1¡Kërai ikɨa oro!
¡Kërai oro oyeambae mbaetɨ ma jembipe!
O mbaemboetea pegua ita reta opaetei oñemoai ñogüɨnoi kaye rupi.
2Sión pegua reta, iyemboetea yae yepi oro güi vae,
añave yogüɨreko ɨvɨyapepo, oñaeu-apo vae jembiapo rami.
3Aguarayaɨmba reta ombokambu imembɨ reta,
ërei kuae cherëta guasu pegua reta
yandu ñuu rupigua imembɨ oeya vae rami ko.
4Michia raɨ okambu vae, ikü oya iñäpeku re iɨuve yae güi.
Michia reta oeka tembíu,
ërei mbaetɨ kia omongaru reta.
5Tenonde rupi okaru kavise reta vae,
añave jovaruru ñogüɨnoi kaye rupi.
Okuakuaa kavi yae vae reta,
añave rupi yogüɨreko ɨtɨ oyemomboa rupi.
6Echa jeiete yae cherëta guasu pegua reta iyoa,
Sodoma pegua reta iyoa güi;
jókuae tëta opa oyemboai jarembae pegua,
mbaetɨ etei kia oporepeña jese reve.
7Yanderuvicha reta ikɨambae ko yepi,
oasa ete yé tïiasɨ iroɨ güi jare neche güi;
ipireyuasɨ, mbaepotɨ iyu vae güi;
jete kavi, ita zafiro jee vae güi.
8Ërei añave, jüu yae ete pɨtumimbi güi;
mbaetɨ etei ma kia oikuaa kaye rupi vae.
Ipire opa oya ikägüe re,
¡otini yae yepea rami!
9Ñeraro pe omano vae reta ikaviño, yɨmbɨaɨ oyuka vae güi;
echa jovaruru reta omano mbegüe pe,
mbaetɨ tembíu ɨvɨ pe jeko pegua.
10Kuña reta jupi vae,
omboyɨ imembɨ tembiurä;
¡imembɨ reta aeño oyapo reta jembiurä, cherëta guasu iyemboai iara pe!
11YandeYa oitɨ iyarasɨ,
oitɨ opaetei iyarasɨ;
oyatapɨ Sión re,
opaetei omboai iguapɨka reve.
12Opaete ɨvɨ pegua mburuvicha guasu reta, jare opaete ɨvɨ pe yogüɨreko vae reta,
mbaetɨ etei güɨrovia tovaicho reta oiketa ko Jerusalén jöke rupi etei vae.
13¡Opaete kuae oasa, ñeemombeúa reta iyoa jeko pegua
jare isacerdote reta jeko kavimbae jeko pegua,
echa tëta guasu rupi etei oyuka reta jekombae reta!
14Jesambae rami oguata reta kaye rupi;
opaetei oyemongɨa reta Tumpa jóvai tugüɨ pe,
kuae jeko pegua mbaetɨ etei oipota oyavɨkɨ jemimonde vae.
15Opaete jei chupe vae:
“¡Pesɨrɨ, jókuae ikɨa Tumpa jóvai vae güi!
¡Pesɨrɨ chugüi!
¡Agüɨye peyavɨkɨ!”
Opa otekuarai reta jare opa oñemoai moai reta.
Tëtaguasu reta jei oyoupe: “Ngaraa etei ma yogüɨreko ye kuae pe.”
16Tumpa iyarasɨ rupi opa omoai moai,
ngaraa ye ma omae jese reta.
Echa mbaetɨ omboete reta sacerdote reta,
mbaetɨ etei iporoparareko reta ndechi reta re ave.
17Oreresa ikangɨi roäro tëi yemborɨ.
Roäroiño ma metei tëtaguasu mbaetɨta ipuere oporoepɨ vae.
18Orepïaro reta opaete oreguataa rupi;
mbaetɨ orepuere roë kaye pe.
Oväe ma oreapɨ vaerä, oväe ma ara, ¡oväe ma oreapɨ vaerä!
19Oreraɨkuemoña vae reta,
iñäkua yae ete güɨraké güi;
¡oreraɨkuemoña ɨvɨtɨ rupi!
¡Okätɨro kavi reta ñuu rupi oreré!
20Oa tembipɨɨrä yandeYa jembiparavo,
ñanemoäta ngatuse vae,
jókuae mburuvicha guasu re yande yaese körai: “Jae iporoangareko rupi yaikota tëtaguasu reta ipɨte rupi.”
21¡Pepuka, peyerovia Edom pegua reta, ɨvɨ Uz pe peiko vae!
¡Ërei oväeta vi ndeve kopa arasɨ pegua,
ndembosavaɨpota jare regüëeta!
22Sión pegua reta,
jae ma iyapɨ reiporara vae;
Tumpa ngaraa ye ma omaeño reyereraja tembipɨɨrä.
Ërei, pe Edom pegua reta,
Tumpa oiporaraukata peyoa re peve, omboyekuaata pembaeyoa reta.
Who We AreWhat We EelieveWhat We Do
2025 by iamachristian.org,Inc All rights reserved.
