LEVÍTICO 13 - Guarani Bible with DC

Mborookuai pire mbaerasɨ ókui vae regua

1YandeYa jei Moisés pe jare Aarón pe:

2“Oime yave kia ipire iruru, yamandau, morotï, ani jete re oyekuaa pire mbaerasɨ ókui vae rami, toyereru sacerdote Aarón pe ani metei taɨ sacerdote pe.

3Jare sacerdote tomae ipere jete re oï vae re; jare iperea pe jaa oï vae tïi yave, jare ipere oyeu ete yave, pire mbaerasɨ ókui vae ko; jare sacerdote toikuaa, jare tomombeu ikavimbae ko.

4Ërei ipere morotï oyekuaa yave, ërei mbaetɨ oyeu ete jare mbaetɨ vi jaa morotï, jayave sacerdote toyokenda jókuae ipere vae chiu ara rupi.

5Chiu araa pe sacerdote tomae jese; jare ipere jekuaeño tenonde rami yave, mbaetɨ oñemoai jete re, jayave sacerdote toyokenda ye chiu ara rupi.

6Jare chiu araa pe, sacerdote tomae pɨau ye jese; jare ipere moroü ma yave, mbaetɨ ma oyeu yave, sacerdote tomombeu ikɨambae ko vae, ipire yamandauño ko. Jayave ipire mbaerasɨ vae toputuka jemimonde reta, jare topɨta ikɨambae.

7Ërei ipire yamandau oñemoai jete re yave, sacerdote pe oyeechauka güire, tojo ye toyeechauka chupe.

8Jare sacerdote oecha yave ipire yamandau oñemoai jete re, tomombeu ikavimbae ko, pire mbaerasɨ ókui vae ko.

9Oime yave kia güɨnoi pire mbaerasɨ ókui vae, toyereru sacerdote pe.

10Jare jae tomae jese, jare oecha yave ipire iruru morotï, jare iperea pe jaa oï vae tïi yave, jare isoo etei oyeu yave,

11pire mbaerasɨ ókui vae ko, mbaerasɨ pɨ̈chɨi yae vae ko oë jete re. Jare sacerdote tomombeu ikavimbae ko, jare agüɨye toyokenda, echa ikavimbae ma ko.

12Ërei opaetei jete re oñemoai yave pire mbaerasɨ ókui vae, ipɨ güive iñäka kotɨ, sacerdote ipuere oechaa rupi,

13jayave sacerdote toikuaa kuae re; pire mbaerasɨ ókui vae opaetei oñova jete yave, tomombeu ikɨambae ko ipere vae; ipere opaetei morotï yave, topɨta ikɨambae.

14Ërei oyekuaa isoo etei ma oyeu yave, ikavimbae topɨta.

15Jayave sacerdote tomae isoo etei ma oyeu vae re, jare tomombeu ikavimbae ko; pire mbaerasɨ ókui vae ko.

16Ërei isoo oyeu vae oyepoepɨ yave, jare opa morotï yave, tou sacerdote pe;

17jare jae tomae jese, jare ipere opa morotï yave, sacerdote tomombeu ikɨambae ko, jare topɨta ikɨambae.

18Kia nunga vae iyatii yave, jare okuera yave;

19jare jókuae iyatii jendagüe pe iruru tïi yave, ani pɨ̈ta ävatï yave, toyeechauka sacerdote pe.

20Jare sacerdote tomae jese, jare oyekuaa ipire oyeu yave, jare jaa tïi ma yave, sacerdote tomombeu ikavimbae ko; jókuae ipere, pire mbaerasɨ ókui vae ko, oyemboɨpɨ atii jendagüe pe.

21Ërei sacerdote omae jese yave, jare mbaetɨ yave jaa tïi iperea pe jare mbaetɨ vi ipire oyeu, ërei opa moroü, jayave sacerdote toyokenda chiu ara rupi.

22Ërei oñemoaiño yave jete re, sacerdote tomombeu ikavimbae ko, pire mbaerasɨ ókui vae ko.

