1Tëta chembae vae reta, peyeapɨsaka, cheporookuai re;
¡pemboɨke peapɨsa cheñee reta kotɨ!
2Chemiarita ñee arakuaa pegua;
chemiarita mbae oñemi oiko arakae güive vae re.
3Kuae reta yaendu jare yaikuaa;
echa ñaneñemuñagüe reta imiari kuae re yandeve,
4agüɨye yaikuaku yanderaɨ reta güi,
ñanemiari taɨkue yogüɨrekota vae reta pe,
yandeYa Tumpa pe mbaemboete oñemee vae,
imbaepuere yae vae re jare mɨakañɨ reta oyapogüe re.
5Jae oñono iporookuai Jacob peguarä,
jare oñono mborookuai Israel peguarä;
kuae re oyókuai ñaneñemuñagüe reta, oikuaauka vaerä taɨ reta pe.
6Oikuaa vaerä ñemuña taɨkue rupi yogüɨrekota vae reta,
jare oa yeta vae reta;
jókuae reta imiari yoapɨ yeta taɨ reta pe.
7Tumpa reño oyeko reta vaerä,
agüɨye vaerä iñakañɨ reta Tumpa oyapogüe güi;
oyapo avei vaerä iporookuai reta,
8agüɨye vaerä iñemuñagüe reta rami:
Ipɨarai reta jare ipɨapochɨ reta,
mbaetɨ metei reño iyemongeta reta.
¡Tumpa kotɨ ave mbaetɨ jupigüe oyapo reta!
9Efraín iñemuña reta, uvɨ regua reta;
ñeraro iara pe opa oyerova reta ye,
10mbaetɨ omboete reta Tumpa iporogüɨrökuavee päve,
mbaetɨ vi oipota reta oyapo jae iporookuai,
11iñakañɨ reta jae oyapogüe güi,
jókuae mɨakañɨ oechauka chupe reta vae güi.
12Tumpa oyapo mɨakañɨ reta iñemuñagüe reta jóvai,
Egipto pe,
14Ara pe güɨroata reta metei jɨsɨ vae amapɨtu rupi,
jare pɨ̈tu yave metei jɨsɨ tata omboesape
17Ërei jeseve jae reta jekuaeñoi iyoa Tumpa kotɨ;
oyembopɨapochɨ reta Tuichagüe yae ete vae kotɨ ñuu pe.
18Echa ojäa reta Tumpa,
oiporu reta jembiurä jae reta oyúe vae.
19Imiari kaviä reta Tumpa kotɨ, jei reta:
“¿Ipuereta ra yandemongaru kuae ñuu pe?
20Jae oyoka ɨ̈vavira, jare oë ɨ jeta rupi,
oguata jeta ɨ;
ërei, ¿ipuereta ra omee vi mbɨyape?
¿Omeeta vi ra soo imbae vae reta pe?”
21YandeYa oendu jókuae yave, iyarasɨ;
¡tata jendɨ rami, iyarasɨ jendɨ Jacob kotɨ!
¡Iyarasɨ yae Israel kotɨ!
22Mbaetɨ ramo güɨrovia reta Tumpa re,
mbaetɨ vi oyeko reta iporogüɨroasayepe re ave.
23Ërei ngatu, jae ombou amapɨtu reta ɨvate güi,
oipea ara jöke reta.
24¡Omongɨ jese reta maná, jou reta vaerä,
omee chupe reta mbɨyape ara güi!
25¡Kuimbae jou ko tuichagüe reta jembíu!
¡Tumpa ombou chupe reta jɨ̈vɨata regua!
26Ɨvɨtu kuaraɨ oëa kotɨgua
jare arayevɨ kotɨgua oyepeyu ɨvate;
¡Tumpa güeru imbaepuere ndive!
27¡Güeru chupe reta jetagüe soo;
jeta güɨra oveve, ɨguasu jembeɨ pe jeta ɨvɨkuitï rami!
28Tumpa ombou oa reta vaerä jeyupa mbɨte pe,
jo guakapi pegua iyɨ́vɨri rupi.
29Jou reta jɨ̈vɨata regua,
jökorai Tumpa ombopo chupe reta ipɨa jemimbota.
30Ërei ndei yangapɨɨ mbove,
oimeño vɨteri jou ñogüɨnoi ramboeve,
31ou Tumpa iyarasɨ jese reta,
jare omokañɨtei Israel pegua kuimbae tuichagüe jare oyeparavogüe reta.
32Ërei jeseve, jekuaeñoi iyoa reta ye;
mbaetɨ güɨrovia reta Tumpa mɨakañɨ reta oyapogüe re.
33Jáeramo, iara omboapɨ chugüi reta jarembae pegua,
jare iaño reta mbɨatɨtɨ yavaetegüe pe.
34Tumpa ombou chupe reta mano yave,
jayave oyerova reta ikotɨ jare oeka reta ikueraimbae.
35Jayave imaendúa reta Tumpa Tuichagüe yae ete vae ko jae iyeepɨka,
jare jae ko oepɨ reta vae.
36Ërei jei raangaiño, iñee-yukɨ reta chupe,
iyapu reta chupe.
37Echa ipɨa reta mbaetɨi jupi rupi kavi Tumpa kotɨ,
mbaetɨ vi morogüɨrökuavee päve oyapo reta.
