2 MACABEOS 8 - Guarani Bible with DC

Judas Macabeo oñemopüa mburuvicha reta re vae regua

1Jökorai yave, Judas Macabeo jare iñeïru reta oike vɨari tëta rupi oenɨi jëtara reta, jare omboatɨ vi judío jeko oeyambae vae reta, opaete reve omboatɨ ko seis mil rupi.

2Oiporu reta yandeYa pe omae vaerä jëta re, oiparareko vaerä tupao ñemomarai rupi güɨreko ipɨapochɨ vae reta re.

3Oiparareko vaerä tëta guasu oyerereko rai jare oyemboai pota ma oï vae re, oendu vaerä chupe jupi vae omano vae reta jugüɨ isapúkai rupi.

4Imaendúa vaerä michia jekombae vae reta imano re jare yekura ojäa reta ikotɨ vae, jare oechauka vaerä iyarasɨ mbae pɨ̈chɨi vae kotɨ.

5Macabeo oyembojuvicha isundaro reta pe jare mbaetɨ etei itumpa ambuae vae reta ipuere jese, echa Tumpa iyarasɨ oipoepɨ mboroparareko pe.

6Güɨramoi peguaño oike reta tëta rupi jare opa oapɨ; oñemokätɨro jëgua jëguaa rupi jovaicho reta re jare opa ombosɨi.

7Pɨare rupi jeta opüa jovaicho reta re, opaete ɨvɨ rupi jërakua ipoki yae ñoraro pe vae pe.

Nicanor jare Gorgias oike Judea pe(1 Mac 3.38-45)

8Filipo oecha ma yave Judas Macabeo mboki mboki pe oyembotuicha ojo, jare jembiapo jekuae avei oyekuaa, ombaekuatía Tolomeo pe, jae ko sundaro ruvicha Celesiria jare Fenicia pegua, ou vaerä omee iporomborɨ mburuvicha guasu kotɨ.

9Tolomeo oiparavo Nicanor, Patroclo taɨ, jae ko mburuvicha guasu ichëi, jare omondo veinte mil rupi sundaro reta iñäkarä, oparapiti vaerä opaete judío reta re, jae ndive omondo vi Gorgias, sundaro ruvicha ipoki yae ñoraro peguarä vae.

10Nicanor oyemongeta tëi ko, tembipɨɨrä judío reta omeeta vae güi, omboepɨ vaerä tributo sesenta y seis mil kilo korepoti ipía mburuvicha reta pe vae.

11Jaema etei omondo mbarea opaete ɨguasu iyɨ́vɨri ñogüɨnoi vae tëta reta rupi, ogua vaerä jembiaurä judío reta, jae oñererökuavee omee vaerä chupe reta mboapɨ tembipɨɨ metei kilo korepoti re, mbaetɨ ave oyemongeta Tumpa imbaepuere yae vae omboepɨukata ko chupe vae re.

12Judas pe jërakua yave Nicanor oporepeña ou jese vae, omombeu ikuimbae reta pe tovaicho köiño ma ou chugüi reta vae.

13Jayave okɨɨye vae reta jare mbaetɨ güɨrovia Tumpa jembiapo re vae reta, opa otekuarai oñemi ïkotɨa rupi.

14Ïru reta omee iyeugüi imbaembae, jare oiporu yandeYa pe oepɨ vaerä ipɨapochɨ vae Nicanor ipo güi, echa ndei oñoraro mbove, jae opa voi ma omee reta;

15oiporu reta Tumpa pe, mbaetɨ yave ipɨakatu jese reta, timaendúa ñomoïru oyapo iyɨpɨ reta ndive vae re, jare tee ikavigüe jare ikɨa mbae vae jae reta güɨreko vae re.

Judío reta omboɨpɨ omoamɨri Nicanor(1 Mac 3.46-60)

16Macabeo omboatɨ jeta vae reta, oupitɨ ndipo seis mil kuimbae rupi, jare oyókuai oñemoäta ngatu vaerä jovaicho jóvai, agüɨye vaerä vi okɨɨye reta itumpa ambuae vae reta yogüeru ikotɨ vae güi, oñoraro vaerä ikuimbae reve;

17imaendúa reve jasɨ katu rupi oyuvanga itumpa ambuae vae reta tupao re vae jare vi iyɨpɨ reta jeko omboai chugüi reta vae re.

18Jei: “Jae reta oyerovia jembiporu jare ikatupɨrɨ re. Ërei yande, yayeko ñaï Tumpa imbaepuere vae re, echa jae iñee peño ipuere ko omoamɨri oporepeña yandekotɨ vae reta, jaeramiño vi opaete ɨvɨ ipo reta.”

