1David otekuarai Naiot güi Ramá güi, jare ojo Jonatán oïa pe jare jei chupe:
—¿Mbae pa ayapo? ¿Mbae pa chereko? ¿Mbae nunga mbaeyoa pa ayapo nderu kotɨ chereeka vaerä cheyuka?
2Jare jae jei chupe:
—¡Agüɨye eyemongeta jökorai! ¡Ngaraa ndeyuka! Mase, cheru mbaetɨi mbae oikuaku chegüi. ¿Maera pa cheru oikuakuta chegüi kuae regua? ¡Ngaraa remano!
3Jare David jei ye Tumpa jee re:
—Nderu oikuaa kavi yae che jae ko ndevɨa-ïru, jáeramo ko mbaetɨ omombeu ndeve agüɨye vaerä ndembopɨatɨtɨ. ¡Ërei jae ndeve yandeYa jee re jare nderé re, michi yae ma oata amano vaerä!
4Jare Jonatán jei David pe:
—¿Kërai pa reipota romborɨ?
5Jare David jei Jonatán pe:
—Mase, pɨareve ko yasɨ pɨau iarete,Nm 28.11. jare aguapɨta tëi ko mburuvicha guasu ndive akaru vaerä. Ërei nde emaeño taja tañemi kaa pe koéramo kaaru regua.
6Jare nderu chereeka yave, ere chupe chemoñera amaeño vaerä ojo jëta Belén pe, echa joko pe jëtara reta omee mɨmba oyeyukagüe año ñavo.
7Jare jae jei yave ikaviño ko, chepɨakatuñota aï, ërei iyarasɨ yave jae ko oipota cheyuka.
8Eyapo ikavi vae cheve, echa yandeYa jee re yae ma ko yayoaɨu vaerä. Oime yave mbae ayavɨ nde cheyuka, jare agüɨye chereraja nderu jóvai.
9Jare Jonatán jei chupe:
—¡Agüɨye eyemongeta jökorai! Aikuaa yave cheru oipota ndeyuka amombeuta ko ndeve.
10Jare David jei Jonatán pe:
—¿Kia pa omombeuta cheve nderu oyemongeta kaviä cheré vae?
11Jare Jonatán jei David pe:
—Eyu che ndive yaja ko pe.
Jare yogüɨraja päve ko kotɨ.
12Jare joko pe Jonatán jei David pe:
—YandeYa Israel iTumpa jovake, pɨareve ani koéramo koyave aparanduta cheru pe, jare jae oyemongeta kavi nderé yave ambouta amombeu ndeve.
13Ërei cheru ndemomburu ndeyuka vaerä yave, jare mbaetɨ ambou amombeu ndeve yave, yandeYa täta toiporarauka cheve; romborɨta reasayepe vaerä. ¡YandeYa toï nde ndive, cheru ndive oikose rami!
14Ërei aikoveño jókuae ara rupi yave cheparareko yandeYa jee re, agüɨye cheyuka,
15eiparareko avei cheñemuña reta.2 S 9.1. ¡YandeYa omboai yave metei ñavo nderovaicho, agüɨye cheree tokañɨ nerëtara reta ipɨte güi!
16Jökorai Jonatán oyapo morogüɨrökuavee päve David ndive, jekuae avei pegua. “YandeYa tojäa nderovaicho reta” jei chupe.
17Jare Jonatán oyapouka ye David pe morogüɨrökuavee päve, echa oaɨu yae jae oyeaɨu rami.
18Javoi Jonatán jei:
—Pɨareve ko yasɨ pɨau iyarete, jare nderenda ipombae oïta, oparanduta nderé.
19Mboapɨ ara mbaetɨta reï, jayave eyu javoi ekua tenonde reñemi reikoa pe, jare cheräro ita Ezel iyɨpɨ pe.
20Jare che amondota mboapɨ uvɨ jókuae iyɨpɨ kotɨ, mbae re ayembokuaakatu aï rami.
21Javoi amondota cherembiokuai jare jaeta chupe: “Ekua eeka uvɨ reta.” Jare jae yave chupe: “Kɨ̈vatɨ oime oï uvɨ, eyu eru.” Jayave ndepuere reë ndepɨakatu reve reyu, echa mbaetɨta maratu, yandeYa jee re jae ndeve.
22Ërei che jae yave jókuae cherembiokuai pe: “Mase, kutɨ oime oï ndegüi uvɨ reta.” Jökorai jae yave ekua, echa yandeYa ko nemondo.