23Ërei jókuae morotï oyekuaa jese vae jenda peño oï yave, mbaetɨ yave oñemoai jete re okuera ko iyatii güi, jare sacerdote tomombeu ikɨambae ko.

24Jaeramiño vi oime yave kia ókai ipire, jare ókai jendagüe pe pɨ̈ta ävatï ani tïi yave,

25sacerdote tomae jese, jare jaa tïi iperea pe yave jare ipire oyeu yave, pire mbaerasɨ ókui vae ko oë okaia pe, jare sacerdote tomombeu ikavimbae ko, echa pire mbaerasɨ ókui vae ko.

26Ërei sacerdote omae jese yave, jare mbaetɨ jaa tïi iperea pe ani mbaetɨ ipire oyeu yave, ërei opa moroü, jayave sacerdote toyokenda chiu ara rupi.

27Chiu araa pe sacerdote tomae jese, jare oñemoai jete re yave, sacerdote tomombeu ikavimbae ko, pire mbaerasɨ ókui vae ko.

28Ërei okaigüe re mbae oë vae jenda peño oï yave, mbaetɨ yave oñemoai jete re, jare moroü yave okuera ko okaigüe güi; jare sacerdote tomombeu ikɨambae ko, echa okaigüe jendagüeño ko.

29Jare kuimbae ani kuña ipere yave iñäka pe ani jañɨka pe,

30sacerdote tomae ipere re; oecha ipire oyeu yave, jare ia ani jaa iyu äve jare ókui yave, sacerdote tomombeu ikavimbae ko, pire mbaerasɨ ókui vae äka regua ani tañɨka regua ko oë jese.

31Ërei sacerdote omae jókuae pire mbaerasɨ re yave, jare mbaetɨ oyeu ani mbaetɨ ia ani jaa jüu yave, toyokenda chiu ara rupi, jókuae ipire mbaerasɨ ókui vae.

32Jare chiu araa pe sacerdote tomae ipere re, jare jókuae pire mbaerasɨ ókui vae äka regua ani tañɨka regua mbaetɨ oñemoai yave, mbaetɨ ia ani jaa iyu äve ani ipire oyeu yave,

33sacerdote toyókuai oñeapi vaerä, ërei agüɨye toñapi ipere renda; jare toyokenda ye chiu ara rupi.

34Jare chiu araa pe sacerdote tomae pire mbaerasɨ ókui vae äka regua ani tañɨka regua re, jare mbaetɨ oñemoai ani mbaetɨ oyeu yave, sacerdote tomombeu ikɨambae ko, jare toputuka jemimonde reta, jare topɨta ikɨambae.

35Ërei pire mbaerasɨ ókui vae oñemoai yave oyetɨo güire,

36jayave sacerdote tomae jese; jókuae mbaerasɨ oñemoai jese yave, agüɨye voi toeka ia iyu äve vae; imbaerasɨ vae ikavimbae ko.

37Ërei jókuae mbaerasɨ oyekuaa jese vae jenda peño oï yave, jare oë yave iperea pe ia jüu vae, pire mbaerasɨ ókui vae äka regua ani tañɨka regua ko okuera oï, jare sacerdote tomombeu ikɨambae ko.

38Jaeramiño vi kuimbae jare kuña güɨnoi yave jete re morotï vae,

39sacerdote tomae jese, jare oväe jete re morotï vae ani moroü äve vae yave, mbae yamandau vaeño ko oë jete re; mbaetɨ ko ikɨa jókuae nunga.

40Metei kuimbae ia ókui yave, iñäka raambae vaerä ko, mbaetɨ ko ikɨa.

41Jesɨva kotɨ ia ókui yave, jesɨva raambae vaerä ko, mbaetɨ ko ikɨa.

42Ërei jókuae iñäka raambae pe ani jesɨva raambae pe ipere tïi pɨ̈ta äve yave, pire mbaerasɨ ókui vae ko oë iñäka raambae pe ani jesɨva raambae pe.

