ECLESIÁSTICO 19 - Guarani Bible with DC

1Echa kia jókuae oyapo vae ngaraaí oyemboikokatu;

kia omaeiño mbae michi vae reta re vae iyapɨta kañɨtei pe.

2Vino jare kuña reta oporogüɨraja ikavimbae pe,

jare kia oiko kuña imbokere vae ndive vae imaraä etei ma ko oyeapo.

3Ichuumbita, taso reta jouta,

jare imarambaeño ko omokañɨteita.

Mbaeyoa ñanekü pegua

4Kia ñavo güɨrovia tenondegua re vae metei espíritu iñäkua vae ko;

kia iyoa vae, jaeiño ko oñemopɨ̈chɨi.

5Kia ñavo pɨ̈chɨi vae oyerovia oyapo vae oñenupata ko.

6Kia ñavo ikü re oyangareko vae, oiko kavita ko,

jare kia ñavo ñeenguru güɨröɨro vae, mbovɨño ko oiporarata.

7Agüɨye emboaɨkuere ejäa ndaye reta,

jare reyemboasayepeta tekorai güi.

8Agüɨye nemiari nechëi re jare nderovaicho re ave;

agüɨye eechauka, yepe tandeyoa nekïrii vae re.

9Jaema metei chugüi reta ndereendu yave, ngaraa ma ndererovia

jare má kaaru ete nemotareɨta ma.

10Imiari reta mbae re ndeve yave, eñovatu remano regua;

agüɨye eyemoambeko, ngaraa ndemondoro.

11Metei yarakuaambae güɨreko metei mbae vɨari pe yave

má ko oiporara metei kuña oyekuaku vae güi.

12Uvɨ itɨmaka re oyeatɨka rami ko,

metei vɨari oiko yarakuaambae ipɨtía re.

13Mbae re imiari reta ndeve nechëi kotɨ yave, eparandu chupe,

güɨramoi yepe jae mbaetɨ oyapo jókuae jei reta vae;

jare oyapo ko yave, agüɨye vaerä mo oyapo ye.

14Imiari reta mbae re nderapicha kotɨ yave, eparandu chupe,

güɨramoi yepe mbaetɨ tëi jei omboya reta jese vae;

ërei jei ko yave, agüɨye vaerä mo jei ye kuri.

15Eparandu nechëi pe;

jökoraiñoi ñomotareɨ katuai

agüɨye erovia opaete jei retagüe.

16Amo yave yayembojopa ko, ërei yaipotaä reveä ko;

¿kia pa iyoa ikü pe?

17Ndei nderapicha remomburu mbove, eparandu chupe;

emaeño Tumpa iporookuai tojo tenonde.

Arakuaa añetegüe

20Opaete arakuaa oï Tumpa oyemboete vaerä

jare mborookuai oyeapo vaerä.

22Pɨ̈chɨi vae re jeta yaikuaa vae, arakuaa ko jókuae;

iyoa vae reta jeigüe rupi yaja yave arakuaa ko jókuae.

23Oime metei yembotavɨ ñamotareɨta vae,

ërei oime yarakuaambae mbaetɨ teko güɨnoi vae.

24Má ikavi yaiko yandearakuaambae ërei yamboete Tumpa

pea yarakuaa katu oiko vae oyapombae mborookuai vae güi.

25Oime ipoki vae mbae oyapo ërei jupimbae reve,

jare oime amogüe ñape mbae oyapo yembojupi oyeapo vaerä chupe.

26Oime amogüe ipe oguata jare ipɨatɨtɨ,

ërei tɨnɨe güɨnoi yembotavɨ pe;

27iñäka oitɨ jare oyemboapɨsaä,

ërei reecha reta yave, jaeño tenondeta ndeve,

28jare añave mbaetɨ güɨnoi mɨ̈rata pɨ̈chɨi vae oyapo vaerä ndeve yave,

nerëgua chupe rupiveño oyapota ndeve ikavimbae.

29Jova re ko yaikuaa kia,

jare ia re ko ikañɨmaa yarakuaa vae.

30Iyemonde ipuka jare iguata ko

omboyekuaa kërai ko kia vae.