23Ërei jókuae ñee morogüɨrökuavee päve yayapo vae, yandeYa jovake ko yayapo jekuae avei pegua.
24Jayave David ojo oñemi kaa pe; jare yasɨ pɨau iarete oväe yave, mburuvicha guasu oguapɨ okaru vaerä.
25Oguapɨsea peño oguapɨ ovapetea kotɨ. Jonatán oguapɨ jóvai. Jare Abner oguapɨ Saúl iyɨpɨ pe, jare David jenda ipombaeño oï.
26Jókuae ara Saúl mbaetɨ etei mbae jei, echa oyemongeta David re, ikɨa ko Tumpa jesa róvai, jáeramo mbaetɨ ou.
27Ërei pɨareve pe mokoía ara ma arete yave, jekuaeñoi David jenda ipoä oï. Jayave Saúl oparandu taɨ Jonatán pe:
—¿Maera pa kárumbo jare añave Isaí taɨ mbaetɨ ou okaru?
28Jare Jonatán jei:
—David ojo ko Belén pe.
29Chemoñera amaeño vaerä ojo, echa joko pe jëtara reta omee mɨmba oyeyukagüe, jare tɨkeɨ reta oparea vi chupe. Jei cheve ayapo vaerä ikavi vae chupe, ojoño vaerä omae jëtara reta re. Jáeramo mbaetɨ ou okaru nde mburuvicha guasu ndive.
30Jayave Saúl iyarasɨ Jonatán kotɨ jare jei chupe:
—¡Kuña jeko kavimbae vae imembɨ! ¿Mbaetɨecha pa aikuaa ndeve reiparavo ndevɨa-ïrurä Isaí taɨ vae, nde jare ndesɨ pemomarai vaerä?
31Echa opaete ara Isaí taɨ oikove oiko ramboeve kuae ɨvɨ pe, nde mbaetɨ ndepuere reäro reï vaerä mburuvicharä. ¡Emondo kia togüeru, echa omano tai ko!
32Ërei Jonatán jei tu pe:
—¿Maera pa omanota? ¿Oime pa mbae ikavimbae oyapo?
33Jayave Saúl oipɨɨ imii oyuka vaerä taɨ Jonatán, jókuae rupi Jonatán ou oikuaa kërai tu oïndaivi oyuka vaerä David.
34Jayave Jonatán iyarasɨ yae reve opüa mesa güi, jare mbaetɨ okaru aretea pe jae reta ndive mokoía ara pe, echa omboasɨ yae tu iñee, jare ipɨatɨtɨ yae David re.
35Pɨareve pe ndeimbove Jonatán ojo kaa pe, metei jembiokuai taɨrusu vae ndive, David ndive oñomomiari rami.
36Jare jei jembiokuai pe:
—Esɨi ekua eru uvɨ reta omondota vae.
Jare kunumi osɨi ojo yave, jae omondo uvɨ mombɨrɨ jenonde kotɨ chugüi.
37Jare kunumi ojo oväe Jonatán uvɨ omondoa pe. Jonatán osapúkai kunumi pe jei reve:
—¡Uvɨ oime oï kutɨ ye ndegüi!
38Jare osapúkai ye Jonatán kunumi pe:
—¡Esɨi, nderangai, agüɨye epɨta!
Jare jókuae kunumi Jonatán pe oyeokuai vae güeru chupe uvɨ reta.
39Ërei mbaetɨ etei mbae re oikuaa, jaeño David jare Jonatán oikuaa kuae oyapo ñogüɨnoi vae.
40Kuae jaɨkue rupi, Jonatán omee jembiporu ñeraro pegua jembiokuai pe, jare oyókuai güɨraja vaerä chupe tëta guasu pe.
41Jare jembiokuai ojo ma yave, David oë arayevɨ kotɨ güi ita yatɨ oï vae ikupe güi, oyetavatɨka ɨvɨ re mboapɨ ye itindɨasɨ reve, javoi oyoovapɨte jare oñoäpiro reta, ërei David jeta yae oyaeo.
42Jare Jonatán jei David pe:
—Ekua ndepɨakatu reve, echa ñañererökuavee ko yandeYa jee re yae reve: “YandeYa toï nde ndive jare che ndive jare ñaneñemuña reta ndive jekuae avei pegua.”
Jare David opüa ojo jare Jonatán ou ye tëta guasu kotɨ.
Who We AreWhat We EelieveWhat We Do
2025 by iamachristian.org,Inc All rights reserved.
