SABIDURÍA 10 - Guarani Bible with DC

Arakuaa Adán güive oiko vae José pe iyapo vae

1Arakuaa oyangareko kuimbae re oyeapo iyɨpɨ güire,

jae ko opaete kuimbae reta tu re, oyemboɨpɨ jaeiño oiko güire,

jare jae omopüa ye oa yave

2jare omee chupe mbaepuere opaete mbae oyókuai vaerä.

3Ërei Caín, oyeapɨraauka arasɨ pe jeko pegua, opia chugüi,

jare oyeapɨraauka vi moromotareɨ pe jeko pegua oyuka tɨkeɨ.

Jare jökorai, jaeiño ko oñemokañɨteiuka.

4Jaema kuimbae jeko pegua ko, ɨ opa oyasoi ɨvɨ,

ërei arakuaa ko güɨroasayepe ye,

güɨraja Noé kuimbae jupigüe vae ɨvɨra jäɨ jäɨgüe reta re.

5Tëtaguasu reta oyomboatɨ ikavimbae oyapo vaerä yave

jare opa oyembojopa reta,

arakuaa ko oiparavo Abraham, kuimbae jupigüe vae,

jare güɨreko ikɨambae reve Tumpa jóvai

omee mɨ̈rata chupe yepe taɨ re täta oaɨu omae.

6Tumpa etei jeko kavimbae reta opa omokañɨtei yave,

arakuaa vi güɨroasayepe Lot, jókuae jae vi ko kuimbae jupigüe vae,

tata oa yave pandepo tëtaguasu reta re.

7Jókuae pɨ̈chɨigüe vae oiko vae güi,

opɨta jekuaeño jätati oiko vaerä ɨvɨ ipombae vae,

ɨvɨra reta iagüe joko pe ngaraaí yagüɨye vae

jare opɨta joko pe metei oyemboɨ oï vae iä yukɨ pegua

jae ko metei iporogüɨroviambae jeko pegua.

8Jae ko arakuaa güi opia jeko pegua,

jókuae kia reta mbaetɨ ipuere ikavigüe re güɨrovia vaeñoä omboyekuaa joko pe,

oeya vi joko pe yembomaendúa oiko vaerä oyapo güire,

jare agüɨye vaerä iñakañɨ reta imbaeyavɨ güi.

9Jare ye, arakuaa, omborɨ mbae oata oï jembiokuai reta pe yave.

10Güɨraja Jacob tape ikavigüe rupi, jae ko kuimbae jupigüe vae,

otekuarai tɨvɨ iyarasɨ güi vae;

oechauka chupe Tumpa iporookuaía

jare oikuaauka vi chupe mbaembae reta ipokoambae vae;

oyapo vi jembiapo reta oë kavi vaerä chupe

jare omee oñemuña vaerä chupe iparavɨkɨagüe;

11jare omborɨ jovaicho reta jovakei omboikokatu;

12oepɨ jovaicho reta güi,

oyopia opokota ma jese vae güi,

jare omee chupe oporomoamɨri vaerä ñoraro täta vae rupi,

oikuaa reta vaerä mbaetɨ iko mbae ma täta ita rami vae.

13Arakuaa mbaetɨ vi oeya José, jupigüe vae oñemee tëigüe vae,

jare güɨroasayepe vi mbaeyoa pe oata tëi vae güi;

14ojo jae ndive tembipɨɨ rɨru pe

jare mbaetɨ oeya jaeiño joko pe,

omee chupe mburuvicha ipo pegua,

jare omee chupe mbaepuere jovaicho reta regua;

oechauka vi imboekoa reta iyapugüe vae

jare omee chupe yerovia opambae vae.

Arakuaa jare Israel-ɨgua reta Egipto güi oë vae

15Arakuaa ko güɨroasayepe nerëta ipo iyoambae vae reta,

nerëta ipo reta jekombae vae,

tëtaguasu ipo reta oyuvanga jese reta vae güi.

16Oike Moisés jekove pe, nderembiokuai,

jare mɨakañɨ tuichagüe reta ndive

oyemboɨ mburuvicha guasu reta kɨɨyea vae jóvai.

17Omee nerëta ikɨambae vae reta pe jembiporara jepɨgüe,

jare güɨroata tape mɨakañɨ pegua vae rupi;

omoküaraɨa ara rupi,

jare pɨare rupi yasɨtata reta jembipegüe rami.

18Güɨroasa ɨvɨ rupi Ɨguasu Pɨ̈ta vae rupi,

güɨraja güɨraja ɨ tɨpɨ vae rupi;

19ërei ngatu, jovaicho reta, opa omosakapɨmi,

jare jupiveiño opa ye güɨnoe iyé güi.

20Jare jökorai jupi vae reta opoko jeko kavimbae reta imbaeyekou re,

omboete reta, Tumpa, nderé ikɨambae vae,

jare metei ramiño omee reta yasoropai ndeve echa nde reepɨ reta jeko pegua:

21arakuaa ko omboe iñeembae vae reta iñee vaerä

jare oyora michia reta ikü.