NÚMEROS 9 - Guarani Bible with DC

Pascua iyapo regua

1YandeYa jei Moisés pe ñuu Sinaí pe, mokoía año ma ñogüɨnoe Egipto güi yave, tenondegua yasɨ pe:

2“Israel iñemuña reta toyapo Pascua, iara pe kavi,

3ara catorcea, kuae yasɨ pe, kaaru yave toyeapo; toyeapo jókuae mborookuai jei rami etei.”

4Jare Moisés imiari Israel iñemuña reta pe, oyapo reta vaerä Pascua.

5Jayave oyapo reta Pascua, tenondegua yasɨ pe, ara catorcea pe jókuae yasɨ, kaaru yave ñuu Sinaí pe; yandeYa oyókuai Moisés vae rami etei oyapo Israel iñemuña reta.

6Ërei oime mbovɨ kuimbae reta ikɨa Tumpa jóvai vae, tëogüe oyavɨkɨ reta jeko pegua, mbaetɨ ipuere reta oyapo Pascua jókuae ara. Yogüɨraja reta Moisés jare Aarón jóvai jókuae ara,

7jare jei reta Moisés pe:

—Ore orekɨa roï Tumpa jóvai, tëogüe royavɨkɨ jeko pegua. ¿Orepuere potaä pa romee mbota yandeYa pe kuae ara, Israel iñemuña reta ndive?

8Moisés jei chupe reta:

—Peäro räri, mbae ra yandeYa jeita cheve pekotɨ.

9Jare yandeYa jei Moisés pe:

“Ere Israel iñemuña reta pe:

10Kia nunga vae pegüi reta ani peñemuña reta güi, ikɨa yave Tumpa jóvai tëogüe oyavɨkɨ jeko pegua, ani ketɨ ojo jeko pegua mombɨrɨ oñeväe yave, toyapo Pascua yandeYa peguarä,

11mokoía yasɨ pe, ara catorcea pe kaaru yave toyapo reta; tou reta vecha kuimbae taɨrusu vae ndive mbɨyape ovumbae jare ñana iro vae,

12agüɨye etei tomoembɨre reta mɨmba oyeyukagüe güi pɨareve peguarä, agüɨye vi toakɨo reta kërai ave ikägüegüe.Amapɨtu tupao guakapi pegua iárambo(Ex 40.34-38)

15Jókuae ara tupao guakapi pegua omopüa reta yave, amapɨtu opa oñova. Kaaruasɨ güive omoembipe tupao guakapi pegua iárambo köe regua.Ex 13.21-22.

16Jökoraiñoi ara ñavo: Ara pe oñova amapɨtu jare pɨ̈tu yave omoembipe.

17Amapɨtu oyemboɨvate tupao guakapi pegua iárambo güi yave, Israel iñemuña reta omboɨpɨ oguata; jare jókuae amapɨtu opɨtaa pe, jae reta oyembojeyupa.

18YandeYa iporookuai rupi Israel iñemuña reta omboɨpɨ oguata, jare yandeYa iporookuai rupi oyembojeyupa reta; jare joko pe opɨta reta amapɨtu oï ramboeve tupao guakapi pegua iárambo.

19Amapɨtu opɨta yave ɨma ara tupao guakapi pegua iárambo, jayave Israel iñemuña reta oäro yandeYa iporookuai, jare mbaetɨ omboɨpɨ reta oguata.

20Jare amapɨtu opɨta tupao guakapi pegua iárambo mbovɨ araño yave, yandeYa iporookuai rupi oyembojeyupa reta, jare yandeYa iporookuai rupi omboɨpɨ reta oguata.

21Jare amapɨtu opɨta yave metei pɨ̈tuño, köe yave oyemboɨvate yave jae reta omboɨpɨ oguata; ani ara pe opɨta yave, pɨ̈tu yave oyemboɨvate, jökorai yave omboɨpɨ reta oguata.

22Ani amapɨtu opɨta yave mókoi ara, ani metei yasɨ, ani metei año tupao guakapi pegua iárambo, Israel iñemuña reta opɨta vi jeyupa pe, jare mbaetɨ omɨi reta; ërei amapɨtu oyemboɨvate yave, omboɨpɨ reta oguata.

23YandeYa iporookuai rupi jae reta oyembojeyupa, jare jae iporookuai rupi vi omboɨpɨ reta oguata. Oyapo reta yandeYa iporookuai, Moisés rupi jei vae rami.