38Ërei jae ko iporoparareko vae,
iñɨ̈ro mbaeyoa re jare mbaetɨ oporomokañɨtei vae;
ombosɨrɨ avei iyarasɨ,
mbaetɨ omboyekuaa opaetei iyarasɨ.
39Imaendúa, kuimbae retaño ko vae,
ɨvɨtu rami oasa jare mbaetɨ oyerova ye.
40¡Mbovɨ ye rupi oyembopɨapochɨ reta ikotɨ,
omboarasɨuka reta ñuu pe!
41Oyerova reta ye jare ojäa reta Tumpa,
¡omboarasɨuka reta Iyoambae Israel pegua!
42Mbaetɨ imaendúa reta,
jókuae ara imbaepuere pe ko güɨroasayepe reta mbɨatɨtɨ güi vae re,
43oyapo yave mɨakañɨ tuichagüe Egipto pe, ɨvɨ Zoán pe;
44ɨ reta oipoepɨ yave tugüɨ pe,
agüɨye vaerä oɨu reta chugüi.
45Ombou chupe reta mberu
opaetei mbae güɨrokomegua.
46Jemitɨ reta opa vi jouka chugüi reta taso pe jare tuku reta pe,
jae reta oparavɨkɨ jese vae.
47Iuvarupa reta opa omboai chugüi reta amandau pe,
jare iɨvarupa reta opa oyuka chugüi reta iroɨ pe.
48Jɨmba reta opa oyuka amandau jare amañeengata.
49Oitɨ jese reta iyarasɨ;
ombou chupe reta tembiporara jare mbɨatɨtɨ,
ikavimbae omoërakua rami.
50¡Omaeño iyarasɨ ou vaerä jese reta!
Mbaetɨ iñɨ̈ro chupe reta,
omboeterenga omano reta vaerä.
51¡Ombou mano opaete membɨrɨpɨ reta re Egipto pe!
Cam iñemuña pegua membɨrɨpɨ reta re.
52Güɨnoe imbae vae reta vecha jókai güi oñerenoe rami,
jare güɨraja ñuu rupi.
53Güɨroata reta oyangareko kavi yae jese reve,
jökorai agüɨye vaerä okɨɨye reta;
ërei ɨguasu opa oyasoi jovaicho reta.
54Güeru jaɨkue rupi ɨvɨ oñono tee vae jembeɨ pe;
kuae ɨvɨtɨ jae imbaepuere rupi opɨ̈ro vae pe.
55Jae reta jenonde güi opa güɨnoe omombo tëtaguasu reta;
tɨmasa pe ojäa iɨvɨgüe jae reta imbaerä,
jare jëtagüe reta omee Israel iñemuña reta yogüɨreko vaerä pɨpe.
56Ërei jae reta ojäa jare omboarasɨuka Tumpa Tuichagüe yae ete vae,
jare mbaetɨ oyapo reta jae iporookuai;
57iñemuñagüe reta rami oyembopɨapochɨ reta,
¡ñape reta, güɨrapa oyepokuaa ñape rami!
58Mbaemboete renda ɨvɨtɨ rupigua oyapo reta vae rupi omboarasɨuka reta,
jare omboete reta tumpa-raanga reta vae rupi omoägüɨrouka.
59Tumpa oecha kuae jare iyarasɨ yae,
jare güɨröɨro yeyé Israel.
60Jáeramo, oeya tupao guakapi pegua Silo pe oï vae,
küaraɨa guakapi pegua,
pɨpe oikose kuimbae reta ipɨte pe vae.
61Jare omee tembipɨɨrä ikäjou morogüɨrökuavee päve pegua tovaicho reta ipo pe;
jae ko jókuae käjou rupi oechauka imbaepuere jare iyemboetea vae.
62Omee vi tëta imbae vae reta omano vaerä kɨsepuku pe,
iyarasɨ yae imbae vae reta kotɨ.
63Itaɨrusu reta opa omano tata pe,
jare ikuñatai reta pe mbaetɨ ma tairari menda pegua.
64Isacerdote reta opa omano kɨsepuku pe,
jare jembirekogüe reta mbaetɨ oäpiro.
65Jayave yandeYa opa,
kia oke vae güi opa rami,
jëia yae vae osapúkai vino omboakuvo vae rami.
66Jare opa omoamɨri jovaicho reta ikupe kotɨ rupi;
oeya ñemomarai rupi jekuae avei pegua.
67Güɨröɨro José iñemuña reta,
mbaetɨ oiparavo ñemuña Efraín.
68Jaeño oiparavo ñemuña Judá,
ɨvɨtɨ Sión, jae oaɨu vae.
69Omopüa jo mbaemboetea jekuae avei pegua,
oyapo ɨvɨ oiko avei vae rami.
70Oiparavo jembiokuai David,
güeru vecha re oyangarekoa güi.
71Vecha reta imembɨmii vae jaɨkue oguataa güi güeru,
oyangareko vaerä tëta imbae vae re,
Israel iñemuña reta re.
72Jare oyangareko jese reta opaete ipɨakatu reve kavi,
oyangareko jese reta ipoki rupi kavi.
Who We AreWhat We EelieveWhat We Do
2025 by iamachristian.org,Inc All rights reserved.
