1 REYES 13 - Guarani Bible with DC

Metei ñeemombeúa omboeta Jeroboam pe

1Jeroboam, oapɨta oï ikäti kavi vae incienso, ikäti kavi vae incienso oyeapɨ jese vae re yave, ou oväe Judá güi Bet-el pe metei Tumpa iñeemombeúa.

2Jae iñeeäta reve jei Tumpa iñee, ikäti kavi vae incienso oyeapɨ jese vae kotɨ: “Mbota oyeapɨ jese vae, mbota oyeapɨ jese vae, körai jei yandeYa: ‘Mase, ko David jëtara güi oata metei michia raɨ, jeeta Josías, jae oapɨta nderé mbaemboetea pegua sacerdote reta ikäti kavi vae incienso oapɨ nderé vae reta; nderé oapɨta kuimbae2 R 23.15-16. ikägüegüe.’ ”

3Jókuae ara voi, omee metei kañɨmaa oporomopɨakañɨ vae jei reve: “Kuae jae kañɨmaa yandeYa omoërakua vae: Ikäti kavi vae incienso oyeapɨ jese vae opata oyeka yeka jare tanimbu oï jese vae opata oyepɨyere.”

4Jeroboam oendu yave Tumpa iñeemombeúa jei ikäti kavi vae incienso oyeapɨ jese vae Bet-el pegua kotɨ yave, jókuae ikäti kavi vae incienso oyeapɨ jese vae güi omopüa ipo jei: “¡Peipɨɨ!” Ërei jókuae ipo opövee pɨpe vae oyepokuaa, täta opɨta chugüi, mbaetɨ ma ipuere omomɨi.

5Jare ikäti kavi vae incienso oyeapɨ jese vae opa oyeka yeka, jare tanimbu oï jese vae opa oyepɨyere, Tumpa iñeemombeúa omoërakua yandeYa iñee, mɨakañɨ oikota vae rami.

6Jayave mburuvicha guasu Jeroboam jei Tumpa iñeemombeúa pe:

—Romoñera reyerure vaerä cheré ndeYa Tumpa pe, chepo okuera vaerä.

Tumpa iñeemombeúa oyerure yandeYa pe, jare mburuvicha guasu ipo okuera, opɨta tenonde rami.

7Jayave mburuvicha guasu jei Tumpa iñeemombeúa pe:

—Eyu yaja cherupíe chero pe rekaru vaerä jare rombopotata vi mbae pe.

8Ërei Tumpa iñeemombeúa jei mburuvicha guasu pe:

—Yepe tëi mona remee cheve ndero pegua mbɨte rupi, ngaraa aja nderupíe, ngaraa vi akaru jare jau ɨ kuae pe;

9echa jökorai ko cheokuai yandeYa, jei cheve: “Agüɨye jeu mbɨyape, ɨ ave agüɨye jeu, tape reo jupi vae rupi ave agüɨye eyerova ye.”

10Jare Tumpa iñeemombeúa oyerova ye ïru tape rupi, mbaetɨ oyerova jókuae tape jupi ojo Bet-el pe vae rupi.

11Jókuae ara rupi Bet-el pe oiko metei ñeemombeúa indechi vae, taɨ reta imiari chupe opaete mbae oyapo Judá pegua Tumpa iñeemombeúa Bet-el pe vae re, omombeu reta vi tu pe, mbae jei mburuvicha guasu pe vae.

12Jare tu oparandu chupe reta:

—¿Kia nunga tape rupi pa ojo?

Jare taɨ reta omombeu chupe, kia nunga tape rupi ko ojo jókuae Tumpa iñeemombeúa Judá güi ou vae.

13Jayave jei taɨ reta pe:

—Peyokua cheve mburika.

Oyokua reta chupe, jare jókuae ñeemombeúa opo jese.

14Jare oë ojo Tumpa iñeemombeúa Judá pegua jaɨkue. Oväe chupe oguapɨ oï ɨvɨra encina igüɨ pe, jare jei chupe:

—¿Jae pa nde Tumpa iñeemombeúa reyu Judá güi vae?

—Jae ko che —jei chupe.

15Jare ñeemombeúa indechi vae jei:

—Yaja cherupíe chero pe, rekaru vaerä.

