ESDRAS 8 - Guarani Bible with DC

Yogüeru ye ïru ɨvɨ güi vae reta jee

1Kuae ko jae metei tëtara yogüɨreko vae itenondegua jee reta tupapire pe oyekuatía oï rami, che ndive ñogüɨnoe Babilonia güi vae, Artajerjes oiko mburuvicha guasurä yave:

2Gersón, Finees iñemuña pegua;

Daniel, Itamar iñemuña pegua;

Hatús, David iñemuña pegua;

3Zacarías, Secanías jare Paros iñemuña pegua; jare jae ndive ciento cincuenta kuimbae jae jëtara;

4Elioenai, Zeraías taɨ, Pahat-moab iñemuña pegua; jare jae reta ndive dosciento kuimbae jae jëtara;

5Jahaziel taɨ, Secanías iñemuña pegua, jare jae ndive tresciento kuimbae jae jëtara;

6Ebed, Jonatán taɨ, Adín iñemuña pegua, jare jae ndive cincuenta kuimbae jae jëtara;

7Jesaías, Atalías taɨ, Elam iñemuña pegua, jare jae ndive setenta kuimbae jae jëtara;

8Zebadías, Micael taɨ, Sefatías iñemuña pegua, jare jae ndive ochenta kuimbae jae jëtara;

9Obadías, Jehiel taɨ, Joab iñemuña pegua, jare jae ndive dosciento dieciocho kuimbae jae jëtara;

10Josifías taɨ, Selomit iñemuña pegua, jare jae ndive ciento sesenta kuimbae jae jëtara;

11Zacarías, Bebai taɨ, Bebai iñemuña pegua, jare jae ndive veintiocho kuimbae jae jëtara;

12Johanán, Hacatán taɨ, Azgad iñemuña pegua, jare jae ndive ciento diez kuimbae jae jëtara;

13Elifelet, Jeiel jare Semaías, jae Adonicam iñemuña taɨkuegua ete pegua reta, jare jae reta ndive sesenta kuimbae jae jëtara;

14Utai jare Zabud, jae Bigvai iñemuña pegua reta, jare jae reta ndive setenta kuimbae jae jëtara.

Tupao guasu pe oyeokuai vae reta

15Amboatɨ reta ɨ̈aka ojo tëta Ahava kotɨ vae jembeɨ pe, jare royembojeyupa joko pe mboapɨ ara. Jare aeka levita reta, jeta vae reta jare jëtara sacerdote reta ipɨte pe, ërei mbaetɨ aväe.

16Jayave amondo Eliezer, Ariel, Semaías, Elnatán, Jarib, Elnatán, Natán, Zacarías jare Mesulam, jae ko kuimbae tenondegua vae reta, jaeramiño vi Joiarib jare Elnatán kuimbae oporomboe vae reta,

17jare amondo reta tenondegua Iddo, Casifia pegua pɨri, jare amee chupe reta ñee imiari vaerä jae ndive, jare jëtara reta pe tupao guasu pe oyeokuai vae, Casifia pe ñogüɨnoi vae, güeru reta vaerä oremborɨ oreTumpa itupao guasu pe.

18Jare güeru reta oreve oreTumpa imbaepuere rupi, metei kuimbae yarakuaa katu vae Serebías, Mahli iñemuña pegua, Mahli jae Leví iñemuña, jare Leví jae Israel taɨ; güeru reta taɨ reta ndive jare jëtara reta ndive, opaete reve dieciocho.

19Güeru reta vi Hasabías jare jae ndive Jesaías, Merari iñemuña pegua, jëtara reta ndive jare taɨ reta ndive, opaete reve veinte.

20Jare tupao guasu pegua tembiokuai reta David jare iyɨvɨrigua reta ndive oñono omborɨ vaerä levita reta mbaravɨkɨ pe vae, opaete reve dosciento veinte, kuae reta opaete oñeenɨi jee jee ae rupi kavi.

