LEVÍTICO 18 - Guarani Bible with DC

Kuimbae opoko kuña re vae regua

1YandeYa jei Moisés pe:

2“Ere Israel iñemuña reta pe:

Che ko jae peYa Tumpa.

3Agüɨye pemomoe ɨvɨ Egipto pegua reta jeko; peikosea pe oyeapo vae.

Agüɨye vi pemomoe ɨvɨ Canaán pegua reta jeko, che pogüɨrajataa pe, agüɨye vi pemomoe mborookuai reta güɨnoi vae.

4Peyapo che jae peve vae, peñovatu pepɨa pe cheporookuai reta, peiko cheporookuai jei rami. Che ko peYa Tumpa.

5Jáeramo, peñovatu pepɨa pe jare peyapo cheporookuai reta. Kuimbae oyapo cheporookuai reta vae oikoveta.

9Agüɨye kia nunga vae topoko jeindɨ re; jeindɨ tu tee vae ani ichɨ tee vae, yepe tëi oa jókuae tëta pe ani ïru tëta pe, agüɨye topoko jese.

10Agüɨye kia nunga vae topoko taɨ tayɨ re ani tayɨ imemɨkuña re, agüɨye toyapo iyeupe ikavimbae.

11Agüɨye kia nunga vae topoko ichɨraanga imemɨkuña re, echa tu tayɨ ko, jare jae jeindɨ ko, agüɨye topoko jese.

12Agüɨye kia nunga vae topoko tu jeindɨ re, echa iyaiche ko, metei tugüɨ ko tu ndive.

13Agüɨye kia nunga vae topoko ichɨ tɨke ani ipɨkɨɨ re, echa ichɨɨ ko, metei tugüɨ ko ichɨ ndive.

14Agüɨye kia nunga vae topoko itutɨ jembireko re, echa ichɨɨ ko, tomboete itutɨ.

15Agüɨye kia nunga vae topoko taɨ jembireko re, echa taɨtatɨ ko, agüɨye topoko jese.

16Agüɨye kia nunga vae topoko tɨkeɨ ani tɨvɨ jembireko re, tomboete tɨkeɨ ani tɨvɨ.

17Agüɨye kia nunga vae topoko metei kuña re jare imemɨkuña re ani jamariro re: Imembɨraɨe tayɨ ani imemɨkuña imembɨ re, echa metei tugüɨ reta ko. Ikavimbae yae vae ko jókuae.

18Agüɨye kia nunga vae oime jembireko reve topoko jembireko tɨke re ani ipɨkɨɨ re, echa omoñomotareɨukata ko oikove yogüɨreko ramboeve.

19Agüɨye kia nunga vae topoko kuña jugüɨ oï vae re.

20Jaeramiño vi agüɨye kia nunga vae topoko japicha jembireko re. Agüɨye vaerä oyemongɨa jae ndive oyapogüe rupi.

21Agüɨye kia nunga vae tomee taɨ mbota rami tumpa-raanga Moloc jee vae pe, agüɨye pemongɨa peTumpa jee.

23Agüɨye kuimbae ani kuña yepe toasa mɨmba ndive. Ikavimbae yae ko jókuae.

24Opaete kuaekuae reta agüɨye peyapo, echa opaete kuaekuae reta pe ko oyemongɨa tëtaguasu reta che amoëta amombo perenonde güi vae,

25jare omongɨa reta iɨvɨ, jáeramo, che aiporarauka chupe reta jeko re, jare ɨvɨ etei opa omoë omombo.

26Ërei pe reta jare ketɨgua yogüɨreko pepɨte pe vae, peñovatu pepɨa pe jare peyapo cheporookuai reta, agüɨye peyapo metei ave kuae ikavimbae yae vae.

27Echa kuae ikavimbae yae vae ko oyapo jókuae ɨvɨ pegua reta, pe reta ndei peike jókuae ɨvɨ pe mbove, omongɨa reta iɨvɨ.

28¡Agüɨye kuae ɨvɨ güi peyemombouka pemongɨa jeko pegua, kuae ɨvɨ pe ndei peike mbove yogüɨrekose vae reta opa oyemombouka rami!

29Echa kia nunga vae oyapo yave kuae ikavimbae yae vae, toyemombo ete kavi jëtara reta ipɨte güi.

30Jáeramo peñovatu pepɨa pe cheporookuai, agüɨye pemomoe jókuae ɨvɨ pe yogüɨreko vae jeko ikavimbae yae vae; agüɨye peyemongɨa pɨpe. Che ko peYa Tumpa.”