16Ërei Tumpa iñeemombeúa Judá pegua jei:

—Ngaraa chepuere aja nderupíe ndero pe akaru vaerä, ɨ ave ngaraa jau kuae pe;

17echa Tumpa jei cheve: “Agüɨye ekaru, ɨ ave agüɨye jeu joko pe, tape reo jupi vae rupi ave agüɨye eyerova ye.”

18Ërei indechi vae jeiete yapu reve omoñera:

—Che jae vi ko Tumpa iñeemombeúa nde rami, metei araɨgua omombeu Tumpa iñee cheve jei reve: “Ekua eru ndero pe. Tokaru jare tou ɨ.”

19Jayave Tumpa iñeemombeúa ojo jupíe jëta pe okaru jare oɨu.

20Jare oimeño oguapɨ ñogüɨnoi mesa iyɨ́vɨri ramboeve, yandeYa iñee ou ñeemombeúa indechi vae pe, jókuae güeru jëta pe Judá pegua Tumpa iñeemombeúa vae pe.

21Jare indechi vae iñeeäta reve jei chupe:

—YandeYa jei mbaetɨ reyapo ndeokuai rami,

22echa reyerova ye rekaru vaerä jare reɨu, yandeYa ndeokuai agüɨyeta tëi reyapo vae pe, jáeramo mbaetɨta reñeotɨ neñemuñagüe reta jɨvɨa oïa pe.

23Tumpa iñeemombeúa Judá pegua opa okaru jare jou ɨ yave, jókuae ndechi oporogüeru vae oyokua mburika chupe,

24jare Tumpa iñeemombeúa Judá pegua ojo. Ërei tape rupi oë chupe yaguapope jare oyuka, jare jetegüe oyepɨso oï tape rupi. Imburika jare yaguapope joko pe vi ñogüɨnoi jëogüegüe iyɨpɨ pe.

25Jare jókuae tape rupi oasagüe reta oecha jëogüe oyepɨso oï tape pe vae, jare yaguapope oimeño vi oï joko pe. Yogüɨraja oväe ñeemombeúa indechi vae jëta pe, jare omombeu reta oechagüe.

26Jare ñeemombeúa indechi vae oendu yave, oikuaa jae ko jókuae omboyerovauka ye vae, jei: “Jae ko jókuae Tumpa iñeemombeúa oyapombae yandeYa iporookuai vae. Jáeramo jae omee yaguapope pe opa omopächa oyuka vaerä. YandeYa jei chupe rami.”

27Jare jupiveiño oyókuai taɨ reta oyokua vaerä chupe mburika, jare jae reta oyokua chupe.

28Jayave ñeemombeúa indechi vae ojo jare oväe chupe jëogüegüe oyepɨso oï tape pe, iyɨpɨ pe oime oï imburika jare yaguapope. Jókuae yaguapope mbaetɨ yepe jou tëogüe ani oyuka mburika.

29Jare ñeemombeúa indechi vae omopüa Tumpa iñeemombeúa Judá pegua jëogüegüe oñono imburika re jare güɨraja jëta pe ipɨatɨtɨ vaerä jese jare oñotɨ vaerä.

30Oñotɨ imbae tëogüe-rɨru pe jare oäpiro reta jei reve: “¡Atataɨ cherɨvɨ!”

31Opa oñotɨ yave jei taɨ reta pe:

—Che amano yave, cheötɨ kuri tëogüe-rɨru jókuae Tumpa iñeemombeúa oñeotɨa pe. Cheretegüe peñono kuri jae ndive,

32echa jae omoërakua yandeYa iñee ikäti kavi vae incienso oyeapɨ jese vae Bet-el pegua kotɨ vae oyembopota ko jare opaete tumpa-raanga jo mbaemboete renda ɨvɨtɨ rupigua tëta guasu reta Samaria pe vae kotɨ.

33Opaete kuae mbaembae reta reve Jeroboam mbaetɨ oeya jeko kavimbae, jekuae oñono sacerdote reta tëta pe tumpa-raanga iyemboete renda peguarä jae oipota vae. Jeroboam oiparavo sacerdote kuae nunga mbaemboetea reta peguarä.

34Kuae oyapo vae rupi Jeroboam jare iñemuña reta oa mbaeyoa pe, kuae jeko pegua oñemokañɨteiuka ɨvɨ iárambo güi.