NÚMEROS 8 - Guarani Bible with DC

Mborookuai mechero oyemoendɨ vaerä

1YandeYa jei Moisés pe:

2“Ere Aarón pe, omoendɨ yave jókuae chiu mechero, jókuae mechero tomoembipe mechero renda jenonde kotɨ.”

3Aarón jökorai oyapo; omoendɨ oñono omoembipe vaerä mechero renda jenonde kotɨ, yandeYa oyókuai Moisés vae rami.

4Jókuae mechero renda oyeapo oro pegua; iguapɨka güive iyapɨte pe, martillo pe oyeapo metei ramiño; yandeYa oechauka iä Moisés pe rami, jökorai oyapo.Leví iñemuña reta iñeñono tee Tumpa pe

5YandeYa jei vi Moisés pe:

6“Embosɨrɨ Leví iñemuña reta, jëtara Israel iñemuña reta ipɨte güi, jare eyapo chupe reta Tumpa iñɨ̈ro vaerä mbaeyoa re.

7Körai eyapo chupe reta: Eñapiramo reta ɨ yetɨo pegua pe, toñapi reta opaete jete, jare toputuka reta jemimonde, jare tikɨambae topɨta reta Tumpa jóvai.

8Jaɨkue rupi toipɨɨ reta metei toro, trigokúi ipɨuasɨ kavi yae vae, olivo iasaite pe oyemómbɨu vae ndive; jare eipɨɨ ïru toro, Tumpa iñɨ̈ro vaerä mbaeyoa re.

9Jare eyókuai Leví iñemuña reta oya vaerä tupao guakapi pegua jóvai, jare emboatɨ opaete Israel iñemuña reta.

10Jare Leví iñemuña reta oya ma cheróvai yave, opaete Israel iñemuña reta toñono ipo jae reta iñäka re.

11Jare Aarón tomee mbotarä Leví iñemuña reta cheve, Israel iñemuña reta ipo güi mbota oñemee rami ko, jökorai Leví iñemuña reta toyogüɨreko oyeokuai vaerä cheve.

12Jaɨkue rupi Leví iñemuña reta toñono ipo toro reta iñäka re; metei toñemee Tumpa iñɨ̈ro vaerä mbaeyoa re, jare ïru toñemee mɨmba oyeyuka opaetei oyeapɨ vaerä cheve, Leví iñemuña reta oyetɨo vaerä opɨta Tumpa jóvai.

13Javoi eñono Leví iñemuña reta, Aarón jare taɨ reta jóvai, jare emee mbotarä cheve.

14Jökorai embosɨrɨ chembaerä Leví iñemuña reta jëtara Israel iñemuña reta ipɨte güi.

15Kuae jaɨkue rupi Leví iñemuña reta toyogüeru toparavɨkɨ tupao guakapi pegua pe. Eitɨo reta jare emee reta cheve mbotarä,

16echa, chembae ko opaete Leví iñemuña reta, cheveguarä ko oñeñono tee opaete Israel iñemuña reta ipɨte güi, membɨrɨpɨ kuimbae reta jekovia pe; opaete Israel iñemuña reta taɨrɨpɨ jekovia pe ko aiparavo cheyeupe.

17Echa, chembae ko opaete Israel iñemuña reta taɨrɨpɨ, jaeramiño vi opaete jɨmba reta imembɨrɨpɨ kuimbae; Egiptoɨgua reta taɨrɨpɨ ayukauka güive añono tee cheyeupe opaete.Ex 13.2,11-16.

18Aiparavo Leví iñemuña reta, Israel iñemuña reta taɨrɨpɨ jekovia pe.

19Che ko amee Leví iñemuña reta, Aarón jare taɨ reta pe, opaete Israel iñemuña reta ipɨte güi, oyeokuai reta vaerä tupao guakapi pegua pe, Israel iñemuña reta jekovia pe; agüɨye vaerä maratu oasa Israel iñemuña reta oya yave o mbaemboetea re.”

20Moisés, Aarón jare opaete Israel iñemuña reta oyapo Leví iñemuña reta pe, yandeYa oyókuai Moisés vae rami.

21Jare Leví iñemuña reta oyetɨo jare oputuka reta jemimonde; jare Aarón omee mbotarä yandeYa pe, oyapo chupe reta Tumpa iñɨ̈ro vaerä mbaeyoa re, oitɨo reta vaerä.

22Jökorai kuaekuae jaɨkue rupi, yogüeru Leví iñemuña reta oyapo vaerä iparavɨkɨ tupao guakapi pegua pe, Aarón jare taɨ reta iporookuai rupi; yandeYa oyókuai Moisés vae rami etei oyapo jae reta Leví iñemuña reta pe.

Mbovɨ año Leví iñemuña reta oparavɨkɨ vaerä

23YandeYa jei Moisés pe:

24“Leví iñemuña reta veinticinco año güɨnoi vae güi kutɨ ipuere omboɨpɨ oyapo iparavɨkɨ tupao guakapi pegua pe.

25Ërei cincuenta año ma güɨnoi yave toeya jókuae mbaravɨkɨ jare agüɨye ye mo toyapo.

26Toyeokuai reta jëtara reta omborɨ vaeräño tupao guakapi pegua pe, ërei agüɨye jae reta etei toyapo mbaravɨkɨ. Jökorai eyapo Leví iñemuña reta pe, iparavɨkɨ regua.”