1CheRu Tumpa, chereepɨ cherovaicho reta güi;
chereroasayepe oñemopüa chekotɨ vae reta güi.
2Chereepɨ jeko kavimbae reta güi,
chereroasayepe oporoyuka vae reta güi.
3Echa, ko chepïaro reta cheyuka vaerä,
oyomboatɨ reta chekotɨ imbaepuere vae reta.
CheYa Tumpa, mbaetɨ cheñee-rei,
ani ayapo mbaeyoa jeko pegua.
4Cherekombae reve iyandeko oñemopüa reta cheré.
¡Epa! ¡Eyu kuae aïa pe emae cheré!
5Nde, cheYa,
Tumpa Imbaepuere yae ete vae, Israel iTumpa,
epa reiporarauka vaerä opaete tëtaguasu reta pe;
agüɨye eiparareko oyembopɨapochɨ ikavimbae rupi vae reta.
6Yogüeru kaaru yave, oñaro reta yaɨmba rami,
jare oyere reta tëta guasu re.
7Mase, jei reta mbae ikavimbae,
jembe re güɨnoi rami kɨsepuku,
jei reta: “¡Mbaetɨ etei kia yandereendu vae!”
8Ërei ngatu nde cheYa, repukata jese reta;
nde reyóyai yoyaita opaete tëtaguasu reta.
9Tovaicho reta imbaepuere yae jeko pegua ndereño ayekota,
echa nde Tumpa jae ko chereepɨ vae.
10Tumpa cheparareko vae ojota cherenonde,
Tumpa omeeta aecha vaerä cherovaicho reta ikañɨtei.
11Agüɨye opaete voi eyuka,
cherëtaɨgua reta oecha vaerä;
ndembaepuere pe opa emoai moai, jare emomichi reta.
¡CheYa Tumpa, oreyeopiaka!
12Iyoa reta opaete mbae jei vae jeko pegua,
iyembotuicha pe aeño tembipɨɨrä toyeapo,
jare iyepopeyu apu rupi vae pe.
13¡Emokañɨtei arasɨ ndive!
¡Emokañɨtei agüɨye vaerä ma yogüɨreko!
¡Opaete vae toikuaa Tumpa jae ko Jacob iñemuña reta juvicha guasu,
opaete ɨvɨ iyapɨ rupi ave!
14Yogüeru kaaru yave jare oñaro reta yaɨmba rami,
jare oyere reta tëta guasu re.
15Oguata reteiño oeka reta mbae jou vaerä,
mbaetɨ jɨ̈vɨata yave, iköeiño oyaeo reta.
16Ërei che atairarita ndembaepuere regua,
ambaemboeteta ndeimbove yave ndeporoparareko regua.
Echa nde jae ko cheyeepɨka jare cheñepɨ̈roa chepɨatɨtɨ aï yave.
17Atairarita ndeve, echa nde cheRu Tumpa
jae ko cheñepɨ̈roa,
¡Tumpa cheraɨu vae!
Who We AreWhat We EelieveWhat We Do
2025 by iamachristian.org,Inc All rights reserved.