19Omomaendúa kërai ko oasayepe iyɨpɨ reta vae, Senaquerib iara pe, omano yave ciento ochenta y cinco mil kuimbae reta,

20jare Babilonia pe, Galaciaɨgua reta ndive ñoraro oyeapo vae güi. Jókuae ara rupi omboɨpɨ ñoraro ocho mil judío reta jare cuatro mil sundaro Macedoniaɨgua reta, ërei jae reta jopa jopa yogüɨreko ramboeve, ocho mil vae judío reta, Tumpa iporomborɨ rupi, omoamɨri ciento veinte mil vae tovaicho reta, jare oyemboiya reta teyupapo re.

21Opa ma yave omoäta ngatu reta iñee pe, jare güɨnoindaivi reta omano vaerä mborookuai re jare iɨvɨ re, opa omboyao irundɨ pe isundaro reta.

22Metei yemboyao iñäka ñavo oñono metei jëtara, jae ko Simón, José jare Jonatán, metei tëi ñavo pe omboasa mil quiniento kuimbae reta.

23Joko güi oyókuai Azarías omongeta vaerä tembikuatía guasu, jare opa ma yave omee reta ñee oyoupe oyokua vaerä pɨpe, jae ko “Tumpa tiyandemborɨ”, jei vae pe yave, oguata tenondegua yemboyao iñäka pe re opüa Nicanor re.

24Imbaepuere tuicha yae vae omborɨ reta iñoraro pe, jáeramo oyuka reta nueve mil rupi tovaicho, opa oyapicha jare ombopere Nicanor isundaro reta jare opa osɨi joko güi.

25Oyemboiya reta vi yogüeru tëi ombaegua vae reta ikorepoti re. Oaɨkuemoña reta tëi mombɨrɨ katu, ërei opa ye oyerova echa kaaru oupitɨ reta,

26ara mbutuu iara oyearo ma ramo, oporoaɨkuemoña poi reta.

27Opa ma yave omboatɨ reta jovaicho jembiporu jare jeyupapo, omboasa reta ara mbutuu, ombaemboete jare omee reve yasoropai yandeYa pe echa jae oyangareko reta jese, jare omboɨpɨ ma peechauka reta iporoparareko ramo.

28Ara mbutuu oasa ma yave, omboyao reta teyupa, omboasa reta mbovɨ imemano vae reta pe jare tɨ̈reɨrä opɨta ñoraro jeko pegua vae reta pe, jare jembɨregüe opɨta chupe jare taɨ reta peguarä.

29Kuae jaɨkue rupi, opaete reve oyerure yandeYa iporopareko vae kotɨ, oiporu reta chupe iñɨ̈ro ete vaerä jembiokuai reta pe.

Timoteo jare Báquides iñamɨri

30Oñoraro yave Timoteo jare Báquides isundaro reta ndive, oyuka reta chugüi veinte mil oasa rupi kuimbae reta jare opɨ̈ro reta chugüi ñepɨ̈roa ɨvate vae reta. Joko güi omboyao reta teyupapo mbɨte rupi, metei mbɨte iyeupeguarä reta, jare ïru mbɨte, tɨ̈reɨ reta, imemano vae jare ndechi reta pegua.

31Güɨraja pɨagüive reta jovaicho jembiporu oñovatu jae reta oiparavoa pe, jare jembɨregüe güɨraja reta Jerusalén kotɨ.

32Oyuka reta Timoteo isundaro ruvicha, kuae mbɨa jae ko ipɨapochɨ yae jare jeta oiporarauka judío reta pe vae.

33Oyerovia ramboeve oporomoamɨri Jerusalén pe vae re, oapɨ reta tupao jöke japɨa reta, jare vi Calístenes, oñemi oiko metei o rapɨpe pe vae; jökorai omboepɨ kuae mbɨa imbaeyoa.

Nicanor itekuarai jare iyemombeu

34Nicanor, ipïrimbae güeru korepoti iya reta oguauka vaerä chupe judío reta vae,

35oñemoamɨriuka yandeYa Tumpa pe vae, jemimonde ipöra veä ma, osɨi jaegüɨraiño ma oiko, otekuarai oiko kaa rupi, ojo oväe Antioquía pe, oasayepeiti isundaro reta opa omanoa pe.

36Jare jae, oñererökuavee omboepɨ vaerä Romaɨgua reta pe tributo judío reta jepɨgüe re vae, güɨrovia judío oime ko iyeepɨka vae, jare ngaraaí ko kia ipuere jese reta echa Tumpa iporookuai jeia oyapo reta, iyeepɨka ko omee chupe reta.