JUDIT 10 - Guarani Bible with DC

Judit ojo Holofernes jeyupa pe

1Judit opa oyerure rupive iñee ɨvate reve Israel-ɨgua reta iTumpa pe jare jei opaete kuae ñee reta,

2opüa oyemboɨ, oenɨi jembiokuai jare ogüeyɨ jo ɨvɨ kotɨgua pe, echa joko pe oyepokua oputuu araapɨ ñavo jare arete pe.

3Omboi jemimonde jaimbe vae omondo güɨraja vae jare jemimonde imemano pegua, oyau, oñono iyé yembopichea, oyavɨkɨ jare oñono iyé iñäka-regua, jare oyemonde temimonde arete pegua pe, ime Manasés oime oiko yave oyeapo rami.

4Joko güi omonde mbɨapaa, oñono iyé poapɨ regua, mboɨ, moäka-vera, namicha jare, opaete mbae, jepɨ vae reta; oyeapo kavi ipuere rupi, oipotagüe kuimbae reta oechagüe ipɨakañɨ vaerä omae jese.

5Jare omee jembiokuai pe metei rɨru vino jare metei rɨru asaite, joko güi omotɨnɨe urupuku cebada ikuigüe, torta trigo pegua jare mbɨyape oyeambae vae, opa oñono kavi urupuku pe, jare omee jembiokuai pe güɨraja vaerä.

6Jaema ojo Betulia jöke kotɨ jare joko pe oväe reta chupe Ozías jare ïru ndechi reta jókuae tëta pegua vae, Cabris jare Carmis.

7Oecha reta täta ambuaeyee ojo, ambuaeyee ete kavi oyemonde vae, jare täta ipɨakañɨ reta omae jese iyemboete jeko pegua, jare jei reta chupe:

8—Yande tenondegua reta iTumpa tomee ndeve ekua kavi eväe jare tandemborɨ toyeapo ndeyemongeta reta, Israel-ɨgua reta iyemboete pɨpe vaerä jare Jerusalén oiko vaerä yerovia.

9Jare jae iñäkatindɨ iporomboete Tumpa kotɨ, jare jei chupe reta:

—Peipeauka cheve tëta guasu jöke, jare taja tayapo pere cheve vae.

Jaema jae reta jei öke iyangarekoa reta oipea vaerä öke, jae oiporu rami.

10Jökorai oyapo reta, jaema Judit oë ojo jembiokuai ndive. Kuimbae tëta ipo reta oecha ogüeyɨ ojo ɨvɨtɨ päu rupi, jare ojo mbaetɨ ma ipuere oecha reta.

11Jae reta ojo isɨmbi ɨvɨtɨ päu rupi, ojo reta oväe sundaro Asiriaɨgua reta yatɨ oïa pe.

12Sundaro reta oipɨɨ Judit jare oparandu reta chupe:

—¿Kia tëta pegua pa ko nde? ¿Ketɨ güi pa reyu jare ketɨ pa reo?

Jei chupe reta:

—Che ko jae hebrea —jei chupe—, atekuarai ko ayu cherëta ipo reta güi, echa jarembae yae oa retata ou pepo pe jare opata okañɨtei reta.

13Aipota aecha Holofernes, peruvicha tenondegua vae, amombeu vaerä chupe aikuaagüe. Aipota amombeu kavi chupe kerupi ipuere vaerä oike oyemombae opaete ɨvɨtɨ reta oï vae re omokañɨtei mbae reve metei äve isundaro.

14Jare sundaro reta oendu ramboeve jókuae yemongeta jare omae reta jese, oecha täta jova ipöra jare ipɨakañɨ reta omae jese. Jayave jei reta chupe:

15—Nde jaema reasayepe, echa neraniño reyu reväe ore ruvicha pe. Ekua eväe jeyupa pe; kia oregüi reta ndererajata ndereeya jae oïa pe.

16Joko pe ma reï yave, agüɨye ekɨɨye; ere chupe reikuaagüe, jaema jae omae kavita ko nderé.

17Jaema oiparavo reta cien kuimbae reta güɨraja vaerä Judit jembiokuai ndive Holofernes jeyupa oïa pe.

18Jërakua rupive jae ojo oväe teyupa pe vae, sundaro reta osɨi yogüeru oipota rupi güi yatɨ Judit re, Holofernes jeyupa jóvai, jare oäro omombeu reta vaerä chupe jae ou oväe vae.

19Täta ipɨakañɨ reta omae Judit ipöra vae re, jare oyemongeta reta Israel-ɨgua reta täta ikavi vae, jaema jei reta oyoupe: “¿Kia pa güɨröɨrota metei tëta kuae nunga kuña güɨnoi vae? Ngaraa etei ko yamoingove metei äve kuimbae reta, echa oime jembɨre yave ipuereta ko yandembotavɨ reta opaete vae jare oyembotenonde retata yandeve.”

20Holofernes iyangarekoa sundaro reta jare ïru mburuvicha reta ñogüɨnoi joko pe vae oë yogüeru jare omoinge reta Judit jeyupa pe.

21Holofernes oyapakua oï jupa pe, iküaraɨa tarapo pɨ̈taü pegua vae igüɨ pe jare jókuae iküaraɨa ko ipöranga ko jae oro pegua jare ita reta jepɨ vae pegua.

22Jare omombeu reta yave chupe jókuae oime oï joko pe vae, oë ou jeyupa jöke pe. Jenonde güeru reta chupe mechero korepoti pegua vae.

23Jare Judit ou oyemboɨ jóvai jare ïru vae mburuvicha reta jóvai, opaete ipɨakañɨ reta omae jae ipöra vae re. Jare jae itindɨ jóvai omboete jeko pegua, ërei jembiokuai reta omopüa yee.