43Jayave sacerdote tomae jese, jare oecha iperea iruru tïi pɨ̈ta äve yave jókuae iñäka raambae pe ani jesɨva raambae pe, jete re pire mbaerasɨ ókui vae oyekuaa rami yave,

44pire mbaerasɨ ókui vae ko, ikavimbae ko jare sacerdote jupiveiño tomombeu ikavimbae ko, echa iñäka re güɨnoi ipere vae.

45Jare ipire mbaerasɨ ókui vae tomonde temimonde osorogüe jare tiñäka-güɨrai, jare jova toñova jare tosapúkai: ‘¡Ikavimbae ko che! ¡Ikavimbae ko che!’

46Opaete ara ipere oiko ramboeve topɨta ikavimbae, toiko jaeño teyupa güi ikatu pe.

47Temimonde vecharaa pegua ani lino pegua re mbaerasɨ ókui vae yɨpe oyekuaa yave,

48ani tembiapo re ani mbaepɨaa lino pegua re ani vecharaa pegua re, ani mɨmba pire re, ani oipotagüe tembiapo mɨmbapire pegua re;

49jare jókuae yɨpe oyekuaa vae jovɨ äve ani pɨ̈ta äve yave temimonde re, mɨmba pire re, tembiapo re, mbaepɨaa re, ani opaete tembiapo mɨmba pire pegua re yave; mbaerasɨ ókui vae ko, jayave toyeechauka sacerdote pe.

50Jare sacerdote tomae jese, jare toyokenda jókuae mbae oyekuaa jese vae chiu ara rupi.

51Jare chiu araa pe tomae jókuae mbae jäve ani yɨpe vae re; oñemoai yave jókuae mbaerasɨ temimonde re ani tembiapo re ani mbaepɨaa re ani mɨmba pire re ani oipotagüe tembiapo oyeapo mɨmba pire pe vae re yave, pire mbaerasɨ ókui vae ko; tikɨa topɨta.

52Toyeapɨ jókuae temimonde, tembiapo ani mbaepɨaa vecharaa pegua ani lino pegua ani oipotagüe tembiapo mɨmba pire pegua; echa mbaerasɨ ókui vae ko oë jese, toyeapɨ tata pe;

53ërei sacerdote omae jese yave, mbaetɨ oñemoai kuae mbaerasɨ temimonde re ani tembiapo re ani mbaepɨaa re ani oipotagüe tembiapo mɨmba pire pegua re yave,

54sacerdote toyoeuka jókuae mbaerasɨ oïaño, jare toyokenda ye chiu ara rupi.

55Jare sacerdote tomae jese oyeyoe güire jare mbaetɨ yave oyepoepɨ jókuae oyekuaa vae yepe tëi mbaetɨ oñemoai jókuae mbaerasɨ ókui vae, ikɨa ko, toapɨ tata pe; oyeu yave japɨpe ani ikupe.

56Ërei sacerdote omae yave jese, jare mbaerasɨ ókui vae moroü oyeyoe güire yave, toyasɨa jókuae ikɨa vae temimonde güi, mɨmba pire güi, tembiapo güi ani mbaepɨaa güi.

57Ërei oyekuaa pɨau ye yave jókuae mbaerasɨ ókui vae temimonde re, tembiapo re ani mbaepɨaa re ani oipotagüe tembiapo mɨmba pire pegua re, jare oñemoai jese yave, toyeapɨ tata pe.

58Ërei temimonde, tembiapo ani mbaepɨaa ani oipotagüe tembiapo mɨmba pire pegua oyeekɨ chugüi mbaerasɨ ókui vae, toyeputuka ye, jayave topɨta ikɨambae.”

59Jae ko kuae mborookuai mbaerasɨ ókui vae regua: Temimonde vecharaa re ani lino pegua re ani tembiapo re ani mbaepɨaa re ani oipotagüe tembiapo mɨmba pire pegua re, oyemombeu vaerä ikɨambae vae ani ikɨa vae.