NÚMEROS 23 - Guarani Bible with DC

1Balaam jei Balac pe:

—Emopüa cheve kuae pe chiu mɨmba oyeyuka oyeapɨ jese vae, jare eipɨɨ chiu toro taɨrusu vae jare chiu vecha kuimbae.

2Balac oyapo Balaam oiporu rami; jare Balac jare Balaam oyuka omee metei toro taɨrusu vae jare metei vecha kuimbae mɨmba oyeyuka oyeapɨ jese vae ñavo re.

3Javoi Balaam jei Balac pe:

—Epɨta mɨmba oyeyukagüe opaetei oyeapɨ vae iyɨpɨ pe; che ajata yaecha yandeYa oyekuaauka cheve, jare oipotagüe mbae oechauka cheve vae, amombeuta ndeve.

Jare Balaam ojo metei ɨvɨtɨ ñanambaea re tei.

4YandeYa ou oövaiti Balaam, jare Balaam jei chupe:

—Amopüauka chiu mɨmba oyeyuka oyeapɨ jese vae jare metei ñavo re amee metei toro taɨrusu vae jare metei vecha kuimbae.

5Jare yandeYa omee Balaam iñeerä, jare jei chupe:

—Ekua ye Balac kotɨ, jare ere jökorai chupe.

6Jare Balaam ojo ye Balac kotɨ, jare jae oime oï mɨmba oyeyukagüe opaetei oyeapɨ vae iyɨpɨ pe, opaete Moab pegua mburuvicha reta ndive.

7Jare jae jei ombojaanga reve mbae oasata vae, körai:

“Aram güi chereru Balac, Moab pegua mburuvicha guasu,

ɨvɨtɨ reta kuaraɨ oëa kotɨ ñogüɨnoia güi:

‘Eyu eyepopeyu cheve Jacob iñemuña reta re.

Ere ñee ikavimbae Israel iñemuña reta kotɨ cheve.’

8¿Maera pa che ayepopeyuta Tumpa mbaetɨ oyepopeyu jese vae re?

¿Maera pa aröɨrota yandeYa mbaetɨ güɨröɨro vae?

9Echa ɨ̈vavira reta iyapɨte güi che amaeta jese,

jare ɨvate güi aechata:

Mase, jae ko metei tëta okɨɨyembae reve oikota vae,

ambuaeyeeta ïru tëtaguasu reta güi.

10¿Kia pa ipuereta oipapa Jacob iñemuña reta?

¿Ani mbovɨ ra ñogüɨnoi vae?

¡Amano yepe mona jókuae kuimbae jupi vae reta rami,

jare cheapɨ jae reta iyapɨ rami!”

11Jayave Balac jei Balaam pe:

—¿Mbae pa ko reyapo reï cheve? Rogüeru ko reyepopeyu vaerä cherovaicho reta re, añave ko nde reyerure mborerekua re reï jese reta.

12Jare Balaam jei:

—Ngaraa aipoɨu chemiari yandeYa omee cheñeerä vae.

13Ërei Balac jei:

—Romoñera yaja vaerä che ndive, ïkotɨa güi remae vaerä jeyupa re; jembeɨño reechata, mbaetɨta reecha opaete; jare joko güi eyepopeyu jese reta cheve.

14Jare Balac güɨraja Balaam Zofim pe, ɨvɨtɨ Pisga iyapɨte re, jare omopüa chiu mɨmba oyeyuka oyeapɨ jese vae reta, jare omee metei toro taɨrusu vae jare metei vecha kuimbae mɨmba oyeyuka oyeapɨ jese vae ñavo re.

15Jare jei Balac pe:

—Epɨta kuae mɨmba oyeyukagüe opaetei oyeapɨ vae iyɨpɨ pe, jare che ajata añoövaiti yandeYa ndive joko pe.

16Jare yandeYa oë oövaiti Balaam, jare omee iñeerä, jare jei chupe:

—Ekua ye Balac kotɨ, jare ere jökorai chupe.

17Jare Balaam ojo ye Balac kotɨ, jare jae oime oï mɨmba oyeyukagüe opaetei oyeapɨ vae iyɨpɨ pe, opaete Moab pegua mburuvicha reta ndive. Jare Balac oparandu chupe:

—¿Mbae pa Tumpa jei?

18Jayave Balaam jei ombojaanga reve mbae oasata vae, körai:

“Balac, Zipor taɨ,

eyeapɨsaka kavi cheré.

19Tumpa, kuimbaeä ko iyapu vaerä;

jare kuimbae taɨä ko oipoepɨ vaerä iyemongeta.

Jae mbae jei yave, oyapo.

Mbae güɨrökuavee yave ombopo iñee.

20Ko, omee cheve jae vaerä ñee kavi;

Tumpa jei ñee kavi yave, che mbaetɨ chepuere aipoepɨ.

21Mbaetɨi oecha ikavimbae jare yembotavɨ Israel iñemuña reta re.

YandeYa Tumpa oime oï jae reta ndive.

Jare jae reta osapúkai omboete mburuvicha guasu rami.

22Tumpa ko, Egipto güi güɨnoe reta;

jae ko ipɨ̈rata yae chupe reta toro rami.

23Echa Jacob iñemuña reta re mbaetɨ ko oa moroäɨvo.

Mbaekuaa rupi maratuta vae oyemombeu vae ave ko mbaetɨ oa Israel iñemuña reta re.

Añave rupi jei reta ñogüɨnoi chupe:

‘¡Jeta mɨakañɨ oyapo neTumpa ndeve!’

24Kuae tëta opüata oñemoata yaguapope rami,

ngaraa oputuu jou regua jembia,

jou regua jembia jugüɨ.”

25Jayave Balac jei Balaam pe:

—¡Mbaetɨ ma reyepopeyu jese, ërei agüɨye ere ñee kavi ikotɨ!

26Ërei Balaam jei Balac pe:

—¿Amombeuä pa ndeve, opaete yandeYa jei cheve vaeño ayapota vae?

27Jayave Balac jei chupe:

—Romoñera yaja cherupíe, torogüɨraja ïkotɨa; güɨramoi joko güi jae kaviñota Tumpa pe reyepopeyu vaerä jese cheve.

28Jare Balac güɨraja Balaam ɨvɨtɨ Peor iyapɨte re, joko güi oyekuaa opaetei ñuu.

29Ërei Balaam jei Balac pe:

—Emopüa cheve kuae pe chiu mɨmba oyeyuka oyeapɨ jese vae, jare eipɨɨ chiu toro taɨrusu vae jare chiu vecha kuimbae.

30Jare Balac oyapo Balaam jei chupe rami; jare Balaam omee metei toro taɨrusu vae jare metei vecha kuimbae mɨmba oyeyuka oyeapɨ jese vae ñavo re.