1Opaete ma jókuae teyupa pe oï vae reta oikuaa jókuae oasa oï vae yave, täta okɨɨye reta,
2opa jembiurai kɨɨye oyapo reta, jaemai opa oñemoai aï reta oë osɨi reta ñuu rupi, tape ojo vae rupi jare ɨvɨtɨ rupi ojo vae rupi, mbaetɨ etei mókoi yepe kuimbae ojo päve vae.
3Jare Betulia ɨvɨtɨ iyɨ́vɨri ñogüɨnoi vae reta äve opa otekuarai. Jaema jayave opaete Israel-ɨgua reta ipuereta ma oñoraro vae reta oë oaɨkuemoña reta.
4Jare Ozías omondo Betomestaim kotɨ vae jare Bebai kotɨ, Cobá kotɨ, Cola jare opaete ɨvɨtɨ reta ñogüɨnoi Israel pe vae rupi, omombeu vaerä mbae oasa oï vae jare opaete oë vaerä oporoaɨkuemoña vae. Jökorai opa vaerä omokañɨtei tovaicho reta.
5Jaema Israel-ɨgua reta jókuae oikuaa yave, opaete voi ojo metei jeia pe jare opoko Asiriaɨgua reta re, omoamɨri reta jare oaɨkuemoña reta, güɨraja Hoba pe. Jaema Jerusalén pe ñogüɨnoi vae reta jare ɨvɨtɨ re yogüɨreko vae reta oikuaa jókuae mbae oasa oï tovaicho reta jeyupa pe vae yave, jae reta vi yogüeru. Kuimbae Galaad pegua jare Galilea pegua reta yogüɨraja oväe Damasco pe jare iyɨ́vɨri rupi jae reta räri voi opoko Asiriaɨgua reta re jare jeta oyuka reta.
6Jare Betuliaɨgua reta opoko ma vi Asiriaɨgua reta jeyupa re, opoko oekɨ reta iyeupe jeta rupi mbae jepɨ vae reta.
7Jaema Israel-ɨgua reta opa ye ma oyerova oparapitía kotɨ güi yave, jae reta ma vi yogüɨraja güeru iyeupe opɨta pɨtagüe reta. Jaeramiño vi opaete oime ɨvɨtɨ rupi yogüɨreko vae reta ɨvɨtɨ päu rupi yogüɨreko vae reta vi opoko ojo güeru jeta mbae iyeupe, echa oasa ete jeta mbae oï joko pe.
Judit oyemboete vae8Pai guasu Joaquín jare ndechi Israel pegua reta Jerusalén pe yogüɨrekose vae opa yogüɨraja omae Tumpa mɨakañɨ oyapo Israel-ɨgua reta pe vae re, oecha vaerä jaeramiño omboete vaerä Judit.
9Opa yave yogüɨraja oväe Judit oïa pe, opaete metei rami omboete reta jare jei reta:
—¡Nde jae Jerusalén oyemboete jese vae, jare yerovia tuicha vae Israel pegua, yemboete tuicha vae ñanerëta pegua!
10Ndepo pe reyapo opaete kuae; jare reyapo ikavi vae Israel pe, yandeYa ko oechauka ndeve ipɨakavi. ¡YandeYa imbaepuere vae toiko nde ndive opaete ara rupi!
Jare opaete tëta ipo reta jei:
—¡Jökorai toiko!
11Treinta ara rupi, tëta ipo reta oñomi yogüɨreko mbaembae Asiriaɨgua reta teyupa güi. Omee reta Judit pe Holofernes imbaembaegüe reta, opaete jembiporu reta korepoti pegua, jupa, ivaso reta jare opaetei ïru jembiporu. Jae opa oipɨɨ imbaerä jare oñono imburika guasu re, joko güi opa ye oñono kavi ikäretou reta, jare opa mbae oñono pɨpe.
12Jare opaete vae kuña Israel pegua osɨi yogüɨraja omae jese, jare omboete reve opɨrae reta chupe. Judit oipɨɨ ma ñana ñana reta jare opa omee mee kuña jupiegua reta pe.
13Jare oñono reta iñäka re mbaepotɨ olivo pegua. Jare ojo opaete tëta ipo reta jenonde, kuña opɨrae vae reta jenonde ojo. Jaɨkue yogüɨraja opaete kuimbae reta, imboka reve reve, oñemopöra reve äka-regua pe jare oyemongoi reta himno pe.
Judit iyemongoi14Jayave Judit, opaete Israel-ɨgua reta ipɨte pe omboɨpɨ oyemongoi himno mbaemboete pegua pe, jare opaete vae oyemongoi:
Who We AreWhat We EelieveWhat We Do
2025 by iamachristian.org,Inc All rights reserved.
