JOB 41 - Guarani Bible with DC

1¿Ndepuereta ra mbaeporou LeviatánJob 3.8; Sal 74.14; 104.26; Is 27.1. jee vae renoe pinda pe?

¿Ndepuereta ra remoiïcha ikü rupi?

2¿Ndepuereta ra reitïgua,

jare reësɨvo jañɨka rupi tɨ̈ai pe?

3¿Nemoñerata ra reiparareko vaerä,

ani iñee yeaeä ndeve okɨɨye güi?

4¿Oñererökuaveeta ra ndeve

oiko vaerä nderembiokuairä jekuae avei pegua?

5¿Remboyaruta ra metei güɨra raɨ rami?

¿Reñapɨtita ra nderayɨ reta, iyuvangata rami?

6¿Ndepuereta ra remee maemeea pe,

jare reyasɨa sɨa remee vaerä?

7¿Ndepuereta ra reyasɨa kɨse pe ipire?

¿Ani reñɨvo iñäka pe uvɨ itɨ̈ai vae pe?

8Epoko jese,

nemaenduata kuae ñeraro re,

jare ngaraa ye ma nekɨ̈reɨ reñoraro jae ndive.

9Oipotagüe jembiurai okɨɨye güi,

mbaeporou Leviatán oecha vae güiño.

10Mbaetɨ kia ipuere oya jese omomba vaerä,

mbaetɨ kia ipuere oñeñono jóvai.

11¿Oñeñono jóvai vae, oasayepeta ra?

¡Opaete ara igüɨ pe ñogüɨnoi vae, chembae ko!

12Chemiarita opaete jete re güɨnoi vae re,

jare ipɨ̈rata oyemboyovake rapembae vae re.

13¿Kia pa ipuereta ipire omboi chugüi,

ani oësɨvo ipireäta?

14¿Kia pa ipuereta omboyurupeka,

jäi reta oñesɨro yavaete vae?

15Ikupe re oñesɨro ipireäta iyeopiaka,

oyopɨpɨ jare täta ita rami.

16Metei vae oya ïru re,

ɨvɨtu mbaetɨ ipuere oipeyu jokoropi.

17Oya ñogüɨnoi oyoe,

oyepókoi oyoe mbaetɨ ipuere osɨrɨ oyougüi.

18Iñächio yave ama-vera rami,

jesa reta jembipe, kuaraɨ oë ou vae rami.

19Iyuru güi oë tata overa vae,

jare tatapiriri.

20Itï rupi oë tätati,

yapepo opupu oï vae güi oë jätati rami.

21Ipɨ̈túe pe omoendɨ tätapɨi,

jare iyuru güi oë tataendɨ.

22Iyayu pɨ̈rata yae,

opaete okɨɨye chugüi vae.

23Isoo reta ave jayɨ yae,

mbaetɨ ipuere oyasɨa.

24Ipɨa guasu yae ita rami,

mbaetɨ omɨi ita oyoso jese vae ita rami.

25Opüa yave, imbaepuere vae reta okɨɨye

jare okɨɨye güi, otekuarai reta chugüi.

26Kɨsepuku ave mbaetɨ mbae oyapo chupe,

mii raɨ, uvɨ ani ïru mbae mbaetɨ mbae oyapo chupe.

27Jiero kapii ramiño chupe,

jare jiero iyu vae, yepea ikúi vae ramiño.

28Uvɨ reta mbaetɨ ombotekuarai,

ita reta pe oyeapi yave,

kapii pe oyeapi ramiño chupe.

29Opaete tembiporu ñeraro pegua, ɨtɨ ramiño chupe,

oyóyai jae, mii ipu oyeendu yave.

30Ipɨtía re güɨnoi ipireäta jaimbe vae,

tuyuapo oikɨ̈ti oeya ipɨtía pe.

31Ombopupu ɨguasu, metei yapepo pe ombopupu ɨ rami;

metei yapepo pe oyembopupu moa rami.

32Ɨ rupi jembipe oeya jaɨkuere,

morotï tɨrɨyɨi oeya.

33Mbaetɨ ɨvɨ iárambo jae rami etei vae;

kuae oyeapo okɨɨyembae etei vaerä.

34Omae jare oyovaicho opaete oyembotuicha vae reta re,

jae ko oï opaete ipɨayemboete vae reta iárambo ye.