21Jare jókuae ɨ̈aka Ahava jembeɨ pe royekuaku tembíu güi, roñemomichi vaerä oreTumpa jóvai royavɨ jeko pegua, jare royerure vaerä chupe orereraja kavi vaerä, ore, oremichia reta jare orembaembae reta.

22Echa che chemara aiporu mburuvicha guasu pe sundaro reta kavayu regua reta oreangareko vaerä tape rupi tovaicho reta güi, echa roe ko mburuvicha guasu pe: “Tumpa oepɨ ko opaete oyeko jese vae, ërei iyarasɨ jare imbaepuere oï ko mbaetɨ oyeko jese vae reta re.”

23Royekuaku tembíu güi, jare royerure oreTumpa pe jókuae re, jare jae oendu oreve.

24Javoi aiparavo doce sacerdote itenondegua reta, jae ko Serebías jare Hasabías, jare jae reta ndive payandepo jëtara.

25Jare ajäa chupe reta oro, korepoti jare tembiporu reta, mburuvicha guasu jare imboarakuaa reta jare opaete Israel iñemuña reta joko pe ñogüɨnoi vae mbota omee vae, ñaneTumpa itupao guasu peguarä vae.

26Amee jae reta ipo pe, veintiún mil cuatrociento cincuenta kilo korepoti, jare tembiporu reta korepoti pegua, oupitɨ tres mil tresciento kilo, jare tres mil tresciento kilo oro,

27jaeramiño vi veinte tasa guasu oro pegua, opaete reve juri kilo ipoɨ vae, jare mókoi vaso jiero iyu vae pegua, jembipe yae oro rami vae.

28Jare jae chupe reta: “Pe reta peñeñono tee ko yandeYa pe, jökoraiño vi kuae tembiporu reta oñeñono tee ko. Korepoti jare oro jae ko mbota reta oñemee pɨa-kɨ̈reɨ ngatu reve yandeYa pe vae, ñaneñemuñagüe reta iTumpa.

29Peñovatu kavi jare peyangareko jese, oñejäa regua sacerdote reta jare levita reta itenondegua reta jare metei tëtara vae itenondegua Israel iñemuña reta pegua jóvai, yandeYa Tumpa jo pe Jerusalén pe.”

30Jayave sacerdote reta jare levita reta oipɨɨ jókuae korepoti, oro jare tembiporu reta oñejäagüe, güeru reta vaerä Jerusalén pe, ñaneTumpa jo pe.

31Jare doce araa re tenondegua yasɨ pe roë ɨ̈aka Ahava güi rojo vaerä Jerusalén kotɨ; jare oreTumpa iporomborɨ oï ore ndive, orereepɨ tovaicho reta güi jare omaepɨ̈ro tape rupi vae reta ipo güi.

32Royu roväe Jerusalén pe jare roputuu joko pe mboapɨ ara.

33Jare irundɨ araa re oñejäa korepoti, oro, jare tembiporu reta yandeYa jo pe, jare oñemee sacerdote Meremot, Urías taɨ pe, jae ndive oï Eleazar, Finees taɨ, jare jae reta ndive ñogüɨnoi levita reta Jozabad, Jesúa taɨ, jare Noadías, Binúi taɨ.

34Jókuae ara oyepapa jare oñejäa kavi opaete, jare oyemboguapɨ tupapire pe.

35Tembipɨɨ güi oyerova ye vae reta omee reta mɨmba oyeyukagüe opaetei oyeapɨ vae Israel iTumpa pe, doce toro taɨrusu vae opaete Israel iñemuña reta re, noventa y seis vecha kuimbae, setenta y siete vecha kuimbae taɨrusu vae, jare doce kavara kuimbae Tumpa iñɨ̈ro vaerä mbaeyoa re. Opaete kuae mɨmba reta oyeyukagüe opaetei oyeapɨ yandeYa pe.

36Jare omee reta mburuvicha guasu mborookuai omee vae tëta ruvicha reta pe, jare mburuvicha reta ɨ̈aka Éufrates jovaicho pegua reta pe; jare jókuae mburuvicha reta omborɨ tëta jare Tumpa jo.