retarä, mɨmba oyeyuka oyeapɨ jese vae reguarä, jare toñova reta jiero iyu vae pe.

7Jare ɨvɨra oyepɨasa vae reta toñeësɨvo argolla reta rupi, jare toñogüɨnoi mɨmba oyeyuka oyeapɨ jese vae iyɨke yɨke re, ipuere vaerä oyereraja.

8Oasavi toyapo reta jókuae mɨmba oyeyuka oyeapɨ jese vae, jare ɨvɨra pegua, ɨvɨtɨ re aechauka iä ndeve rami toyapo reta.

Tupao guakapi pegua joka(Ex 38.9-20)

9Toikëse reta vi tupao guakapi pegua jokarä. Arayevɨ kotɨgua togüɨnoi asoya lino oñepövagüe, cuarenta y cinco metro pukugüe metei jovaicho kotɨ.

10Veinte poste, jare veinte iguapɨka toyeapo jiero iyu vae pegua; poste itɨ̈ai jare iyapɨte regua korepoti pegua.

11Jökoraiño vi ɨvɨtuguasu kotɨgua oka, togüɨnoi asoya cuarenta y cinco metro pukugüe, veinte poste jare veinte iguapɨka jiero iyu vae pegua; poste itɨ̈ai jare iyapɨte regua korepoti pegua.

12Oka kuaraɨ oikea kotɨgua togüɨnoi asoya veintidó metro y medio ipɨgüe vae, payandepo poste jare payandepo vi iguapɨka.

13Jare oka kuaraɨ oëa kotɨgua togüɨnoi asoya veintidó metro y medio ipɨgüe vae.

14Jare öke iyɨke kotɨgua asoya togüɨnoi chiu metro pukugüe, mboapɨ ɨvɨra jare mboapɨ iguapɨka;

15jare öke jovaicho kotɨgua asoya togüɨnoi chiu metro pukugüe, mboapɨ ɨvɨra jare mboapɨ iguapɨka.

16Jare toyeapo öke reguarä asoya chau metro pukugüe vecharaagüe inimbo jovɨ vae, pɨ̈taü vae, pɨ̈taasɨ vae jare lino oñepövagüe pegua, ipoki ombaapo vae jembiapo jare togüɨnoi irundɨ ɨvɨra jare irundɨ iguapɨka.

17Opaete oka ikësea poste iyapɨte regua reta toyeapo korepoti pegua, itɨ̈ai reta korepoti pegua jare iguapɨka reta jiero iyu vae pegua.

18Oka togüɨnoi cuarenta y cinco metro ipukugüe jare veintidó metro y medio ipɨgüe, jökorai vi jovaicho kotɨ, jare mókoi metro veinticinco centímetro ɨvategüe, iyasoya reta lino oñepövagüe pegua jare iguapɨka reta jiero iyu vae pegua.

19Opaete tembiporu reta jare etaka reta tupao guakapi pegua, jare opaete etaka reta oka ikësea regua jiero iyu vae pegua katuai toyeapo.

Asaite mechero peguarä(Lv 24.1-4)

20Eyókuai Israel iñemuña reta togüeru ndeve temitɨ olivo ia oyeapasogüe iasaite oyeambae, jendɨ avei vaerä mechero.

21Aarón jare taɨ reta toñogüɨnoi oyangareko vaerä jese, jendɨ vaerä cheróvai pɨ̈tu-ɨpɨ güive köe regua tupao guakapi pegua pe, käjou yemomaendúa pegua jóvai oï asoya vae güi ikatu pe. Kuae mborookuai toï jekuae avei pegua Israel iñemuña reta pe, jare jaɨkue rupigua reta pe.